.jpg)
ក្រុមស្ត្រីមេកន្ទុយលេខ ដែលត្រូវបាននគរបាលស្រុកកំរៀងចាប់ឃាត់ខ្លួន។ រូបថត ប៉ូលិស
បាត់ដំបងៈ នគរបាលស្រុកកំរៀង គ្រោងនឹងបញ្ជូនស្ត្រីសង្ស័យដែលជាមេកន្ទុយលេខចំនួន ៧ នាក់ ទៅស្នងការដ្ឋាននគរបាលខេត្តនៅថ្ងៃទី ៣ វិច្ឆិកា បន្ទាប់ពីបានចាប់ឃាត់ខ្លួន នៅឃុំចំនួន ២ ក្នុងស្រុកកំរៀង។
លោក វេត គឹមចត់ អធិការនគរបាលស្រុកកំរៀងឱ្យដឹងនៅថ្ងៃទី ២ វិច្ឆិកាថា ស្ត្រីសង្ស័យទាំងនោះមានឈ្មោះទី១- ប៉ ហ៊ួង អាយុ ៤២ ឆ្នាំ រស់នៅភូមិ អូរអន្លក់ ឃុំ តាសែន ស្រុក កំរៀង ទី២- ឃឹម ភីន អាយុ ៣២ ឆ្នាំ រស់នៅភូមិ អូរអន្លក់ ឃុំតាសែន ស្រុកកំរៀង ទី៣- ស៊ូ ចាន់ណា ភេទស្រី អាយុ ៣៥ ឆ្នាំរស់នៅ ភូមិ អូរអន្លក់ ឃុំតាសែន ស្រុក កំរៀងទី៤- សន់ ឃុន ណា រី អាយុ ៣០ ឆ្នាំ រស់នៅភូមិ ដីក្រហម ឃុំ តា សែន ស្រុក កំរៀងទី៥- សែម ស្រីមុំ អាយុ ៣៣ ឆ្នាំ រស់នៅភូមិដីក្រហម ឃុំតាសែន ស្រុកកំរៀង ទី៦- ស៊ូត ព្រេស៊ីល អាយុ ១៨ ឆ្នាំរស់នៅភូមិស្វាយវែង ឃុំកំរៀង ស្រុក កំរៀង និងទី៧- សំ សៀកម៉ី អាយុ ២០ ឆ្នាំ រស់នៅ ភូមិស្វាយវែង ឃុំកំរៀង ស្រុកកំរៀង។
លោកបន្តថា៖ «ពួកគេត្រូវបញ្ជូនទៅខេត្តបន្ត ហើយបើមិនល្ងាចនេះ (ថ្ងៃទី ២ វិច្ឆិកា) ឬថ្ងៃស្អែក (ថ្ងៃទី ៣ វិច្ឆិកា)»។
លោក ឈឿង គឹមសុង នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបាត់ដំបងឱ្យដឹងនៅថ្ងៃទី ២ វិច្ឆិកាថា នីតិវិធីនៅពេលដែលខាងនគរបាលស្រុកបញ្ជូនជនសង្ស័យដល់ការិយាល័យរបស់លោក គឺត្រូវតែធ្វើការសាកសួរបន្ថែមទៀត ដើម្បីបំពេញរបាយការណ៍ពីស្រុក ពីព្រោះពេលនៅនគរបាលមូលដ្ឋានគឺគាត់អត់ឆ្លើយត្រង់ទេ ដល់មកខេត្តទើបគាត់ឆ្លើយ។
លោកបញ្ជាក់ថា៖ «ជួនកាលគាត់ថា មិនមែនមេឆ្នោតគ្រាន់តែអ្នកលេង តែដល់តុលាការគាត់ឆ្លើយថា គាត់ជាមេឆ្នោត។ អ៊ីចឹងយើងនៅផ្ទៀងផ្ទាត់ចម្លើយគាត់ទៀត»៕
