កំពតៈ លោក ម៉ៅ ធនិន អភិបាលខេត្តកំពត បានប្រកាសបង្កើតក្រុមការងារចុះធ្វើបច្ចុប្បន្នភាពដល់ទីតាំងដីដែលមានជម្លោះប្រមាណ ៤០០ គ្រួសារ ក្នុងចំណុចវាលវែង ឃុំត្រពាំងភ្លាំង ស្រុកឈូក ដើម្បីសិក្សាលើទិដ្ឋភាពច្បាប់ក្នុងការផ្តល់សិទ្ធិកាន់កាប់ដីធ្លីដែលមានជម្លោះរ៉ាំរ៉ៃជាច្រើនឆ្នាំ។
ការប្រកាសយ៉ាងដូច្នេះបានធ្វើឡើងក្នុងពេលលោកបើកវេទិកាសាធារណៈបន្តទទួលជួបប្រជាពលរដ្ឋរាប់រយនាក់ នៅសាលាខេត្តកំពតកាលពីថ្ងៃទី ១ ខែ វិច្ឆិកា ឆ្នាំ ២០២១ ខណៈសំណើដែលលោកបានដោះស្រាយនាពេលនោះ គឺសុទ្ធតែវិវាទដីធ្លីរវាងពលរដ្ឋជាមួយបុគ្គល ឬរវាងពលរដ្ឋជាមួយក្រុមហ៊ុនឯកជន។
ថ្លែងក្នុងឱកាសនោះលោក ម៉ៅ ធនិន បានសន្យាជាមួយពលរដ្ឋទាំងនោះថា នឹងបង្កើតគណៈកម្មការ និងក្រុមការងារចម្រុះ ដើម្បីចុះទៅធ្វើបច្ចុប្បន្នភាពនៅទីតាំងមានជម្លោះដោយផ្ទាល់ក្នុងនោះក៏នឹងស្រាវជ្រាវបន្ថែមជុំវិញប្រវត្តិដីដែលពលរដ្ឋបានកាន់កាប់ផងដែរ។
លោកបានបញ្ជាក់ថា៖ «បងប្អូនយើងទាំងអស់គ្នាខ្ញុំនឹងរៀបចំក្រុមការងារមួយចុះទៅធ្វើបច្ចុប្បន្នភាពដោយផ្ទាល់លើលំនៅអចិន្រៃ្តយ៍ដែលកំពុងរស់នៅគ្រប់ៗគ្នា។ ខ្ញុំនឹងឱ្យលោកមេភូមិ លោកមេឃុំ ចុះទៅជាមួយនឹងអាជ្ញាធរដែនដីខេត្ត និងជំនាញនៃមន្ទីរនីមួយៗចុះទៅជាមួយដោយផ្អែកលើលិខិតដែលបានប្រាប់ខ្ញុំថាក្រសួងបានឱ្យថ្នាក់ខេត្តធ្វើការដោះស្រាយ»។
ជាមួយគ្នានេះ លោក ម៉ៅ ធនិន ក៏បានណែនាំដល់បណ្តាមន្ទីរដែលពាក់ព័ន្ធនឹងដីវិវាទនីមួយៗចុះសហការលើការងារនេះ ដើម្បីប្រមូលព័ត៌មានឱ្យបានគ្រប់ជ្រុងជ្រោយ ងាយស្រួលលោកបានជាមូលដ្ឋានក្នុងការដោះស្រាយជូនពលរដ្ឋដែលស្នើសុំចេញប្លង់កាន់កាប់ស្របច្បាប់។
ទោះជាយ៉ាងណាលោកអភិបាលខេត្តបានទទូចដល់ពលរដ្ឋទាំង ៤០០ គ្រួសារនោះឱ្យបញ្ឈប់ការកាប់ទន្ទ្រាន និងវាតទីបន្ថែមទៀតលើដីរបស់រដ្ឋ ហើយបានក្រើនរំឭកថា រាល់ពលរដ្ឋណាដែលបានរំលោភបំពានដោយខុសច្បាប់នឹងទទួលខុសត្រូវចំពោះមុខច្បាប់។
លោក ចយ តំណាងពលរដ្ឋមកពីភូមិព្រៃពាយ ឃុំត្រពាំងភ្លាំង បានសាទរ និងបង្ហាញភាពសប្បាយរីករាយ ហើយបានប្រមូលគ្នាត្រឡប់ទៅវិញ។ ក្រៅពីនោះ លោក ចយ បង្ហាញក្តីសង្ឃឹម និងប្រកាសថា ពួកលោកនឹងទន្ទឹងរង់ចាំដំណោះស្រាយតាមការសន្យារបស់អភិបាលខេត្ត។
លោកបានបញ្ជាក់ថា៖ «បងប្អូនទាំងអស់ យើងត្រឡប់ទៅវិញ គាត់នឹងទៅជួបយើងនៅកន្លែងដី (មានជម្លោះ)។ សង្ឃឹមថា គាត់នឹងទៅជួបយើងនៅកន្លែងដីហ្នឹងមែន។ យើងសាទរគាត់មួយដើម្បីជោគជ័យនៃការរស់នៅរបស់យើងមានសិទ្ធិសេរីភាពទាំងអស់គ្នា»។
លោក យឹម ផល្លី មន្ត្រីសម្របសម្រួលសមាគមការពារសិទ្ធិមនុស្ស (អាដហុក) ប្រចាំខេត្តកំពតបានលើកឡើងថា ប្រសិនបើអភិបាលខេត្តអាចធ្វើបានទៅតាមការសន្យាក្នុងការដោះស្រាយជូនប្រជាពលរដ្ឋលើដីមានទំនាស់ដ៏រ៉ាំរ៉ៃទាំងនេះគឺជាការល្អបំផុត។
បន្ថែមពីនេះ លោកបានចាត់ទុកការដោះស្រាយជូនពលរដ្ឋក្នុងពេលនេះថាជាការចូលរួមចំណែកជួយលើកកម្ពស់ជីវភាពប្រជាពលរដ្ឋឱ្យកាន់តែប្រសើរ ខណៈពលរដ្ឋភាគច្រើនដែលបានរស់នៅអាស្រ័យផលលើដីដែលគ្រប់គ្រងដោយក្រសួងបរិស្ថាន គម្របព្រៃ ឬប៉ះពាល់ជាមួយក្រុមហ៊ុនឯកជននៅមិនទាន់មានសិទ្ធិស្របច្បាប់។
យ៉ាងណាលោក យឹម ផល្លី បានបញ្ជាក់ទៀតថា៖ «ប្រសិនបើការធ្វើបច្ចុប្បន្នភាពឱ្យពលរដ្ឋគ្រប់ជ្រុងជ្រោយហើយសមត្ថកិច្ចរកឃើញជនខិលខូចដែលទៅបំពាន ឬអ្នកដែលនៅពីក្រោយខ្នងផ្សេងៗមួយចំនួនហ្នឹងគួរតែមានការផ្តន្ទាទោសតាមច្បាប់ទៅ។ ការធ្វើដូច្នេះគឺដើម្បីកុំឱ្យជនមួយចំនួនផ្សេងទៀតនោះចេះតែបំពាន និងបង្កើតវិវាទតទៅទៀត»៕
វីដេអូ៖