.jpg)
ទិដ្ឋភាពផ្ទៃមេឃស្រអាប់នៅតាមមាត់ទន្លេ រាជធានីភ្នំពេញនៅថ្ងៃទី ២ វិច្ឆិកា ឆ្នាំនេះ។ ហុង មិនា
ភ្នំពេញៈចាប់ពីចុងសប្ដាហ៍នេះទៅអាកាសធាតុនៅកម្ពុជានឹងចាប់ផ្ដើមចុះអ័ព្ទនៅពេលព្រឹក និងមានខ្យល់ត្រជាក់បក់ពីទិសឦសាននៃតំបន់ស៊ីបេរី ដែលស្ថានភាពបែបនេះនឹងធ្វើឲ្យសីតុណ្ហភាព ធ្លាក់ចុះមកក្នុងរង្វង់ពី ២០-២២ អង្សាសេ ហើយបណ្ដាខេត្តនៅជាប់ព្រំដែនប្រទេសវៀតណាម អាចនឹងមានភ្លៀងធ្លាក់លាយឡំផ្គររន្ទះក្នុងកម្រិតពីតិចទៅច្រើន។នេះបើតាមលោក ចាន់ យុត្ថា អ្នកនាំពាក្យក្រសួងធនធានទឹកនិងឧតុនិយមកាលពីថ្ងៃទី ២ ខែ វិច្ឆិកា ឆ្នាំ ២០២១។
លោកបានថ្លែងថា យោងតាមស្ថានភាពវិវត្តនៃអាកាសធាតុនាពេលបច្ចុប្បន្ន ប្រទេសកម្ពុជា នឹងទទួលរងនូវឥទ្ធិពលទ្រនុងសម្ពាធខ្ពស់ចិន ឥទ្ធិពលជ្រលងសម្ពាធទាបប៉ាស៊ីហ្វិក និងឥទ្ធិពលខ្យល់មូសុងឦសាន ដែលនឹងកើតឡើងជាបន្តបន្ទាប់ពេញ ១ សប្ដាហ៍ចាប់ពីថ្ងៃទី ៣-៩ ខែវិច្ឆិកា ខាងមុខនេះ។
លោកបានបញ្ជាក់ថា៖ «តាមរយៈឥទ្ធិពលនៃអាកាសធាតុទាំង ៣ នេះនឹងធ្វើឲ្យសីតុណ្ហភាពនៅកម្ពុជាមានធ្លាក់ចុះមកនៅក្នុងរង្វង់ពី ២០-២២ អង្សាសេ។ បន្ទាប់ពីសប្ដាហ៍ទី២ នៃខែវិច្ឆិកានេះទៅ មេឃក៏ចាប់ផ្ដើមរាំងភ្លៀងផងដែរ ដូច្នេះអ្នកដែលមានដីស្រែនៅផ្នែកខាងលើនៃតំបន់ដាច់ស្រយាល គប្បីរូតរះទប់ទឹករក្សាទុកឲ្យបានល្អ សម្រាប់ប្រើប្រាស់ និងស្រោចស្រពលើដីស្រែចម្ការរបស់ខ្លួននារដូវប្រាំងខាងមុខនេះ»។
លោកបានបន្ថែមថា យ៉ាងណាក៏ដោយ នៅក្នុងសប្ដាហ៍នេះបណ្ដាខេត្តនៅភាគខាងត្បូង និងខាងកើតជាប់ព្រំប្រទល់ប្រទេសវៀតណាម នឹងមានភ្លៀងធ្លាក់ក្នុងកម្រិតពីតិចទៅច្រើន ដែលអាចធ្វើឲ្យតំបន់ដែលជួបប្រឈមគ្រោះជំនន់ទឹកភ្លៀងនាពេលកន្លងមកអាចជន់លិចជាថ្មីម្ដងទៀត ពិសេសអ្នកដែលរស់នៅតាមតំបន់វាលទំនាបជាប់មាត់ទឹក។
ដោយសាររបបខ្យល់មូសុងឦសានដែលបក់មកពីមណ្ឌលសម្ពាធខ្ពស់ស៊ីបេរីបាននាំមកនូវអាកាសធាតុត្រជាក់ និងមានសន្សើមធ្លាក់ច្រើននៅពេលយប់ព្រមទាំងមានចុះអ័ព្ទនៅពេលព្រឹកផងនោះ លោក ចាន់ យុត្ថា ក៏បានអំពាវនាវឲ្យប្រជាពលរដ្ឋបង្កើនការយកចិត្តទុកដាក់អំពីសុខភាពកុមារតូចៗនិងមនុស្សចាស់ជរា ព្រោះជាទូទៅនៅពេលមានការផ្លាស់ប្ដូរខ្យល់រដូវម្ដងៗកុមារតូចៗនិងមនុស្សចាស់ជរាតែងតែប្រឈមកើតមានជំងឺគ្រុនផ្ដាសាយ ឈឺភ្នែក និងក្អក។
ពាក់ព័ន្ធបញ្ហានេះអ្នកស្រី អឿ វណ្ណី អាយុ ៣១ ឆ្នាំ ដែលមានកូនតូចអាយុ ៩ ខែ ដែលទើបវិលត្រឡប់ពីទីទួលសុវត្ថិភាពទៅលំនៅឋានរបស់ខ្លួនវិញនៅក្នុងភូមិខ្វិត សង្កាត់សាក់សំពៅខណ្ឌដង្កោ រាជធានីភ្នំពេញ បានប្រាប់ ភ្នំពេញ ប៉ុស្តិ៍ថា ពេលនេះនៅភូមិរបស់អ្នកស្រីទឹកនៅមិនទាន់ស្រកផុតអស់នៅឡើយទេ។ ប្រសិនបើមានភ្លៀងធ្លាក់ខ្លាំងបន្ថែមទៀតនោះ ផ្ទះរបស់អ្នកស្រីនិងអ្នកភូមិផ្សេងទៀតនឹងត្រូវលិចជាថ្មីម្ដងទៀត ហើយបើមានអាកាសធាតុត្រជាក់ធ្លាក់មកទៀតនោះ គឺពួកគាត់នឹងមានបញ្ហាប្រឈមកាន់តែធ្ងន់ធ្ងរជាងនេះ។
អ្នកស្រីបាននិយាយថា៖ «ខ្ញុំមិនទាន់បានត្រៀមអ្វីសម្រាប់រដូវរងានេះទេ ព្រោះរវល់រឿងផ្ទះលិចទឹក។ ខ្ញុំទើបត្រឡប់ពីទួលសុវត្ថិភាពកាលពី ១ ថ្ងៃមុនហ្នឹងទេ។ ខ្ញុំមិនដឹងថាត្រូវធ្វើអ្វីបន្ថែមទេ ប្រសិនបើមានភ្លៀងធ្លាក់បង្កជន់លិចផ្ទះជាថ្មីនោះ គឺមានតែត្រឡប់ទៅទីទួលសុវត្ថិភាពវិញ ហើយរស់នៅក្រោមដំបូលតង់បន្តទៀតប៉ុណ្ណោះ»៕
វីដេអូ៖
