មណ្ឌលគិរីៈ ក្រុមការងារជំនាញក្រសួងបរិស្ថាន បានបញ្ចប់បេសកកម្មចុះពិនិត្យផ្ទៃដីជាង ១ ម៉ឺនហិកតា នៅខេត្តមណ្ឌលគិរី ប៉ុន្តែនៅសិក្សាផ្នែកបច្ចេកទេសបន្តទៀត មុននឹងជូនរដ្ឋមន្ត្រីក្រសួងបរិស្ថានពិនិត្យ និងសម្រេចចុះបញ្ជីលក្ខណៈជាប្រព័ន្ធជូនពលរដ្ឋដែលកំពុងរស់នៅអាស្រ័យផលឱ្យមានសិទ្ធិកាន់កាប់ស្របច្បាប់។
កាលពីថ្ងៃទី ១៤ តុលា ក្រសួងបរិស្ថានបានចាត់ឱ្យលោក សូខន ឫទ្ធីគុណ រដ្ឋលេខាធិការក្រសួងបរិស្ថានដឹកនាំក្រុមការងារជំនាញចុះពិនិត្យសំណើទាំង ៦ ចំណុចរបស់រដ្ឋបាលខេត្តនេះ ដែលមានផ្ទៃដីសរុបជាង ១ ម៉ឺនហិកតាចាប់ពីថ្ងៃទី ១៨ ដល់ថ្ងៃទី ២២ ខែតុលា។
លោក នេត្រ ភក្ត្រា អ្នកនាំពាក្យក្រសួងបរិស្ថានបានប្រាប់ ភ្នំពេញ ប៉ុស្តិ៍ នៅថ្ងៃទី ២ វិច្ឆិកាថា ក្រុមការងារបរិស្ថានបានចុះអនុវត្តការងារតាមផែនការរួចហើយ ដោយបានពិនិត្យ និងប្រមូលព័ត៌មានមួយចំនួនលើផ្ទៃដីទាំងនេះដើម្បីពិនិត្យជាលក្ខណៈបច្ចេកទេសបន្ថែមទៀត។
លោកបានបន្តថា៖ «ក្រោយពីនេះក្រុមការងារបានពិនិត្យចប់សព្វគ្រប់នឹងដាក់របាយការណ៍ទាំងនេះទៅរដ្ឋមន្ត្រីក្រសួងបរិស្ថាន ដើម្បីសម្រេចតាមសំណើរបស់រដ្ឋបាលខេត្តមណ្ឌលគិរីដែលបានស្នើមកក្រសួង»។
តាមលិខិតបេសកកម្មរបស់ក្រសួងបរិស្ថានបានឱ្យដឹងថាទីតាំងដីទាំង ៥ ទីតាំងនេះ គឺមានករណីផ្ទៃដីទំហំ ៦០០ ហិកតាដោះស្រាយផលប៉ះពាល់ជូនប្រជាពលរដ្ឋពីគម្រោងអាកាសយានដ្ឋាន ករណីផ្ទៃដីទំហំ ១ ៧៨៩,៤៨ ហិកតា ភូមិពូឆប ឃុំដាក់ដាំ ស្រុកអូររាំង។
ចំណែកករណីផ្ទៃដីទំហំ ៥ ០៧៥,៤៩ ហិកតា នៅភូមិពូលូង ឃុំរមនា ក្រុងសែនមនោរម្យ ករណីផ្ទៃដីទំហំ ៥៦៩៦,៥០ ហិកតា នៅភូមិពូហ្សាម ឃុំសែនមនោរម្យ ស្រុកអូរាំង និងករណីទីតាំងកាត់ឆ្វៀលដីចំនួន ៤ ប្លង់ស្ថិតក្នុងភូមិពូក្រូច ឃុំស្រែអំពូម ស្រុកពេជ្រាដា ខេត្តមណ្ឌលគិរី។ នេះបើយោងតាមលិខិតខាងលើ។
លោក ស៊ន សារុន អ្នកនាំពាក្យសាលាខេត្តមណ្ឌលគិរីបានប្រាប់ ភ្នំពេញ ប៉ុស្តិ៍ នៅថ្ងៃទី ២ វិច្ឆិកាថា ការចុះរបស់មន្ត្រីក្រសួងបរិស្ថាន គឺធ្វើឡើងតាមរយៈរដ្ឋបាលខេត្ត ហើយក៏បានបំពេញបេសកកម្មចប់រួចរាល់លើទីតាំងដីដែលបានស្នើចុះមកពិនិត្យរួចរាល់ផងដែរ។
សម្រាប់កិច្ចការបន្តរបស់រដ្ឋបាលខេត្ត លោក ស៊ន សារុន បានអះអាងថា ថ្នាក់ខេត្តនៅតែរង់ចាំលទ្ធផលដែលសម្រេចពីក្រសួងបរិស្ថាន ដើម្បីបន្តកិច្ចការតាមនីតិវិធីរដ្ឋបាលតែប៉ុណ្ណោះ ដោយលោកអះអាងថា បើមានការសម្រេចក្នុងកម្រិតណាមួយ រដ្ឋបាលខេត្តនឹងអនុវត្តក្នុងកម្រិតនោះ ហើយបន្តអនុវត្តតាមនីតិវិធីនៃការចង្អុលបង្ហាញនៅចំពោះមុខដែលក្រសួងបរិស្ថានបានដាក់ចេញ។
លោកបានបញ្ជាក់ថា៖ «យើងមិនទាន់ថា ការសម្រេចរបស់គាត់ជាក់លាក់ មិនជាក់លាក់កម្រិតណា ព្រោះស្ថិតក្នុងដែនសមត្ថកិច្ចរបស់គាត់។ ប៉ុន្តែដោយសារតែយើងយល់ថា ការងារនេះគឺបម្រើឱ្យផលប្រយោជន៍រួមបានយើងស្នើឡើងទៅ ជាពិសេសសម្រាប់ប្រជាពលរដ្ឋដែលគាត់មានវិសាលភាពធំជាង»។
សូមជម្រាបថា ការកាត់ផ្ទៃដីជាង ១ ម៉ឺនហិកតានេះ គឺក្រៅពីស្នើឱ្យក្រសួងចុះមកពិនិត្យវាយតម្លៃដើម្បីសម្រេចក៏មានតំបន់ខ្លះត្រូវស្នើទៅក្រសួងពាក់ព័ន្ធដទៃទៀតដើម្បីចុះសិក្សាជាក់ស្តែងផងដែរ ព្រោះតំបន់មួយចំនួនស្ថិតក្រោមដែនសមត្ថកិច្ចខុសៗគ្នា។ នេះបើតាមការអះអាងរបស់លោក ស៊ន សារុន៕