.jpg)
សមត្ថកិច្ចត្រួតពិនិត្យកន្លែងឃាតកម្ម នៅភូមិកោះកី ឃុំកោះស្នែង ស្រុកបុរីអូរស្វាយសែនជ័យ ខេត្តស្ទឹងត្រែង។ រូបថត FB
ស្ទឹងត្រែងៈ នគរបាលព្រហ្មទណ្ឌខេត្តស្ទឹងត្រែង នៅថ្ងៃទី ៣ វិច្ឆិកា កំពុងស្រាវជ្រាវកំណត់អត្តសញ្ញាណជនល្មើស ក្រោយពីបានវាយសម្លាប់បុរសម្នាក់នៅភូមិកោះកី ឃុំកោះស្នែង ស្រុកបុរីអូរស្វាយសែនជ័យ ខេត្តស្ទឹងត្រែង។
លោក វ៉ា សុផាន់ ស្នងការរងទទួលផែនការងារនគរបាលព្រហ្មទណ្ឌនៃស្នងការដ្ឋាននគរបាលខេត្តស្តឺងត្រែងឱ្យ ភ្នំពេញ ប៉ុស្តិ៍ ដឹងនៅរសៀលថ្ងៃទី៣វិច្ឆិកាថា បុរសរងគ្រោះឈ្មោះ ភីម លៀន អាយុ ៥០ ឆ្នាំ មានលំនៅក្នុង ភូមិកោះកី ឃុំកោះស្នែង ស្រុកបុរីអូរស្វាយសែនជ័យ។
លោកបានអះអាងដោយយោងតាមការពិនិត្យពីសំណាក់នគរបាលបច្ចេកទេសវិទ្យាសាស្ត្ររបស់លោកបង្ហាញថា ការស្លាប់របស់ជនរងគ្រោះជាករណីឃាតកម្ម។
លោកប្រាប់ថា៖ «យើងកំពុងស្រាវជ្រាវដើម្បីរកមុខសញ្ញាជនសង្ស័យហើយ»។
លោកបញ្ជាក់ថា ជនរងគ្រោះមានស្លាកស្នាមផុងថ្ងាសហើយនៅផ្នែកខ្នងមានស្នាមជាំដោយជនសង្ស័យប្រើវត្ថុដែលមានមុខទាល។ ចំពោះទ្រព្យសម្បត្តិដែលជនរងគ្រោះបាត់បង់វិញមានម៉ូតូវ៉េវអាល់ហ្វាចាស់ ១ គ្រឿង។
លោក សុផាន់ បញ្ជាក់ថា បើតាមការស៊ើបអង្កេតបឋមលើអង្គហេតុក្នុងសំណុំរឿងនេះ គឺបង្ហាញថា ជនរងគ្រោះអាចត្រូវគេប្លន់សម្លាប់យកម៉ូតូ ព្រោះក្រុមគ្រួសាររបស់ជនរងគ្រោះប្រាប់សមត្ថកិច្ចលោកថា កាលពីថ្ងៃទី ៣១ ខែ តុលា ឆ្នាំ ២០២១ គឺជនរងគ្រោះបានជិះម៉ូតូវ៉េវអាល់ហ្វាចាស់ ១ គ្រឿងចេញពីផ្ទះ។
លោកបានថ្លែងដោយយោងតាមសម្តីក្រុមគ្រួសារជនរងគ្រោះថា ចាប់តាំងពីថ្ងៃទី ៣១ តុលា មកបាត់ជនរងគ្រោះមិនឃើញត្រឡប់ទៅផ្ទះវិញទេ។ លុះដល់ថ្ងៃទី ២ វិច្ឆិកា ក៏ត្រូវបានពលរដ្ឋប្រទះឃើញជនរងគ្រោះស្លាប់នៅក្នុងព្រៃហើយរាយការណ៍ប្រាប់សមត្ថកិច្ចមូលដ្ឋានតែម្តង។ រឿងនេះមុនដំបូងសមត្ថកិច្ចសន្និដ្ឋានថា ជាករណីប្លន់សម្លាប់ទេព្រោះជនរងគ្រោះបាត់ម៉ូតូ។
តែក្រោយមកសមត្ថកិច្ចសន្និដ្ឋានថា ម៉ូតូជនរងគ្រោះចាស់ទោះជាចោរយកទៅលក់ក៏មិនបានដែរ ដូច្នេះការដែលជនសង្ស័យសម្លាប់ជនរងគ្រោះអាចជារឿងគំនុំច្រើនជាង។ ប៉ុន្តែដោយសារជនល្មើសចង់បង្វែងដានឬបង្វែរបទល្មើសក៏ធ្វើបែបនេះ៕
