.jpg)
មន្ត្រីជួបពិភាក្សាគ្នា កាលពីថ្ងៃទី ១ វិច្ឆិកា ពីការបណ្តុះបណ្តាលសុនខ ឱ្យហិតរកគ្រឿងញៀន និងបណ្តុះបណ្តាលមន្ត្រី។ រូបថត នគរបាល
ភ្នំពេញៈ អគ្គស្នងការដ្ឋានគរបាលជាតិ និងមជ្ឈមណ្ឌលសកម្មភាពកំចាត់មីនកម្ពុជាបានជួបពិភាក្សាគ្នាពីគម្រោងសហការ ក្នុងការបណ្តុះបណ្តាលសុនខហិតរកគ្រឿងញៀន និងបណ្តុះបណ្តាលមន្ត្រីនគរបាលជាតិ នៃមន្ទីរប្រឆាំងគ្រឿងញៀន ដើម្បីបង្កើនសមត្ថភាព ក្នុងការស្វែងរកនឹងបង្ក្រាបបទល្មើសគ្រឿងញៀន។
កាលពីថ្ងៃទី ០១ ខែវិច្ឆិកា លោក ម៉ក់ ជីតូ អគ្គស្នងការរង គរបាលជាតិ ទទួលផែនប្រឆាំងគ្រឿងញៀន បានជួបពិភាក្សាជាមួយមន្ត្រីនៃមជ្ឈមណ្ឌលសកម្មភាពកំចាត់មីនកម្ពុជា ជុំវិញគម្រោងផែនការផ្តល់សុនខជំនាញហិតគ្រឿងញៀន ដល់មន្ទីរប្រឆាំងគ្រឿងញៀន និងត្រៀមបើកវគ្គបណ្តុះបណ្តាលជំនាញគ្រប់គ្រងសុនខ ដល់មន្ត្រីនគរបាលជាតិ នាមន្ទីរប្រឆាំងគ្រឿងញៀនភ្នំពេញ។
លោក ម៉ក់ ជីតូ បានប្រាប់ ភ្នំពេញ ប៉ុស្តិ៍ នៅថ្ងៃទី ២ វិច្ឆិកាថា CMAC គឺមានកិច្ចការងារជាច្រើន ក្នុងការបង្ហាត់បង្រៀនសុខន ដើម្បីស្វែងរកអាវុធគ្រឿងផ្ទុះ បង្ក្រាបភេរវកម្ម ចុះល្បាត និងការហិតរកមេរោគកូវីដ ១៩ ហើយក្នុងនោះ ក៏មានការបណ្តុះបណ្តាលហិតរកគ្រឿងញៀនផងដែរ។
ដោយសារតែបែបនេះហើយ ទើបស្ថាប័នទាំង ២ បានជួបពិភាក្សាគ្នា ដើម្បីស្វែងរកលទ្ធភាពពាក់ព័ន្ធក្នុងការបង្ហាត់បង្រៀនសត្វសុខន ដើម្បីហិតរកគ្រឿងញៀន និងបណ្តុះបណ្តាលដល់មន្ទីរប្រឆាំងគ្រឿងញៀន ខណៈដែលបច្ចុប្បន្ន អគ្គស្នងការ មានសុខនហិតគ្រឿងញៀនចំនួន ២ ក្បាលប៉ុណ្ណោះ កំពុងបំពេញការងារ ស្របពេលលដែលពួកវា មានវ័យចាស់ណាស់ទៅ ហើយ។
លោកបញ្ជាក់ថា៖ «គោលដៅរបស់យើង គឺធ្វើម៉ិចឱ្យគាត់ បណ្តុះបណ្តាល ២ ចំណុចមកកាន់យើង គឺទី១ ការបណ្តុះបណ្តាលឆ្កែ ឲ្យចេះរកគ្រឿងញៀន ជាមួយការសហការជាមួយមន្ទីរប្រឆាំងគ្រឿងញៀន ដើម្បីដឹងថា គ្រឿងញៀន មានប៉ុន្មានប្រភេទ ឱ្យឆ្កែវាចេះហិត។ ចំណែកទី២ គឺបង្ហាត់មន្ត្រីរបស់យើង»។
យ៉ាងណាក្តី ស្ថាប័នទាំង ២ កំពុងពិចារណាបន្ត និងត្រូវការពេលសិក្សាបន្ថែមទៀត ពីគម្រោងនេះ ដើម្បីឱ្យប្រាកដថា នៅពេលគម្រោងនេះ លិចជារូបរាង នឹងទទួលបានជោគជ័យ ក្នុងការទទួលបានមន្ត្រីជំនាញ និងសុខន ដែលអាចបម្រើដល់វិស័យនេះ។
