.jpg)
ក្រុមនិស្សិតដែលទើបត្រឡប់មកពីប្រទេសអ៊ីស្រាអែល កាលពីម្សិលមិញ។ រូបថត ហ្វេសប៊ុក
ភ្នំពេញៈ និស្សិតផ្នែកកសិកម្មកម្ពុជា ដែលបានបញ្ចប់ការសិក្សា និងការហាត់ការ នៅប្រទេសអ៊ីស្រាអែល ហើយបានវិលត្រឡប់មកព្រះរាជាណាចក្រកម្ពុជាវិញ ពួកគេស្ទើរតែទាំងអស់ទទួលបានការងារធ្វើក្នុងវិស័យរដ្ឋ និងឯកជន ដោយទទួលបានប្រាក់ចំណូលសមរម្យ។ នេះបើតាម រដ្ឋមន្ត្រីកសិកម្ម រុក្ខាប្រមាញ់ និងនេសាទ។
លោក វេង សាខុន រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ ប្រាប់ ភ្នំពេញ ប៉ុស្តិ៍ យ៉ាងដូច្នេះ បន្ទាប់ពីនិស្សិតកសិកម្មកម្ពុជា ១៩៧ នាក់ បានបញ្ចប់ការសិក្សា និងការហាត់ការរយៈពេល ១០ ខែ នៅប្រទេសអ៊ីស្រាអែល និងបានវិលត្រឡប់មកដល់ព្រះរាជាណាចក្រកម្ពុជាវិញ នាថ្ងៃទី ៣១ ខែតុលា ឆ្នាំ ២០២១ ។ លោក វេង សាខុន ថ្លែងថា និស្សិតកសិកម្មកម្ពុជាទាំង ១៩៧ នាក់ ដែលបានវិលត្រឡប់មកវិញនេះ ភាគច្រើនជានិស្សិតឆ្នាំទី ២ ចូលឆ្នាំទី ៣។ ពួកគេត្រូវបានបញ្ជូនទៅសិក្សា និងការហាត់ការរយៈពេល ១០ ខែ នៅប្រទេសអ៊ីស្រាអែល ដើម្បីទទួលបានចំណេះដឹង និងចំណេះធ្វើជាក់ស្តែង។
លោកបន្តថា និស្សិតទាំងនោះនឹងបន្តបញ្ចប់សារណារបស់ពួកគេនៅប្រទេសកម្ពុជា ក្នុងរយៈពេល ១ ឆ្នាំទៀត ទើបពួកគេទទួលបានបរិញ្ញាបត្រ ហើយចេញទៅធ្វើការ។ នៅពេលពួកគេបញ្ចប់បរិញ្ញាបត្រ ពួកគេស្ទើរតែ ១០០% ទទួលបានការងារធ្វើ និងត្រូវបានគេស្វាគមន៍គ្រប់ទីកន្លែង មិនមែនត្រឹមតែទទួលបានការងារធ្វើនៅក្នុងក្រសួងកសិកម្មទេ។
ទោះជាយ៉ាងណា លោកបន្តថា ក្រសួងមិនអាចទទួលយកដោយស្វ័យប្រវត្តិបានទេ ទាល់តែមានការឆ្លងកាត់ការប្រឡងត្រឹមត្រូវ ទើបអាចចូលបម្រើការងារនៅក្នុងក្រសួងបាន។ ប៉ុន្តែទន្ទឹមគ្នានេះ វិស័យឯកជនបានស្រូបទាញ ស្ទើរតែ ១០០% ព្រោះពួកគេមានចំណេះដឹង និងចំណេះធ្វើល្អប្រសើរ និងសំខាន់បំផុត ជំនាញដែលពួកគេទទួលបាននេះ គឺកំពុងតែពេញនិយមទៅដល់ការធ្វើទំនើបកម្មកសិកម្មរបស់កម្ពុជា។
លោកថ្លែងថា៖ «យើងមើលឃើញសព្វថ្ងៃនេះ នៅគ្រប់បណ្តាខេត្តកំពុងជំរុញធ្វើកសិកម្ម តាមរយៈការដាំដុះបន្លែ ការដំឡើងប្រព័ន្ធស្រោចស្រពទំនើបតាមបច្ចេកទេសរបស់ប្រទេសអ៊ីស្រាអែលកំពុងតែផុលផុសឱ្យកូនសិស្សមួយចំនួន ដែលចេញពីសាលាបានបម្រើការកែច្នៃនូវផលិតផលកសិកម្មកម្ពុជា។ មួយចំនួនទៀត ទៅបម្រើការងារទីប្រឹក្សាបច្ចេកទេសដល់វិស័យកសិកម្ម»។
