ភ្នំពេញៈ និស្សិតខ្មែរ ៤ រូប ទទួលបានអាហារូបករណ៍សិក្សារយៈពេល ៥ ឆ្នាំលើមុខវិជ្ជាមេកានិចយន្តហោះ នៅប្រទេសរុស្ស៊ី ហើយគ្រោងនឹងធ្វើដំណើរទៅបន្តការសិក្សានៅចុងឆ្នាំនេះ ខណៈលេខាធិការដ្ឋានអាកាសចរស៊ីវិលសម្លឹងឃើញថា ពួកគេ គឺជាធនធានកម្រក្នុងការចូលរួមអភិវឌ្ឍវិស័យអាកាសចរណ៍នៅកម្ពុជា ដែលកំពុងខ្វះខាត។
កាលពីថ្ងៃទី ២ វិច្ឆិកា លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល បានជួបពិភាក្សាជាមួយតំណាងសមាគមនិស្សិតខ្មែរប្រចាំប្រទេសរុស្ស៊ី និងនិស្សិតទាំង ៤ រូប ដែលទើបបានទទួលអាហារូបករណ៍លើមុខវិជ្ជាមេកានិចយន្តហោះ (សំដៅលើតួ និងម៉ាស៊ីនយន្តហោះ)។
លោក ម៉ៅ ហាវណ្ណាល់ បានចែករំលែកបទពិសោធ និងធ្វើការណែនាំដល់និស្សិតទាំងអស់ឱ្យខិតខំសិក្សា សង្វាតរៀនសូត្រ និងក្រេបជញ្ជក់នូវចំណេះវិជ្ជាក្នុងវិស័យអាកាសចរស៊ីវិលនេះ ជាពិសេសចាប់ឱ្យបាននូវបច្ចេកវិទ្យាថ្មីៗដែលទើបតែរកឃើញ ក៏ដូចជាការខិតខំរៀនភាសាអង់គ្លេស ដែលជាភាសាទី ២ ឱ្យបានស្ទាត់ជំនាញ។
លោកក៏បានណែនាំដែរថា នៅពេលបញ្ចប់ការសិក្សាបរិញ្ញាបត្រផ្នែកមេកានិចយន្តហោះនេះ ដើម្បីធ្វើការជាមួយក្រុមហ៊ុនអាកាសចរណ៍ ឬជាមួយរដ្ឋបាននិស្សិតទាំងអស់ត្រូវសិក្សាបន្ថែមយក Type Rating។ ឧទាហរណ៍ប្រសិនបើគាត់ធ្វើការជាមួយក្រុមហ៊ុនដែលប្រើប្រាស់យន្តហោះ Boeing គាត់ត្រូវរៀនយក Type Rating របស់ Boeing។ «បច្ចុប្បន្ននេះរដ្ឋយើងក៏ត្រូវការអ្នកជំនាញទាំងអស់នោះមកធ្វើការឱ្យរដ្ឋផងដែរ ព្រមទាំងបង្កលក្ខណៈងាយស្រួលឱ្យគាត់ឆ្លៀតពេលធ្វើការ នៅក្រុមហ៊ុនអាកាសចរណ៍នានា តាមលទ្ធភាព»។
លោក ស៊ិន ចាន់សេរីវុត្ថា អ្នកនាំពាក្យលេខាធិការដ្ឋានអាកាសចរស៊ីវិលប្រាប់ ភ្នំពេញ ប៉ុស្តិ៍ នៅថ្ងៃទី ៣ វិច្ឆិកាថា តាមគម្រោងនិស្សិតខ្មែរ ៣ រូបនឹងចេញទៅបន្តការសិក្សានៅរុស្ស៊ី នៅចុងឆ្នាំនេះ ហើយនិស្សិត ១ រូបទៀតនឹងចេញទៅ នៅឆ្នាំបន្ទាប់។
លោកថា៖ «ជាការពិតណាស់ អាហារូបករណ៍នេះគឺឆ្លងកាត់ការប្រកួតប្រជែង និងការប្រឡងប្រណាំង អ៊ីចឹងសិស្សនិស្សិតដែលបានជាប់នេះគឺសុទ្ធសឹងជ្រើសចេញពីសាលាពហុបច្ចេកវិទ្យាទាំងអស់ ដែលពួកគាត់មានជំនាញជាមូលដ្ឋានផ្នែកមេកានិចនេះ។ ម្យ៉ាងទៀត ពួកគាត់ មានលក្ខណសម្បត្តិល្អ ទាំងកាយសម្បទា និងបញ្ញា»។
លោកបន្តថា៖ «កន្លងមកយើងខ្វះធនធានមនុស្សដែលមានជំនាញក្នុងផ្នែកមេកានិចយន្តហោះនេះ។ កន្លងមក យើងមានកម្រិតត្រឹមបរិញ្ញាបត្ររង និងបរិញ្ញាបត្រតិចតួចដូច្នេះពួកគាត់នេះ បើបញ្ចប់ការសិក្សាមកយើងសង្ឃឹមថា មកវិញយើងនឹងអាចទទួលយកគាត់ មកបម្រើការងារក្នុងវិស័យយើង នាពេលអនាគត»។
លោក ណោង រិទ្ធី ប្រធានសមាគមនិស្សិតខ្មែរប្រចាំសហព័ន្ធរុស្ស៊ីបានប្រាប់ភ្នំពេញ ប៉ុស្តិ៍នៅថ្ងៃទី ៣ វិច្ឆិកាថា ការទទួលបានអាហារូបករណ៍របស់និស្សិតខ្មែរ ទៅសិក្សានៅប្រទេសរុស្ស៊ី គឺបញ្ជាក់ពីការខិតខំប្រឹងប្រែងរបស់សមាគមនិស្សិតខ្មែរ និងស្ថាប័នពាក់ព័ន្ធជាពិសេសនិស្សិតខ្លួនឯងផ្ទាល់។
ដោយសារតែជំនាញនេះ គឺកំពុងមានការខ្វះខាតនៅក្នុងប្រទេស លោកក៏រំពឹងដែរថាពួកគេអាចនឹងពាំនាំបច្ចេកវិទ្យា និងបច្ចេកទេសទំនើបមកបម្រើដល់ប្រទេសជាតិវិញ និងជំរុញឱ្យវិស័យនេះឱ្យមានការរីកចម្រើនបន្ថែមទៀត។ លោកថា៖ «គាត់នឹងអាចយកបទពិសោធបច្ចេកទេសពីប្រទេសមហាអំណាចទាំងបច្ចេកវិទ្យា យោធា និងនយោបាយមកអភិវឌ្ឍប្រទេសកម្ពុជាដែលកំពុងត្រូវការធនធានមនុស្សទាំងអស់នេះ»៕