ភ្នំពេញៈ អាជ្ញាធរស្រុកបទុបសាគរ នៅថ្ងៃទី ២ វិច្ឆិកា បំភ្លឺថា មិនមានការកាប់រានដីព្រៃចំរុងស្មាច់នៅចំណុចក្បែរត្រពំាងធំ និងត្រពាំងប្រិយ ជាង ១០០ ហិកតានោះទេ ព្រោះលទ្ធផលការចុះពិនិត្យជាក់ស្តែងឃើញមានការកាប់ទន្ទ្រានដីព្រៃប្រហែល ០.៣ ហិកតា ប៉ុណ្ណោះ ហើយស្ថិតក្នុងតំបន់កាត់ឆ្វៀលទៀតផង។
ការស្រាយបំភ្លឺរបស់អាជ្ញាធរស្រុកបទុមសាគរ ធ្វើឡើងបន្ទាប់ពីសារព័ត៌មាន MY Freedom News បានចុះផ្សាយកាលពីថ្ងៃទី ២ ខែវិច្ឆិកា នោះដែរថា ដីព្រៃចំរុងស្មាច់ ចាប់ពីចំណុចក្បែរត្រពាំងធំ និងត្រពាំងប្រិយ ឃុំអណ្តូងទឹកជាង ១០០ ហិកតា កំពុងរងការកាប់បំផ្លាញពីប្រជាពលរដ្ឋ និងមានឈ្មួញចាំទទួលទិញ ព្រមទាំងមិនមានការហាមឃាត់ពីអាជ្ញាធរនោះទេ។
លោក ហាក់ ឡេង អភិបាលស្រុកបទុមសាគរ ថ្លែងនៅថ្ងៃទី ៣ ខែវិច្ឆិកាថា ការផ្សាយរបស់សារព័ត៌មាននោះ គឺជារឿងហួសហេតុ ដែលនាំឱ្យមហាជនមានការយល់ច្រឡំ។ លោកថា ការកាប់ទន្ទ្រានដីព្រៃនៅចំណុចនេះ អាជ្ញាធរស្រុក ឃុំ និងអង្គភាពពាក់ព័ន្ធ បានចុះស្រាវជ្រាវ និងពិនិត្យមើលជាច្រើនលើកមកហើយ។
លោកបញ្ជាក់ថា៖«អាជ្ញាធរមិនដែលអើតមើលយ៉ាងម៉េច? ងាប់ហើយ អត់មានមើលហ្វេសប៊ុកអាជ្ញាធរទេ អាជ្ញាធរចុះចុះចង់ ១០ ដងជាងហើយនៅកន្លែងហ្នឹង» ។
លិខិតបំភ្លឺរបស់រដ្ឋបាលស្រុកបទុមសាគរចេញថ្ងៃទី ២ ខែវិច្ឆិកា បញ្ជាក់ថា ដីដែលបានកាត់ចេញ គឺនៅក្នុងអនុក្រឹត្យលេខ ៤៦ ចុះថ្ងៃទី ២៤ ខែ មិនា ឆ្នាំ ២០២១ និងអនុក្រឹត្យលេខ ៣០ ចុះថ្ងៃទី ២ ខែ មិនា ឆ្នាំ ២០២១។ ក្រុមការងារដីរដ្ឋថ្នាក់ស្រុកបានធ្វើការផ្សព្វផ្សាយដល់អាជ្ញាធរគ្រប់លំដាប់ថ្នាក់ និងអ្នកពាក់ព័ន្ធ នៅក្នុងអង្គប្រជុំ និងបានលើកឡើងថា ដីដែលកាត់ឆ្វៀលហើយនោះ នៅពេលប្រជាពលរដ្ឋចង់ធ្វើការបញ្ជាក់ដី ផ្ទេរសិទ្ធិអចលនវត្ថុ ដែលមិនទាន់ចុះបញ្ជីនិងចង់អភិវឌ្ឍដី ត្រូវធ្វើលិខិតស្នើសុំទៅគណៈកម្មាធិការគ្រប់គ្រងដីរដ្ឋថ្នាក់ខេត្ត តាមរយៈអាជ្ញាធរគ្រប់លំដាប់ថ្នាក់ ដើម្បីធ្វើការពិនិត្យសម្រេច។
ដោយឡែកនៅថ្ងៃទី ១ ខែវិច្ឆិកា អាជ្ញាធរស្រុក សហការជាមួយរដ្ឋបាលព្រៃឈើអណ្តូងទឹក ចុះពិនិត្យមើលទីតាំងដីនៅចំណុចត្រពាំងធំ និងត្រពាំងប្រិយ។ ជាលទ្ធផលឃើញមានការកាប់ទន្ទ្រានដីព្រៃប្រហែល ០.៣ ហិកតា ក្នុងតំបន់កាត់ឆ្វៀល និងបានពន្យល់ណែនាំដល់អ្នកដែលអះអាងថា ជាម្ចាស់ដី សូមធ្វើលិខិតស្នើសុំទៅគណៈកម្មាធិការដីរដ្ឋថ្នាក់ខេត្តតាមរយៈអាជ្ញាធរឃុំ ស្រុក។
ក្នុងលិខិតរដ្ឋបាលស្រុកសរសេរថា៖ «ករណីរដ្ឋបាលស្រុកបានទទួលការស្នើសុំសហការពីអាជ្ញាធរជំនាញមានសមត្ថកិច្ច ឬរបាយការណ៍ថា មានករណីទន្ទ្រានដីព្រៃ ក្នុងតំបន់ណាក៏ដោយ នោះរដ្ឋបាលស្រុក ឃុំ និងចុះពិនិត្យភ្លាម»។
