ភ្នំពេញៈ សមត្ថកិច្ចបានកសាងសំណុំរឿង និងបញ្ជូនជនសង្ស័យជាជនជាតិខ្មែរម្នាក់ និងជនជាតិរៀតណាមម្នាក់ទៅសាលាដំបូងរាជធានីភ្នំពេញនៅល្ងាចថ្ងៃទី ៣ វិច្ឆិកា ពាក់ព័ន្ធនឹងករណីកែច្នៃ និងជួញដូរគ្រឿងញៀនចំនួន ៥៩ គីឡូក្រាម ស្ថិតនៅសង្កាត់បឹងកេងកង១។
លោក ម៉ក់ ជីតូ អគ្គស្នងការរងនគរបាលជាតិ និងជាអគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន ថ្លែងប្រាប់ភ្នំពេញប៉ុស្ដិ៍ នៅថ្ងៃទី ៣ វិច្ឆិកាថា សមត្ថកិច្ចជំនាញនៃមន្ទីរប្រឆាំងបទល្មើសគ្រឿងញៀន បង្ក្រាបករណីកែច្នៃ ជួញដូរគ្រឿងញៀនបានជាបន្តបន្ទាប់ កាលពីថ្ងៃទី ៣១ តុលា ដោយឃាត់ខ្លួនជនសង្ស័យបានចំនួន ២ នាក់ និងរឹបអូសគ្រឿងញៀនជិត ៥៩ គីឡូក្រាមនៅចំណុច ផ្លូវលេខ ៣៦០ សង្កាត់បឹងកេងកង១ ខណ្ឌបឹងកេងកង។
លោកថ្លែងថា៖ «សមត្ថកិច្ចកំពុងកសាងសំណុំរឿង រៀបចំបញ្ជូនជនសង្ស័យទាំង ២ នាក់ទៅតុលាការល្ងាចនេះ (៣ វិច្ឆិកា)។ សមត្ថកិច្ចយើងក៏កំពុងបន្តស៊ើបអង្កេតរកអ្នកពាក់ព័ន្ធ និងមេខ្លោងនៅពីក្រោយខ្នងករណីនេះទៀត យើងមិនទាន់បញ្ចប់ទេ»។
បើតាមអាជ្ញាធរជាតិប្រយុទ្ធប្រឆាំងគ្រឿងញៀនកាលពីថ្ងៃទី ៣១ ខែតុលា វេលាម៉ោង ១៤:២០ នាទី កម្លាំងសមត្ថកិច្ចជំនាញនៃមន្ទីរប្រឆាំងគ្រឿងញៀន (ក ៥) ដឹកនាំដោយ លោក សាន សុទ្ធី និងលោក មាស ហត ដែលអ្នកទាំង ២ ជានាយករងមន្ទីរប្រឆាំងគ្រឿងញៀន លោក ជាវ វណ្ណា នាយការិយាល័យ (ក ៥) ដោយមានការចូលរួមសហការពីកម្លាំងនៃស្នងការដ្ឋាននគរបាលរាជធានីភ្នំពេញ ព្រមទាំងមានការសម្របសម្រួលពីលោក ហេង ផេង ព្រះរាជអាជ្ញារងនៃអយ្យការអមសាលាដំបូងរាជធានីបានធ្វើការស៊ើបអង្កេត ស្រាវជ្រាវ បង្ក្រាបករណីកែច្នៃ ជួញដូរគ្រឿងញៀននេះ ដោយឃាត់ខ្លួនបានជនសង្ស័យចំនួន ២ នាក់ ក្នុងនោះមានជនជាតិខ្មែរម្នាក់ និងជនជាតិវៀតណាមម្នាក់។
ជនសង្ស័យទាំង ២ នាក់នោះ ១ ឈ្មោះ ង្វៀង វីង ទី ភេទប្រុស អាយុ ២៦ ឆ្នាំ ជនជាតិវៀតណាម។ ២ ហេង គឹមហេង ភេទប្រុស អាយុ ២៥ ឆ្នាំ ជនជាតិខ្មែរ។ ចំណែក វត្ថុតាងដែលសមត្ថកិច្ចចាប់យកបានរួមមានគ្រឿងញៀនមេតំហ្វេតាមីន (ICE) ទម្ងន់សុទ្ធ ៣,៥១ ក្រាម។ កេតាមីន (KETAMIN) ទម្ងន់សុទ្ធ ៥០,៤២ ក្រាម។ អ៊ិចស្តាស៊ី (MDMA) ទម្ងន់សុទ្ធ ១ គីឡូក្រាម។ មេកាទីណូន (METHCATHINONE) ទម្ងន់សុទ្ធ ៤៦ គីឡូក្រាម។ សរុបគ្រឿងញៀនទាំងអស់ទម្ងន់ ៥៩ គីឡូក្រាម រួមនឹងសារធាតុផ្សំផ្សេងទៀតមួយចំនួនទៀត។
លោក មាស វិរិទ្ធ អ្នកនាំពាក្យ អាជ្ញាធរជាតិប្រយុទ្ធប្រឆាំងគ្រឿងញៀនបានបញ្ជាក់បន្ថែមថា សមត្ថកិច្ចជំនាញកំពុងបន្តស្រាវជ្រាវស៊ើបអង្កេតលើករណីនេះ តាមនីតិវិធីបន្តទៀត ដោយផ្អែកទៅលើវត្ថុតាងដែលចាប់យកបាន ចំណែកជនសង្ស័យទាំង ២ នាក់ គឺត្រូវអនុវត្ដតាមនីតិវិធីបញ្ជូនទៅតុលាការ។
លោកថ្លែងថា៖ «រឿងបញ្ជូន ជនល្មើសទៅតុលាការនេះ គឺយើងផ្អែកទៅតាមច្បាប់។ យើងឃាត់ជនល្មើសបានតាំងពីថ្ងៃទី ៣១ មកដល់ពេលនេះ យើងមាននីតិវិធីបន្តដើម្បីវែកមុខក្រុមដែលមានការជាប់ពាក់ព័ន្ធ»។
លោកបញ្ជាក់ថា ទាក់ទងនឹងការបន្តស៊ើបអង្កេតនេះ គឺស្ថិតនៅក្នុងដៃសមត្ថកិច្ចមន្ទីរប្រឆាំងគ្រឿងញៀនដែលជាអ្នកចុះទៅបង្ក្រាបលើករណីនេះ៕