.jpg)
ភ្នំពេញៈ សាលាដំបូងរាជធានីភ្នំពេញ នៅថ្ងៃទី ១ ខែវិច្ឆិកា កំពុងបន្តធ្វើការសាកសួរបុរស ៤ នាក់ និងស្ត្រីម្នាក់ពាក់ព័ន្ធនឹងករណីជួញដូរគ្រឿងញៀនមេតំហ្វេតាមីនជាង ៥ ម៉ឺនគ្រាប់ បន្ទាប់ពីនគរបាលមន្ទីរប្រឆាំងគ្រឿងញៀនបានបញ្ជូនទៅតុលាការកាលពីថ្ងៃទី ៣១ ខែតុលា។
ជនទាំងនេះត្រូវបានសមត្ថកិច្ចចាប់ឃាត់ខ្លួនជាបន្តបន្ទាប់នៅក្នុងខណ្ឌពោធិ៍សែនជ័យរាជធានីភ្នំពេញ និងនៅភូមិជ្រៃ ឃុំកណ្តែក ស្រុកប្រាសាទបាគង ខេត្តសៀមរាប កាលពីថ្ងៃទី ២៩ តុលា។ លោកឧត្តមសេនីយ៍ទោ សឿង ណុល នាយករងមន្ទីរប្រឆាំងគ្រឿងញៀនឱ្យដឹងនៅថ្ងៃទី ១ វិច្ឆិកាថា ជនសង្ស័យទី១- ឈ្មោះ ខុង ខុម ភេទប្រុស អាយុ ៤០ ឆ្នាំ ទី២- ឈ្មោះ អាត នឿត ភេទប្រុស អាយុ ៤០ ឆ្នាំ ទី៣- ឈ្មោះ សល់ សេងលី ភេទប្រុស អាយុ ៣៨ ឆ្នាំ ទី៤- ឈ្មោះ សឹម សត្យា ភេទ ស្រី អាយុ ៣៨ ឆ្នាំ។ ពួកគេជាជនជាតិខ្មែ និងទី៥- ឈ្មោះ លឹម ហេង ភេទប្រុស អាយុ ៥១ ឆ្នាំជាជនជាតិថៃ។
លោកប្រាប់បន្តថា៖ «ពួកគេរួមនឹងវត្ថុតាងគ្រឿងញៀនត្រូវបានមន្ទីរបញ្ជូនទៅតុលាការនៅថ្ងៃទី ៣១ ខែតុលា»។
លោក សឿង ណុល មិនបានបញ្ជាក់លម្អិតពីប្រតិបត្តិការនៃការបង្ក្រាបបទល្មើសគ្រឿងញៀននេះទេ។ ប៉ុន្តែបើយោងតាមរបាយការណ៍របស់មន្ទីរប្រឆាំងគ្រឿងញៀនបានបង្ហាញថា កាលពីវេលាម៉ោងជាង ១០ ព្រឹកថ្ងៃទី ២៩ តុលា កម្លាំងការិយាល័យ (ក៧) នៃមន្ទីរប្រឆាំងបទល្មើសគ្រឿងញៀនដឹកនាំដោយលោកឧត្តមសេនីយ៍ទោ សឿង ណុល នាយករងមន្ទីរ និងមានការសម្របសម្រួលផ្លូវច្បាប់ពីលោក វង្ស សាវ៉ាត ព្រះរាជអាជ្ញារងសាលាដំបូងរាជធានីភ្នំពេញបានឃាត់ខ្លួនជនសង្ស័យ ២ នាក់ និងដកហូតថ្នាំញៀនប្រភេទមេតំហ្វេតាមីនគ្រាប់បាន (WY) ចំនួន ២០ ០០០ គ្រាប់នៅតាមបណ្តោយផ្លូវវិមានឈ្នះឈ្នះ ក្នុងភូមិត្រពាំងពោធិ៍ សង្កាត់ចោមចៅ ៣ ខណ្ឌពោធិ៍សែនជ័យ។
របាយការណ៍បន្តថា ក្រោយឃាត់ខ្លួនជនសង្ស័យបានសារភាពថា ពួកគេនៅមានបក្ខពួក ៣ នាក់ទៀតកំពុងធ្វើសកម្មភាពនៅខេត្តសៀមរាប។ នៅរសៀលថ្ងៃទី ២៩ តុលា សមត្ថកិច្ចបានចុះទៅដល់ខេត្តសៀមរាបដោយចុះបង្ក្រាបបានជនសង្ស័យ ៣ នាក់ទៀតនៅភូមិជ្រៃ ឃុំកណ្តែក ស្រុកប្រាសាទបាគង។
ចំពោះវត្ថុតាងដកហូតបានមានថ្នាំញៀនប្រភេទមេតំហ្វេតាមីនគ្រាប់ (WY) ៣០ ០០០ គ្រាប់ រថយន្តម៉ាក Land Criuser ១ គ្រឿង ទូរស័ព្ទដៃ ៦ គ្រឿង លុយថៃ ២៦ ៣៥០ បាត លុយខ្មែរ ៧ ៨០០ ០០០ រៀល លុយដុល្លារ ៨៨៥ ដុល្លារ លោហធាតុពណ៌លឿងមានដាំត្បូងពណ៌ស និងពណ៌ខ្មៅ កងដៃ ១ បន្តោងខ្សែក ២ ខ្សែក ៣ ខ្សែ បណ្ណសម្គាល់រថយន្តចំនួន ៣ សន្លឹក។
នៅរសៀលថ្ងៃទី ១ វិច្ឆិកា ភ្នំពេញប៉ុស្តិ៍បានទាក់ទងលោក ប្លង់ សុផល អ្នកនាំពាក្យអយ្យការអមសាលាដំបូងរាជធានី តែលោកមិនបានឆ្លើយតបទេគិតមកដល់ត្រឹមម៉ោងបោះពុម្ពផ្សាយកាសែតនៅយប់ថ្ងៃទី ១ វិច្ឆិកា។
ប៉ុន្តែមន្ត្រីតុលាការម្នាក់ដែលសុំមិនបញ្ចេញឈ្មោះបានថ្លែងថា តុលាការកំពុងសាកសួរជនសង្ស័យទាំង ៥ នាក់នេះ៕