លិខិតដដែលឱ្យដឹងថា កាលពីថ្ងៃទី ១៥ ខែ កក្កដា ឆ្នាំ ២០២១ លោក សាង ស៊ីណេត អភិបាលរងស្រុកបទុមសាគរ បានដឹកនាំក្រុមការងារ សហការជាមួយរដ្ឋបាលព្រៃឈើអណ្តូងទឹក បានចុះពិនិត្យការទន្ទ្រានដីព្រៃ ព្រមទាំងបានឃាត់ប្រជាពលរដ្ឋចំនួន ៦ នាក់ យកមកធ្វើការណែនាំ និងកិច្ចសន្យាកុំឱ្យមានការកាប់ទន្ទ្រានដីតទៅទៀត។
ក្រៅពីនោះ ក្រុមការងារដីរដ្ឋថ្នាក់ស្រុក បានសហការជាមួយអង្គការសម្ព័ន្ធមិត្តសត្វព្រៃ មន្ត្រីរដ្ឋបាលព្រៃឈើ និងមន្ត្រីបរិស្ថាន ចុះធ្វើការបោះបង្គោលព្រំប្រទល់រវាងតំបន់កាត់ឆ្វៀល និងតំបន់ការពារតាមអនុក្រឹត្យលេខ ៤៦ និងអនុក្រឹត្យលេខ ៣០ បានរួចរាល់ជាច្រើនទីតាំងផងដែរ។
លោក តាំង សុផាន់ណារិទ្ធ នាយផ្នែករដ្ឋបាលព្រៃឈើអណ្តូងទឹក ថ្លែងនៅថ្ងៃទី ៣ ខែវិច្ឆិកាថា តំបន់ដែលមានការកាប់ទន្ទ្រាននោះស្ថិតក្នុងតំបន់កាត់ឆ្វៀល និងតំបន់ដែលមិនកាត់ឆ្វៀល។ តំបន់កាត់ឆ្វៀលពលរដ្ឋត្រូវស្នើសុំគណៈកម្មាធិការគ្រប់គ្រងដីរដ្ឋថ្នាក់ខេត្តតាមរយៈក្រុមការងារស្រុក បើចង់អភិវឌ្ឍដីឬធ្វើអ្វីមួយលើដីនោះ។ ចំណែក តំបន់មិនកាត់ឆ្វៀល ស្ថិតនៅក្រោមការគ្រប់គ្រងរបស់រដ្ឋបាលព្រៃឈើ ហេតុនេះបើសិនពលរដ្ឋចូលកាប់ទន្ទ្រាននោះ នឹងត្រូវប្រឈមមុខនឹងផ្លូវច្បាប់។
លោកបញ្ជាក់ថា មានការកាប់រានមួយចំនួនបានចូលដល់ដី ដែលគ្រប់គ្រង ដោយរដ្ឋបាលព្រៃឈើ ហើយលោកបានកសាងសំណុំរឿងបញ្ជូនទៅតុលាការរួចហើយ។
លោកថ្លែងថា៖«កន្លែងដែលពលរដ្ឋលួចកាប់នៅក្រៅតំបន់កាត់ឆ្វៀលហ្នឹងខ្ញុំបានកសាងសំណុំរឿងបញ្ជូនទៅតុលាការហើយ ចំនួន៥០ហិកតា ដោយឡែកការកាប់រានរប៉េះរប៉ោះនោះ គឺស្ថិតនៅក្នុងតំបន់កាត់ឆ្វៀល ដែលគ្មានការអនុញ្ញាតពីរដ្ឋបាលខេត្ត គាត់លួចទៅកាប់រាន»។
លោក ទូ សាវុធ អភិបាលរងខេត្តកោះកុង ថ្លែងនៅថ្ងៃទី ៣ វិច្ឆិកាថា ចំពោះករណីដែលមានព័ត៌មានផ្សាយថា មានការកាប់ទន្ទ្រានដីនៅចំណុចត្រពាំងធំ និងត្រពាំងប្រិយនេះ លោកមិនទាន់អាចផ្តល់ព័ត៌មានបានទេ ដោយសារតែមិនទាន់បានទទួលរបាយការណ៍ពីក្រុមការងារដែលបានចុះទៅពិនិត្យនៅទីនោះ។
លោកថ្លែងថា៖ «យើងមិនទាន់សន្និដ្ឋានថា មានការកាប់មែន ឬអត់ ហើយការកាប់នោះ តើកាប់លើដីគេហាមឃាត់ ឬមួយក៏កាប់ដីដែលពលរដ្ឋអាស្រ័យផលនោះទេ។ យើងអត់ទាន់ច្បាស់ចំណុចហ្នឹង យើងអត់ហ៊ាននិយាយ»។
លោក អ៊ូ ម៉ឹង ប្រជាពលរដ្ឋនៅឃុំអណ្តូងទឹក បានឱ្យដឹងនៅថ្ងៃទី ២ ខែវិច្ឆិកាថា ដីនៅទីនោះ គឺវាលស្រាប់ ហើយប្រជាពលរដ្ឋបានកាប់ឆ្ការព្រៃខ្លះៗប៉ុណ្ណោះ។ ហេតុនេះ ការកាប់រានរហូតដល់រាប់រយហិកតានោះ គឺមិនមានទេ។
ពាក់ព័ន្ធនឹងការបញ្ជូនសំណុំរឿងដីធ្លីទៅតុលាការនេះ លោក វ៉ៃ ភីរម្យ អ្នកនាំពាក្យអយ្យការអមសាលាដំបូងខេត្តកោះកុង មិនអាចទំនាក់ទំនងសុំការបំភ្លឺបានទេ នៅថ្ងៃទី ៣ ខែវិច្ឆិកា៕