ភ្នំពេញៈ លោក កឹម សុខា អតីតប្រធានអតីតគណបក្សសង្គ្រោះជាតិដែលត្រូវបានតុលាការចោទប្រកាន់ពីបទ «ក្បត់ជាតិ» ហើយមិនទាន់ត្រូវបានបើកសវនាការជំនុំជម្រះលើអង្គសេចក្តីនៅឡើយ បានដាក់ប្រកាសលក់ផ្ទះដែលលោកកំពុងរស់នៅក្នុងខណ្ឌទួលគោក តាមរយៈក្រុមហ៊ុនឯកជនក្នុងតម្លៃ ២,៤ លានដុល្លារអាមេរិក។
លោក ឡុង គឹមសួគ៌ អគ្គនាយកក្រុមហ៊ុន Century 21 Advanced Propperty ប្រាប់ ភ្នំពេញ ប៉ុស្តិ៍ នៅថ្ងៃទី ២ វិច្ឆិកាថា ក្រុមហ៊ុនរបស់លោកជាអ្នកទទួលយកផ្ទះរបស់លោក កឹម សុខា ប្រភេទវីឡា មកដាក់លក់ក្នុងតម្លៃដែលលោក កឹម សុខា ចង់បានចំនួន ២ លាន ៤ សែនដុល្លារអាមេរិក។
លោកថ្លែងថា៖ «ម្ចាស់ទ្រព្យចង់ដាក់លក់តាមរយៈក្រុមហ៊ុនរបស់យើង។ យើងនឹងដាក់លក់ឱ្យគាត់ ព្រោះក្រុមហ៊ុនរបស់ខ្ញុំជាអ្នកផ្តល់សេវា ផ្នែកទិញ-លក់ ហើយគាត់មានទ្រព្យចង់ដាក់លក់ក៏គ្មានអ្វីខុសដែរ»។
លោក កឹម សុខា មិនបាននិយាយអ្វីក្រៅពីការដាក់លក់ទ្រព្យរបស់គាត់នោះទេ ពោលគឺ និយាយតែរឿងការងារលក់ផ្ទះប៉ុណ្ណោះ។ ម្យ៉ាងក្រុមហ៊ុនរបស់លោកបានចាត់ទុកលោក កឹម សុខា ដូចទៅនឹងអតិថិជនទូទៅដែរ មិនមានអ្វីប្លែកនោះទេ។
លោកបញ្ជាក់ថា៖ «ម្ចាស់ទ្រព្យបានឯកភាពឱ្យយើងផ្សព្វផ្សាយលក់ត្រឹមត្រូវ គាត់គោរពតាមលក្ខខណ្ឌរបស់យើង ព្រោះយើងត្រូវការភាពស្របច្បាប់ គាត់មានឯកសារត្រឹមត្រូវ គាត់អនុញ្ញាតឱ្យមានការផ្សព្វផ្សាយលក់ជាទូទៅ តាមតម្លៃដែលគាត់ចង់បាន»។
បើតាមលោក កឹម សួគ៌ រឿងដែលល្បី គឺមិនមែនដោយសារក្រុមហ៊ុនរបស់លោកទទួលយកផ្ទះលោក កឹម សុខា មកលក់នោះទេ ប៉ុន្តែអ្វីដែលល្បីក្នុងនាមលោក កឹម សុខា ជាអ្នកនយោបាយដែលលេចធ្លោ ១ រូបនៅក្នុងប្រទេសកម្ពុជា ហើយប្រជាពលរដ្ឋខ្មែរភាគច្រើន គឺចង់តាមដានព័ត៌មានពីរូបលោកថា លក់ទ្រព្យនេះយកលុយទៅធ្វើអ្វីឱ្យប្រាកដ។
ទោះជាយ៉ាងណាលោកថាផ្ទះរបស់លោក កឹម សុខា ដែលដាក់លក់ក្នុងតម្លៃជាង ២ លានដុល្លារនេះ គឺជាការដាក់លក់ក្នុងតម្លៃថ្លៃ ហើយពិបាកក្នុងការលក់-ចេញ ព្រោះពេលនេះជាពេលវេលាដែលជំងឺកូវីដ ១៩ មិនទាន់ផុតរលត់ពីផែនដី។ លោកពិតជាមានមោទនភាព ដែលក្រុមហ៊ុនរបស់លោកបានជួយលក់ទ្រព្យឱ្យមនុស្សល្បីៗ នៅក្នុងប្រទេសកម្ពុជា ដូចលោក កឹម សុខា នេះ។ ប៉ុន្តែកន្លងមកនេះក្រុមហ៊ុនរបស់លោកក៏ធ្លាប់បានជួយលក់ទ្រព្យឱ្យមនុស្សល្បីៗជាច្រើនរូបផងដែរ ដូចជា អ្នកសិល្បៈ និងអ្នកធំៗជាច្រើនផ្សេងទៀត ព្រោះក្រុមហ៊ុនរបស់លោកប្រកាន់ភាពស្មោះត្រង់ និងវិជ្ជាជីវៈ ធ្វើឱ្យអតិថិជន តែងតែមករកក្រុមហ៊ុនរបស់លោក ដើម្បីឱ្យជួយលក់ទ្រព្យរបស់ពួកគេ។
សហមេធាវីការពារក្ដីលោក កឹម សុខា គឺលោក ចាន់ ចេន ថ្លែងយ៉ាងខ្លីថា លោកមិនបានទទួលព័ត៌មានអំពីរឿងដែលលោក កឹម សុខា សម្រេចចិត្តដាក់លក់ផ្ទះរបស់លោកនោះទេ។
លោក គិន ភា ប្រធានផ្នែកទំនាក់ទំនងអន្តរជាតិនៃរាជបណ្ឌិត្យសភាកម្ពុជាយល់ឃើញថា លោក កឹម សុខា មិនមែនធ្លាក់ខ្លួនក្ររហូតដល់ថ្នាក់លក់ផ្ទះនោះទេ។ ប៉ុន្តែ ប្រហែលវាជាយុទ្ធសាស្ត្រនយោបាយរបស់មេបក្សអតីតគណបក្សប្រឆាំងរូបនេះក្នុងការទាក់ទាញចំណាប់អារម្មណ៍ និងការអាណិតអាសូរពីអ្នកដែលធ្លាប់គាំទ្រគាត់។
លោកថ្លែងថា៖ «ខ្ញុំមើលទៅ វាមិនមែនជាបញ្ហាសេដ្ឋកិច្ចទេ តែវាជាបញ្ហាល្បែងនយោបាយរបស់គាត់ច្រើនជាង ព្រោះថាគាត់មិនមែនជាអ្នកដែលត្រូវធ្វើនយោបាយ ហើយចំណាយធនធានក្នុងការបម្រើនយោបាយដែរ ព្រោះគាត់ជាជនត្រូវចោទហើយមានបម្រាមធ្វើនយោបាយទៀត»។
យោងតាមទំព័រហ្វេសប៊ុកក្រុមហ៊ុន «Century 21 Advanced Property For Sale» កាលថ្ងៃទី ២៤ ខែតុលា ឆ្នាំ ២០២១ បានផ្សព្វផ្សាយដាក់រូបផ្ទះរបស់លោក កឹម សុខា ជាប្រភេទ វីឡា ស្ថិតនៅខណ្ឌទួលគោក រាជធានីភ្នំពេញ។ ផ្ទះនេះលក់ក្នុងតម្លៃជាង ២ លាន ៤ សែនដុល្លារអាមេរិក ដោយបូកសរុបទាំងថ្លៃសេវាកម្ម និងផ្ទេរកម្មសិទ្ធិប្លង់រឹង ជូនអតិថិជនដែលទិញផងដែរ។ ប៉ុន្តែអាចចរចាបញ្ចុះតម្លៃបានខ្លះ។ ជាមួយគ្នានេះអតិថិជនក៏អាចជ្រើសរើសវិធីបង់រំលស់ តាមធនាគារបានក្នុងរយៈពេល ២០ ឆ្នាំដោយតម្រូវឱ្យបង់ ៣០ ភាគរយនៃតម្លៃផ្ទះជាមុន។
លោក កឹម សុខា ត្រូវបានសាលាដំបូងរាជធានីភ្នំពេញសម្រេចដោះលែងឱ្យនៅក្រៅឃុំ ប៉ុន្តែបានដាក់ឱ្យស្ថិតនៅក្រោមការត្រួតពិនិត្យរបស់តុលាការ ខណៈការជំនុំជម្រះលើអង្គសេចក្តីនៃសំណុំរឿងរបស់លោកនៅមិនទាន់បានបើកសវនាការនៅឡើយ ចាប់តាំងពីលោកត្រូវបានឃាត់ខ្លួនកាលពីដើមខែកញ្ញា ឆ្នាំ ២០១៧ ក្រោមការចោទប្រកាន់ពីបទ «ក្បត់ជាតិ»៕
វីដេអូ៖