.jpg)
មន្ត្រីអាវុធហត្ថដែលផ្ទុះអាវុធបង្ករបួសដល់គូទំនាស់ ពីថ្ងៃទី ១ វិច្ឆិកា នៅខេត្តសៀមរាប។ រូបថត Eng Hy's Facebook
ភ្នំពេញៈ កម្លាំងជំនាញកងរាជអាវុធហត្ថខេត្តសៀមរាប កំពុងបន្តនីតិវិធីស៊ើបសួរលោក អាង សែន នាយការិយាល័យប្រឆាំងការជួញដូរមនុស្សនៃកងរាជអាវុធហត្ថខេត្តសៀមរាប ករណីផ្ទុះអាវុធក្នុងទំនាស់ពាក្យសម្ដីមួយកាលពីយប់ថ្ងៃទី ១ វិច្ឆិកា បង្កឱ្យគូទំនាស់ម្នាក់ជាអាជីវករ រងរបួសក្រោមត្របកភ្នែកខាងស្ដាំ។ នេះបើតាមលោកអេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស។
លោកបន្តថា ក្រោយពីមានករណីនេះកើតឡើង កម្លាំងជំនាញកងរាជអាវុធហត្ថខេត្តសៀមរាប បានចុះស៊ើបអង្កេតប្រមូលវត្ថុតាង និងបាននាំខ្លួនលោក អាង សែន បញ្ជូនមកទីបញ្ជាការកងរាជអាវុធហត្ថខេត្តសៀមរាប ដើម្បីបន្តធ្វើការស្រាវជ្រាវ និងអនុវត្តនីតិវិធី។
លោក អេង ហ៊ី បញ្ជាក់ថា៖ «កងរាជអាវុធហត្ថ នឹងបន្តធ្វើការស៊ើបអង្កេត ស្រាវជ្រាវរកភ័ស្តុតាង និងបុគ្គល ដែលពាក់ព័ន្ធនឹងអំពើល្មើសនេះ ដោយភាពយុត្តិធម៌ និងម៉ឺងម៉ាត់បំផុត»។
លោកបន្តថា៖ «ទន្ទឹមនឹងនេះ កងរាជអាវុធហត្ថសូមអភ័យទោសជាសាធារណៈ ចំពោះទង្វើ របស់យោធិននៃកងរាជអាវុធហត្ថខាងលើ ក៏ដូចជាយោធិនចំនួន ២ រូប នៃកងរាជអាវុធហត្ថខេត្តក្រចេះដែលបានប្រព្រឹត្តនាពេលកន្លងទៅផងដែរ»។
បើតាមលោក អេង ហ៊ី នៅពេលនេះ លោក អាង សែន កំពុងស្ថិតក្រោមការសួរចម្លើយពីក្រុមមន្ត្រីជំនាញនៃកងរាជអាវុធហត្ថខេត្តសៀមរាបនៅឡើយ។
យោងតាមរបាយការណ៍របស់កងរាជអាវុធហត្ថខេត្តសៀមរាប នៅយប់ថ្ងៃកើតហេតុ លោក អាង សែន នាយការិយាល័យប្រឆាំងការជួញដូរមនុស្សកងរាជអាវុធហត្ថខេត្តសៀមរាប បានមានទំនាស់ពាក្យសម្តីគ្នាជាមួយបុរសជាអាជីវករ វ័យ ៣៧ ឆ្នាំម្នាក់ ឈ្មោះ ហាត សុភា មានទីលំនៅភូមិឃុនមោគ ឃុំកណ្តែកស្រុកប្រាសាទបាគង ខេត្តសៀមរាប។
តាមរបាយការណ៍ដដែលនោះលោក ប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាប បញ្ជាក់ថា៖ «ក្នុងជម្លោះពាក្យសម្ដីនោះលោក អាង សែន បានយកកាំភ្លើងខ្លីម៉ាក CF98 ដែលមានបណ្ណសម្គាល់អាវុធខ្លីសមូហភាពចុះបញ្ជីបខ.២៩៤៧៤ កពជ លេខអាវុធ 015892 មកបាញ់ [ភ្ញច់] ដីចំនួន ១ គ្រាប់ ហើយបានខ្ទាតបំណែកថ្មត្រូវឈ្មោះ ហាត សុភា បណ្តាលឱ្យរបួសស្រាល ដោយរលាត់ក្រោមត្របកភ្នែកខាងស្តាំ»។
លោកបន្ថែមថា៖ «បន្ទាប់មកភាគីម្ខាងទៀតរបស់ឈ្មោះ ហាត សុភា បាននាំគ្នីគ្នា (មិនស្គាល់ឈ្មោះ) មកជាបន្តបន្ទាប់ រួចក៏បានបាញ់ចំនួន ២ គ្រាប់ ដោយអាវុធខ្លី មិនស្គាល់ម៉ាក តែមិនបណ្តាលឱ្យមានរបួសនោះទេ»៕
