ភ្នំពេញៈលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានស្នើឲ្យក្រសួងប្រៃសណីយ៍ និងទូរគមនាគមន៍ផ្ដល់សេវាអ៊ីនធឺណិតតាមខ្សែកាប ដើម្បីតភ្ជាប់ឧបករណ៍ត្រួតពិនិត្យល្បឿនអចល័តចំនួន ២០ គ្រឿងនៅលើទីតាំងចំនួន ១០ ស្ថិតនៅតាមបណ្ដោយផ្លូវជាតិលេខ ៣ ចាប់ពីរង្វង់មូលចោមចៅដល់ក្រុងកំពត។
យោងតាមលិខិតជម្រាបជូន លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ចុះថ្ងៃទី ២៦ ខែ តុលា ឆ្នាំ២០២១ ដែលភ្នំពេញប៉ុស្តិ៍ទទួលបាននៅថ្ងៃទី ៣ ខែ វិច្ឆិកា ឆ្នាំ ២០២១ លោក ស ខេង បានបញ្ជាក់ថា ដើម្បីរួមចំណែកកាត់បន្ថយគ្រោះថ្នាក់ចរាចរណ៍ផ្លូវគោកដែលបង្កដោយការបើកបរល្មើសល្បឿនកំណត់ អគ្គស្នងការដ្ឋាននគរបាលជាតិសហការជាមួយក្រសួងសាធារណការ និងដឹកជញ្ជូនកំពុងបំពាក់ឧបករណ៍ត្រួតពិនិត្យល្បឿនអចល័តចំនួន ២០ គ្រឿង លើ ១០ ទីតាំង តាមបណ្តោយផ្លូវជាតិលេខ ៣ ចាប់ពីរង្វង់មូលចោមចៅ ដល់ក្រុងកំពត ដែលស្ថិតនៅចំណុចគីឡូម៉ែត្ រ១៨ គីឡូម៉ែត្រ៣៣ គីឡូម៉ែត្រ ៤៣ គីឡូម៉ែត្រ ៧៤ គីឡូម៉ែត្រ ៨៦ គីឡូម៉ែត្រ ១០២ គីឡូម៉ែត្រ ១០៩ គីឡូម៉ែត្រ ១៣៤ គីឡូម៉ែត្រ ១៥១ និងគីឡូម៉ែត្រ ១៦។
លោកបានបញ្ជាក់ថា៖ «ឧបករណ៍ត្រួតពិនិត្យល្បឿនអចល័តទាំងនេះ ត្រូវការជាចាំបាច់នូវសេវា INTERNET ដើម្បីធ្វើការបញ្ជូនរូបភាពយានយន្តល្មើសដែលថតបាននៅតាមទីតាំងនីមួយៗមកកាន់មជ្ឈមណ្ឌលបញ្ហាតាំងនៅអគ្គស្នងការដ្ឋាននគរបាលជាតិ ដើម្បីចាត់ការបន្តតាមនីតិវិធីច្បាប់»។
យោងតាមរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក ដែលបានចេញផ្សាយកាលពីពេលថ្មីៗនេះ បានបង្ហាញថា គ្រោះថ្នាក់ចរាចរណ៍ទូទាំងប្រទេសក្នុងខែតុលាឆ្នាំ ២០២១ នេះ បានកើតឡើងចំនួន ២៤៣ លើក បើធៀបទៅនឹងខែកញ្ញា មានការកើនឡើងចំនួន ២៣ លើកស្មើនឹង ១០ ភាគរយ។ស្រដៀងគ្នានេះចំនួនអ្នករងរបួសមានចំនួន៣៤០នាក់កើនឡើងជាងខែកញ្ញាចំនួន ៦៦ នាក់ ស្មើនឹង ២៤ ភាគរយ និងអ្នកស្លាប់មានចំនួន ១៤០ នាក់ កើនឡើងជាងខែកញ្ញាចំនួន២១នាក់ស្មើនឹង ១៨ ភាគរយ។
ក្នុងរបាយការណ៍នោះ មន្ត្រីនគរបាលជំនាញផ្នែកប្រតិបត្តិបានកត់សម្គាល់ថា កំណើនគ្រោះថ្នាក់ចរាចរណ៍ កំណើនអ្នករងរបួសនិងអ្នកស្លាប់នាខែតុលា កន្លងមកនេះ គឺដោយសារកំណើនសម្ទុះធ្វើចរាចរណ៍ឡើងវិញ បន្ទាប់ពីសភាពធូរស្រាលនៃជំងឺកូវីដ ១៩ ហើយមូលហេតុកំណើនគ្រោះថ្នាក់ស្លាប់និងរបួសនេះ គឺបណ្តាលមកពីការបើកបរលឿនមានចំនួន ៣៨ ភាគរយ ការមិនគោរពសិទ្ធិ មានចំនួន ២៧ ភាគរយ ការមិនប្រកាន់ស្តាំមានចំនួន ១៦ ភាគរយ ជាមួយការបត់ ការជែងនិងការបើកបរក្នុងស្ថានភាពស្រវឹង។
ទោះជាយ៉ាងណាក៏ដោយ អត្រាគ្រោះថ្នាក់ចរាចរណ៍ក្នុងខែតុលា ឆ្នាំ ២០២១ នេះ បើប្រៀបធៀបទៅនឹងខែតុលា ឆ្នាំ ២០២០ គឺមានការថយចុះតិចតួច ប៉ុន្តែចំនួនអ្នកស្លាប់បានកើនឡើង ២៩ នាក់ស្មើនឹង ២៦ ភាគរយ៕