កំពតៈ នគរបាលខេត្តកំពត កំពុងស្វែងរកជនសង្ស័យចំនួន ២ នាក់ទៀត ពាក់ព័ន្ធករណីប្លន់ និងរំលោភសេពសន្ថវៈ ក្មេងស្រី ២ នាក់ នៅភូមិប្រភ្នំ ឃុំប្រភ្នំ ស្រុកអង្គរជ័យខេត្តកំពត កាលពីថ្ងៃទី ១៨ តុលា បន្ទាប់ពីចាប់បានជនសង្ស័យម្នាក់ កាលពីថ្ងៃទី ២៩ តុលា។
លោក ហ៊ន ប៊ុនស៊ីឌេត អធិការនគរបាលស្រុកអង្គរជ័យ ថ្លែងនៅថ្ងៃទី ១ ខែវិច្ឆិកាថា ក្រោយចាប់បានជនសង្ស័យម្នាក់ សមត្ថកិច្ចក៏បាននិងកំពុងបន្តធ្វើការស្រាវជ្រាវ ស្វែងរកជនសង្ស័យ ២ នាក់ទៀត ដែលកំពុងរត់គេច។
លោកថ្លែងថា៖ «យើងកំពុងតែបន្តស្រាវជ្រាវរក ២ នាក់ហ្នឹង ស្នាក់នៅកន្លែងណា គេចខ្លួនទៅកន្លែងណា ដើម្បីយើងសុំដីកាតាមចាប់ខ្លួន» ។
អង្គភាពការពារកុមារ (CPU) បានឲ្យដឹងតាមរយៈហ្វេសប៊ុកនៅថ្ងៃទី ១ ខែវិច្ឆិកាថា ក្រោយពីបានទទួលដំណឹងក្នុងករណីប្លន់ និងចាប់រំលោភនេះ CPU ក៏បានចូលរួមសហការជាមួយនគរបាលខេត្តកំពត ដោយបានបង្កើតក្រុមការងារចម្រុះ KILO21 ដើម្បីធ្វើការស៊ើបអង្កេតទៅលើករណីមួយនេះ។
CPU បានឲ្យដឹងថា នៅថ្ងៃទី ២០ ខែតុលា នាយកដ្ឋានព្រហ្មទណ្ឌកម្រិតធ្ងន់ នៃក្រសួងមហាផ្ទៃ បានចូលរួមសហការ ដើម្បីបន្តការស៊ើបអង្កេត រហូតដល់ថ្ងៃទី ២៩ ខែតុលា សមត្ថកិច្ចឃាត់ខ្លួនបានបុរសអាយុ ៣៥ ឆ្នាំ ដែលពាក់ព័ន្ធជាមួយបទល្មើសប្លន់រំលោភនេះ។
អង្គភាពការពារកុមារសរសេរថា៖ «បុរសនេះត្រូវបានជាប់ចោទពីបទល្មើសរំលោភសេពសន្ថវៈ និងបទល្មើសពាក់ព័ន្ធមួយចំនួនបន្ថែមទៀត និងកំពុងនៅក្រោមការឃុំឃាំង»។
បើតាម CPU ក្មេងស្រីរងគ្រោះត្រូវបាន ជនល្មើសប្លន់និងចាប់រំលោភ នៅយប់ថ្ងៃ ១៨ ខែ តុលា ឆ្នាំ ២០២១ ខណៈពេលក្មេងស្រីទាំង ២ នាក់ ដែលជាបងប្អូននឹងគ្នា ម្នាក់មានអាយុ ១៣ ឆ្នាំ និងម្នាក់ទៀតអាយុ ១៧ ឆ្នាំ កំពុងគេងនៅក្នុងផ្ទះ។
ជនសង្ស័យ បានធ្វើសកម្មភាពនៅវេលាម៉ោងប្រមាណ ២ ទៀបភ្លឺ ដោយបានចូលប្លន់យកលុយទូរស័ព្ទ និងគ្រឿងអលង្ការ រួចទើបធ្វើសកម្មភាពរំលោភសេពសន្ថវៈ ទៅលើក្មេងស្រីរងគ្រោះទាំង ២ នាក់ ហើយរត់គេចខ្លួនបាត់ ។
CPU បានឲ្យដឹងថា បន្ទាប់ពីជនល្មើសបានរត់គេចខ្លួនបាត់ ជនរងគ្រោះបានប្រាប់ទៅដល់សាច់ញាតិដើម្បីធ្វើការរាយការណ៍ទៅកម្លាំងនគរបាល។ ការិយាល័យព្រហ្មទណ្ឌ និងការិយាល័យបច្ចេកទេស និងវិទ្យាសាស្ត្រនៃស្នងការដ្ឋាននគរបាលខេត្តកំពតបានចុះទៅពិនិត្យដល់កន្លែងកើតហេតុ៕