បើតាមលោករដ្ឋមន្ត្រីកសិកម្ម និស្សិតកសិកម្មជិត ៣ ០០០ នាក់ ដែលបានវិលត្រឡប់ពីប្រទេសអ៊ីស្រាអែលវិញ គឺបានទទួលការងារល្អ និងប្រាក់បៀវត្សរ៍ល្អសមរម្យទៅតាមជំនាញដែលពួកគាត់បានឆ្លងកាត់នៅប្រទេសនេះស្របតាមដំណើរការវិវឌ្ឍនៃវិស័យកសិកម្មកម្ពុជាដែលបាន និងកំពុងផ្តើមចេញពីចំណេះដឹងបច្ចេកទេស។ ដូច្នេះនិស្សិតកសិកម្មកម្ពុជាដែលបានវិលមកពីប្រទេសអ៊ីស្រាអែលវិញបានចូលរួមចំណែកទៅដល់ការធ្វើទំនើបកម្មកសិកម្មកម្ពុជានាពេលបច្ចុប្បន្ន។
លោក វេង សាខុន បញ្ជាក់ថា ប្រទេសអ៊ីស្រាអែលបានមើលឃើញពីការខិតខំសិក្សា និងអាកប្បកិរិយាល្អរបស់និស្សិតកន្លងមក មជ្ឈមណ្ឌលហ្វឹកហ្វឺនកសិកម្ម Sedot Negev បានស្នើបង្កើនចំនួននិស្សិតកសិកម្មរហូតដល់ ២០០ នាក់សម្រាប់ឆ្នាំ ២០២២។
លោក ធន វឌ្ឍនា នាយកសាលាជាតិកសិកម្មព្រែកលៀបឱ្យដឹងដែរថា លោកបានប្រាប់សាលាឱ្យធ្វើការសិក្សាស្ទង់មតិរួចហើយ ពាក់ព័ន្ធនឹងចំនួននិស្សិត កសិកម្មកម្ពុជាដែលបានទៅសិក្សា និងហ្វឹកហាត់នៅអ៊ីស្រាអែលហើយត្រឡប់មកវិញ មានការងារធ្វើ និងគ្មានការងារធ្វើនោះ។ រីឯលទ្ធផលអាចនឹងចេញនៅឆ្នាំក្រោយនេះ ប៉ុន្តែតាមស្ថានភាពជាក់ស្តែង គឺភាគច្រើន ពួកគេមានការងារធ្វើគ្រប់គ្នា។
លោកបន្តថាបច្ចុប្បន្នមានក្រុមហ៊ុនជាច្រើនបានមកទាក់ទងសាលារៀនរបស់លោកស្នើសុំនិស្សិតដែលបានទៅសិក្សា និងហ្វឹកហាត់នៅប្រទេសអ៊ីស្រាអែល ហើយត្រឡប់មកវិញឱ្យទៅធ្វើការជាមួយគេ។ ប៉ុន្តែ សាលាមិនមាននិស្សិតឱ្យគេនោះទេ ព្រោះពួកគេមានការងារធ្វើគ្រប់គ្នា ដោយទីផ្សារនៅក្នុងវិស័យនេះ ធំទូលាយ និងនិស្សិតដែលរៀននៅក្នុងផ្នែកនេះមានចំនួនតិច។
លោកថា៖ «សូម្បីតែនិស្សិតដែលរៀនផ្នែកកសិកម្ម ដោយមិនបានចេញទៅសិក្សា និងហ្វឹកហាត់នៅក្នុងប្រទេសអ៊ីស្រាអែលក៏ចេញធ្វើការគ្រប់ៗគ្នាដែរ។ មានក្រុមហ៊ុន ប្រកាសរកនិស្សិត ២០ ទៅ ៣០ នាក់ទៅធ្វើការឱ្យគេ។ យើងរកអត់បានឱ្យគេទេ ព្រោះអត់មានអ្នករៀនផ្នែកនេះ ដោយសារអ្នកខ្លះ គេថា រៀនកសិកម្ម ធ្វើការវាលស្រែហាលក្តៅ។ គេចង់ធ្វើការតែក្នុងអហ្វហ្វីស តែតាមពិតមិនមែនអ៊ីចឹងទេ ការងារខ្លះក៏គេធ្វើក្នុងអហ្វហ្វីសដូចតែគ្នាដែរហ្នឹង»៕
