បន្ទាយមានជ័យៈ យ៉ាងហោចណាស់មានពលករខ្មែរ ៤ នាក់ស្លាប់ និង ៨ នាក់ទៀតរងរបួស ក្នុងគ្រោះថ្នាក់ចរាចរណ៍ក្រឡាប់រថយន្តនៅស្រុក Wang Sombun ខេត្ត Sa Keao ប្រទេសថៃ កាលពីយប់ថ្ងៃទី ០២ វិច្ឆិកា ឆ្នាំ ២០២១។
លោក យ៉ាល់ ប៊ុនពៅ មន្ត្រីទំនាក់ទំនង កិច្ចការព្រំដែនកម្ពុជា-ថៃ ប្រចាំភូមិភាគខេត្តបន្ទាយមានជ័យ បានប្រាប់ភ្នំពេញប៉ុស្តិ៍ ថា អាជ្ញាធរថៃ ប្រចាំខេត្តស្រះកែវ នៅព្រឹកថ្ងៃទី ០៣ វិច្ឆិកា បានផ្ដល់របាយការណ៍ព័ត៌មានបឋមមួយ មកអង្គភាពរបស់លោកថា នៅវេលាម៉ោង ៨: ៥០ នាទីយប់ ថ្ងៃទី ០២ វិច្ឆិកា មានរថយន្តដឹកពលករបរទេស ឆ្លងដែនខុសច្បាប់មួយគ្រឿងពីកម្ពុជា បានជួបគ្រោះថ្នាក់ចរាចរណ៍ក្រឡាប់ជាច្រើនត្រឡប់ នៅចំណុចផ្លូវបំបែករង្វង់មូលបានកុងយ៉ៃអ៊ីន ស្ថិតក្នុងភូមិ៣ ឃុំ Wang Thung ស្រុកWang Sombun បណ្ដាលឲ្យមនុស្ស៥នាក់ស្លាប់ នៅនឹងកន្លែង និង ៨ នាក់ទៀតរងរបួសធ្ងន់ និងស្រាល។
លោក ប៊ុនពៅ ថ្លែងថា៖ «ក្នុងរបាយការណ៍បឋម ដែលអាជ្ញាធរថៃ បានបញ្ជូនមកនោះ បានបញ្ជាក់ថា ក្នុងចំណោមជនរងគ្រោះទាំងអស់ មានតែម្នាក់ប៉ុណ្ណោះ ជាជនជាតិថៃ គឺជាអ្នកបើកបរបានស្លាប់ នៅនឹងកន្លែងកើតហេតុ ក្រៅពីនោះគឺជាជនជាតិខ្មែរ»។
លោកបានបញ្ជាក់ថា៖ «តាមរយៈរបាយការណ៍នោះ អាជ្ញាធរថៃ បានសម្រេចបូជាសពជនរងគ្រោះទាំង៥នាក់នោះ នៅថ្ងៃទី ០៣ ខែវិច្ឆិកា បន្ទាប់ពីរកឃើញវិជ្ជមានជំងឺកូវីដ ១៩ លើពពលករខ្មែរយើងម្នាក់។ ចំណែកជនរងគ្រោះទាំង ៨ នាក់ ត្រូវបានក្រុមជួយសង្គ្រោះបញ្ជូនទៅកាន់ មន្ទីរពេទ្យ Somdej Phra Yupparat ក្នុងខេត្ត Sa Kaeo ដើម្បីពិនិត្យនិងព្យាបាលរបួស»។
នៅក្នុងរបាយការណ៍ព័ត៌មានបឋមនោះ អាជ្ញាធរថៃ មិនបានបញ្ជាក់អំពីអត្តសញ្ញាណនៃជនរងគ្រោះនោះទេ ប៉ុន្តែបានបញ្ជាក់ពីមូលហេតុនៃគ្រោះថ្នាក់ចរាចណ៍នោះថា បណ្ដាលមកពីរថយន្តបែកកង់ និងបើកបរក្នុងល្បឿនលឿន ខ្វះការប្រុងប្រយ័ត្ន។
ជុំវិញករណីនេះផងដែរ បណ្ដាញសារព័ត៌មានក្នុងប្រទេសថៃ បានរាយការណ៍ថា ពលករបរទេស [ខ្មែរ] រងគ្រោះទាំងនោះ បានធ្វើដំណើរពីស្រុកបាណន់ ខេត្តបាត់ដំបង តាមរយៈមេខ្យល់ជាជនជាតិខ្មែរម្នាក់ ដែលមានទំនាក់ទំនងជាមួយអ្នកបើកបររថយន្តជនជាតិថៃឈ្មោះ Pravit Chansawang អាយុ៣៩ឆ្នាំនៅខេត្ត Chhayaphum ដែលបានស្លាប់នៅក្នុងហេតុការណ៍គ្រោះថ្នាក់ចរាចរណ៍នេះ។
បណ្ដាញសារព័ត៌មានថៃទាំងនោះ បានអះអាងថា ពលករខ្មែរម្នាក់ ក្នុងចំណោម ៨ នាក់ ដែលរងរបួសនោះ បាននិយាយថា ពួកគេបានលួចឆ្លងដែនដោយខុសច្បាប់ ចូលមកក្នុងប្រទេសថៃ តាមរយៈមេខ្យល់ម្នាក់ជាជនជាតិខ្មែរ ដើម្បីទៅធ្វើការនៅខេត្ត Chachoengsao, ខេត្ត Chonburi, ខេត្ត Rayong និង ក្នុងទីក្រុង Bangkok។ ករណីនេះ អាជ្ញាធរខេត្តស្រះកែវ កំពុងបន្តធ្វើការស្រាវជ្រាវបន្ត។
ក្រុមការងារអគ្គកុងស៊ុលខ្មែរប្រចាំខេត្ត Sakeao ប្រទេសថៃ មិនអាចទាក់ទងស្នើសុំការអត្ថាធិប្បាយបានទេនៅល្ងាចថ្ងៃទី ០៣ ខែវិច្ឆិកា៕