ភ្នំពេញៈ ក្រសួងសាធារណការ និងដឹកជញ្ជូនកំពុងធ្វើបច្ចុប្បន្នភាពបញ្ជីសារពើភណ្ឌបណ្ដាញផ្លូវជាតិ ផ្លូវខេត្ត និងផ្លូវថ្នល់ផ្សេងទៀតក្រោមការគ្រប់គ្រងរបស់ខ្លួនឱ្យបានត្រឹមត្រូវ និងរៀបចំចេញជាផែនទីបណ្ដាញផ្លូវឱ្យបានគ្រប់ជ្រុងជ្រោយ ដើម្បីធានាបាននូវការគ្រប់គ្រងប្រកបដោយប្រសិទ្ធភាព និងការទទួលខុសត្រូវ។
លោក លឹម ស៊ីដានីន រដ្ឋលេខាធិការក្រសួងសាធារណការ និងដឹកជញ្ជូនថ្លែងនៅក្នុងកិច្ចប្រជុំពិភាក្សាត្រួតពិនិត្យលើការព្រាងចុងក្រោយផែនទីបណ្តាញផ្លូវថ្នល់ឆ្នាំ ២០២០ នៅថ្ងៃទី ៣ ខែវិច្ឆិកា ឆ្នាំ ២០២១ ឱ្យដឹងថា អង្គប្រជុំបានផ្តោតការពិភាក្សាលើការពិនិត្យឡើងវិញ និងកែសម្រួលសេចក្តីព្រាងបញ្ជីសារពើភណ្ឌផ្លូវថ្នល់រួម ក្រោមសមត្ថកិច្ចគ្រប់គ្រងរបស់ក្រសួង ដើម្បីបំពេញបន្ថែមចំណុចខ្វះខាតតាមការលើកឡើងរបស់ភាគីពាក់ព័ន្ធ ការបែងចែកខ្សែផ្លូវតាមតំបន់ស្របតាមស្តង់ដាដែលបានកំណត់ និងការដាក់បញ្ចូលខ្សែផ្លូវ និងលេខផ្លូវទៅក្នុងបញ្ជីសារពើភណ្ឌឱ្យបានសមស្រប។
ជាមួយគ្នានេះ លោកបានជំរុញលើកទឹកចិត្តឱ្យមន្ត្រីជំនាញពាក់ព័ន្ធ ជាពិសេសមន្ទីរសាធារណការ និងដឹកជញ្ជូនរាជធានី-ខេត្តផ្តល់មតិយោបល់បន្ថែមលើពង្រាងទិន្នន័យផែនទី ក៏ដូចជាធ្វើការបញ្ជាក់ឱ្យបានច្បាស់លាស់ផ្លូវថ្នល់ដែលស្ថិតនៅក្រោមសមត្ថកិច្ចនៃការគ្រប់គ្រងរបស់ខ្លួន សំដៅធ្វើយ៉ាងណាឱ្យការធ្វើបច្ចុប្បន្នភាពបញ្ជីសារពើភណ្ឌ និងរៀបចំជាផែនទីបណ្ដាញផ្លូវជាតិ ផ្លូវខេត្ត និងផ្លូវថ្នល់ផ្សេងទៀតក្រោមការគ្រប់គ្រងរបស់ក្រសួងទទួលបានជោគជ័យ។
លោកថ្លែងថា៖ «យើងពិភាក្សាដើម្បីពិនិត្យវឌ្ឍនភាពនៃការរៀបចំផែនទីបណ្ដាញផ្លូវជាតិ ផ្លូវខេត្ត និងផ្លូវថ្នល់ផ្សេងទៀត ហើយផលិតចេញជាផែនទីឱ្យបានចប់សព្វគ្រប់ ដើម្បីជួយសម្រួលដល់ការងារគ្រប់គ្រង ជួសជុល និងថែទាំផ្លូវថ្នល់ប្រកបដោយប្រសិទ្ធភាពខ្ពស់»។