លោករៀបរាប់ទៀតថា៖«ឆ្កែដែលយើងបានពី CMAC អាចថា ល្អ ព្រោះសុំានឹងអាកាសធាតុ។ ល្អមួយទៀត ព្រោះបើយើងបានប្រើប្រាស់ឆ្កែជួយក្នុងកិច្ចការងារនេះ ជាពិសេសនៅតាមព្រលានយន្តហោះអី ហើយពេលខ្លះយើងឆែកតាមអ៊ីសារ៉េ មិនឃើញទេ។ ប៉ុន្តែសម្រាប់ឆ្កែ គឺវាដឹង ព្រោះវាពូកែនឹងច្រមុះហិតក្លិន»។
តាមគម្រោង មន្ត្រីដែលបញ្ចូនទៅរៀន គឺចេញពីមន្ត្រីនៃអគ្គស្នងការដ្ឋាននគរបាលជាតិ ហើយសុខនដែលត្រូវបានជ្រើសរើស ដើម្បីទទួលបានការបង្ហាត់បង្រៀននេះ គឺផ្តល់ឱ្យដោយ CMAC ខណៈដែលលទ្ធផលនៃការបង្ហាត់ដែលទទួលបានជោគជ័យប៉ុន្មានក្បាល នឹងត្រូវប្រគល់ឱ្យអគ្គស្នងការដ្ឋាននគរបាលជាតិ ដើម្បីយកមកបំពេញការងារ។ នេះបើតាមលោកម៉ក់ ជីតូ។
តាមគេហទំព័រអគ្គស្នងការដ្ឋាននគរបាលជាតិ ដែលបានដកស្រង់សម្តីលោក ប្រាក់ សុម៉ាធី ប្រធានគ្រប់គ្រងសុខន នៃ CMAC នៅក្នុងកិច្ចប្រជុំ ដោយបានរាយការណ៍ជូនអំពីបច្ចេកទេសនៃការបង្ហាត់សុនខហិតគ្រឿងញៀន និងការបណ្តុះបណ្តាលមន្ត្រីជំនាញ។
លោក ប្រាក់ សុម៉ាធី បានថ្លែងថា គម្រោងនេះ គឺមានបំណងផ្ដល់សុនខហិតគ្រឿងញៀនដល់មន្ទីរប្រឆាំងគ្រឿងញៀន ដើម្បីរួមចំណែកបង្ការ ទប់ស្តាត់បទល្មើសគ្រឿងញៀន ។
លោក ហង្ស ពិទូរ ប្រធានរដ្ឋបាល មណ្ឌលស្តារនីតិសម្បទា ព្យាបាល អ្នកញៀនគ្រឿងញៀន-ឌីធីអេ បានលើកឡើងថា ការដែលមានសត្វសុនខដែលមានសមត្ថភាពហិតគ្រឿងញៀនគឺជាការចូលរួមចំណែកមួយរបស់កំលាំងសមត្ថកិច្ច ក្នុងការបង្ក្រាបបទល្មើសគ្រឿងញៀន។
បើសិនជាធនធានទាំងនេះ មានកាន់តែតែច្រើន នោះប្រសិទ្ធភាពការងារ ក្នុងការបង្ក្រាបបទល្មើសគ្រឿងញៀន ក៏មានលក្ខណៈល្អប្រសើរជាងមុនផងដែរ ខណៈបច្ចុប្បន្ន សុខនដែលមានសមត្ថភាពបែបនេះ នៅក្នុងប្រទេសកម្ពុជា គឺមានចំនួនតិច។
លោក បញ្ជាក់ថា៖«សម្រាប់ធនធានសព្វថ្ងៃនេះ គឺតិចមែនទែន ការដែលយើងត្រូវគ្រប់គ្រង ច្រកចេញចូលចរាចរណ៍ គឺមានច្រើន។ ធម្មតាទេ បើសិនជាមានធនធានសុនខគ្រប់គ្រាន់ គឺវានឹងល្អ ដោយអាចប្រើប្រាស់បានច្រើន ចំណេញពេលវេលា ព្រោះថា សុនខ គឺធ្វើឱ្យប្រសិទ្ធភាពនៃការឆែកឆេរ មានប្រសិទ្ធភាពខ្ពស់ច្បាស់លាស់»៕