លោក ស៊ីដានីន ថ្លែងថា ផែនទីដែលនឹងត្រូវបានកំណត់គឺ ផ្លូវជាតិសំដៅដល់ផ្លូវដែលមានចរាចរណ៍ច្រើន និងមានលក្ខណៈសម្គាល់ដូចជា ផ្លូវភ្ជាប់ចេញពីរាជធានីភ្នំពេញ ឆ្ពោះទៅកាន់ក្រុងនៃខេត្តនីមួយៗ នៅទូទាំងប្រទេស ផ្លូវភ្ជាប់ចេញពីក្រុងនៃខេត្តមួយឆ្ពោះទៅកាន់ក្រុងនៃខេត្តមួយទៀត ផ្លូវភ្ជាប់ចេញពីផ្លូវជាតិឆ្ពោះទៅកាន់ផ្លូវជាតិ ផ្លូវបែកចេញពីផ្លូវជាតិឆ្ពោះទៅកាន់ក្រុងនៃខេត្តមួយ ផ្លូវបែកចេញពីផ្លូវជាតិ ឬផ្លូវភ្ជាប់ចេញពីក្រុងនៃខេត្តមួយឆ្ពោះទៅកាន់តំបន់សំខាន់ៗដូចជា កំពង់ផែ ស្ថានីយរថភ្លើង អាកាសយានដ្ឋាន តំបន់សេដ្ឋកិច្ចពិសេស រមណីយដ្ឋានទេសចរណ៍ ច្រកទ្វារព្រំដែន តំបន់មានសក្តានុពលសេដ្ឋកិច្ចសំខាន់ៗផ្សេងទៀត និង ផ្លូវសំខាន់ៗរបស់ជាតិមានចរាចរណ៍ច្រើនដែលកំណត់ដោយរាជរដ្ឋាភិបាលតាមសំណើរបស់ក្រសួងសាធារណការ និងដឹកជញ្ជូន។ ផ្លូវខេត្តសំដៅដល់ផ្លូវដែលត្រូវបានកំណត់ដូចជា ផ្លូវភ្ជាប់ចេញពីក្រុងនៃខេត្តមួយឆ្ពោះទៅកាន់ទីរួមស្រុក ខណ្ឌ ផ្លូវបែកចេញពីផ្លូវជាតិ ឆ្ពោះទៅកាន់ផ្លូវខេត្ត ផ្លូវបែកចេញពីផ្លូវខេត្ត ឬផ្លូវក្រុងឆ្ពោះទៅកាន់ទីរួមស្រុកខណ្ឌ ផ្លូវភ្ជាប់ចេញពីក្រុងនៃខេត្តមួយឆ្ពោះទៅកាន់ផ្លូវខេត្តផ្លូវបែកចេញពីផ្លូវខេត្តឆ្ពោះទៅកាន់ផ្លូវខេត្ត និងផ្លូវបែកចេញពីផ្លូវខេត្ត ឬផ្លូវក្រុង ឬផ្លូវទីប្រជុំជននានាក្នុងខេត្តទៅកាន់តំបន់សំខាន់ៗដូចជា កំពង់ផែ ស្ថានីយរថភ្លើង អាកាសយានដ្ឋាន តំបន់សេដ្ឋកិច្ចពិសេស រមណីយដ្ឋាន ទេសចរណ៍ ច្រកទ្វារព្រំដែនទ្វេភាគី តំបន់មានសក្តានុពលសេដ្ឋកិច្ចមធ្យមផ្សេងទៀត។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូនថ្លែងថា ក្រសួងរៀបចំធ្វើច្បាប់ផ្លូវថ្នល់បានកំណត់ ៥ ឆ្នាំម្តងត្រូវធ្វើបច្ចុប្បន្នភាព។ «យើងធ្វើបច្ចុប្បន្នភាពផ្លូវ ដែលត្រូវបានសាងសង់រួច និងដាក់លេខ ផ្លូវ ព្រោះផ្លូវខ្លះអត់មានលេខ គេមានហើយ ប៉ុន្តែយើងមិនទាន់បញ្ចូលទៅក្នុងបញ្ជីសារពើភណ្ឌរបស់យើង។ មួយទៀត គេដាក់បញ្ចូលទៅក្នុងបញ្ជីដែរ គឺផ្លូវល្បឿនលឿនពីមុនយើងមានឯណា អត់ទេ»៕