.jpg)
ប្រជាពលរដ្ឋ ៤ ភូមិ តវ៉ានៅសាលាឃុំរកាជន្លឹង ក្នុងស្រុកខ្សាច់កណ្តាលកាលពីថ្ងៃ ២ វិច្ឆិកា។ រូបថត ហ្វេសប៊ុក
កណ្តាលៈ ពលរដ្ឋប្រមាណ ៦០០ នាក់មកពីភូមិចំនួន ៤ ក្នុងឃុំរកាជន្លឹង ស្រុកខ្សាច់កណ្តាល នៅព្រឹកថ្ងៃទី ២ វិច្ឆិកា បាននាំគ្នាឡើងទៅសាលាឃុំរកាជន្លឹង ធ្វើការតវ៉ា ស្នើសុំឱ្យអាជ្ញាធរឃុំ ជួយអន្តរាគមន៍ ខណៈមានអ្នករកស៊ីគួកជេដីបានផ្តល់លុយជូនពលរដ្ឋក្នុង ១ គ្រួសារ ៣៥០ ដុល្លារ ដែលពលរដ្ឋសង្ស័យថា ការផ្តល់លុយនេះ អាចជាការដោះដូរក្នុងការទិញដីបឹងខ្យោង ដែលពលរដ្ឋអាស្រ័យផល។
លោក ឈួន ហុន តំណាងប្រជាពលរដ្ឋបានឱ្យដឹងថា មានក្រុមអ្នកគួកជេដីចំនួន ៥ នាក់ បានដើរផ្តល់លុយឱ្យប្រជាពលរដ្ឋនៅភូមិរកាទី ១ ដោយគ្មានមូលហេតុច្បាស់លាស់ថា នឹងទិញបឹងខ្យោងដែលពួកគាត់កំពុងអាស្រ័យផលឬយ៉ាងណានោះទេ។ ប្រជាពលរដ្ឋក្នុងភូមិរកាទី ១ ប្រមាណជាង ៤០០ គ្រួសារបានទទួលយកលុយរួចហើយដោយក្នុង ១ គ្រួសារទទួលបានលុយ ៣៥០ ដុល្លារ។
ដោយឡែកពលរដ្ឋ ៤ ភូមិផ្សេងទៀតដែលមានភូមិជន្លឹង ភូមិរកាទី២ ភូមិតាំងឫស្សី និងភូមិទ្រា មិនព្រមទទួលលុយនោះទេ ទើបធ្វើការតវ៉ាបែបនេះដើម្បីឱ្យអាជ្ញាធរជួយស្រាវជ្រាវ និងបញ្ជាក់ពីមូលហេតុដែលមានក្រុមអ្នកគួកជេដីដើរផ្តល់លុយឱ្យប្រជាពលរដ្ឋ។
លោកថ្លែងថា៖ «ទាំងអស់មាន ៥ ភូមិ ប៉ុន្តែពលរដ្ឋដែលទទួលលុយមានតែ ១ ភូមិទេ ចំណែក ៤ ភូមិទៀត មិនទទួលយកទេ គេថា បើសិនណាដោះដូរជាមួយលុយ គឺមានតែទិញ អ៊ីចឹងបានយើងតវ៉ាឱ្យអាជ្ញាធរជួយអន្តរាគមន៍វែកញែកថាតើឱ្យលុយហ្នឹងមានន័យថាម៉េច»។
លោក ឈួន ហុន បញ្ជាក់ថា ក្រុមអ្នកគួកជេដីមិនបានប្រាប់ពីមូលហេតុឱ្យបានច្បាស់លាស់ក្នុងការផ្តល់លុយឱ្យមកប្រជាពលរដ្ឋទេ ខណៈសកម្មភាពរបស់ពួកគេហាក់សំដៅចង់បានដីបឹងខ្យោង។
លោកថា៖ «តាមខ្ញុំសួរពួកគួកជេហ្នឹងខ្ញុំថា ឥឡូវបងឯងអ្នកណាឱ្យធ្វើ គាត់ថា ខាងលើឱ្យធ្វើ តើទិញឬលក់ គាត់ថា អាហ្នឹង ឱ្យប្រជាពលរដ្ឋចាយ ព្រោះដីហ្នឹងគេទុកធ្វើសម្បត្តិរដ្ឋទេ គេអត់លក់ដូរទេប៉ុន្តែគេកំណត់ឱ្យពលរដ្ឋ ១ គ្រួសារ ៤០០ ដុល្លារ តែគួកជេថា ដក ៥០ ដុល្លារ»។
បើតាមលោក ឈួន ហុន ប្រជាពលរដ្ឋមានការព្រួយបារម្ភចំពោះការបាត់បង់ដីបឹងខ្យោង ដែលពួកគាត់កំពុងអាស្រ័យផល ព្រោះទីនោះជាទីកន្លែងតែមួយគត់ដែលពលរដ្ឋអាចរកត្រី និងបន្លែសម្រាប់ចិញ្ចឹមជីវិត។
លោកថ្លែងថា៖ «បើគេលក់បឹងហ្នឹងទៅ គឺគ្មានអីអាស្រ័យផលទេព្រោះប្រជាជនបានរកត្រកួន រកព្រលឹត រកត្រី តែពីកន្លែងហ្នឹង ព្រោះរកតែនៅក្នុងបឹងហ្នឹងទាំងប្រាំងទាំងវស្សា ហើយបើចាក់ដីលុបអស់ទៅពលរដ្ឋនឹងលំបាកដោយសារទឹកលិចទៀតផង»។
លោក គង់ ណឺម មេឃុំរកាជន្លឹងថ្លែងនៅថ្ងៃទី ២ វិច្ឆិកាថា លោកមានបញ្ហាសុខភាពមិនបានចូលរួមជួបសម្របសម្រួលផ្ទាល់ជាមួយប្រជាពលរដ្ឋទេ។ លោកណែនាំឱ្យសួរទៅតំណាងអាជ្ញាធរឃុំ ដែលបានជួបផ្ទាល់ជាមួយប្រជាពលរដ្ឋ គឺលោក យ៉ាន់ រឿន។
លោក យ៉ាន់ រឿន បានថ្លែងថា មានពលរដ្ឋប្រមាណ ៦០០ គ្រួសារ បានលើកគ្នាមកតវ៉ាដល់សាលាឃុំរកាជន្លឹង ដោយសារតែមានការបារម្ភខ្លាចមានការលក់ដូរដីបឹង ដែលពួកគាត់ធ្លាប់អាស្រ័យផល។
លោកថ្លែងថា៖ «ខ្ញុំសូមជម្រាបជូនថា ដីនេះ គឺអត់មានការលក់ទេ គ្រាន់តែថា អ្នកស្រុកគាត់មានការយល់ច្រឡំ ឬមួយក៏ខ្លាចអាជ្ញាធរហ្នឹងត្រូវរ៉ូវគ្នាលក្ខណៈប្រព័ន្ធជាមួយអ្នករកស៊ីដី អ្នកគួកជេដីហើយលក់ដីបឹង»។
លោក រឿន ប្រាប់ថា អាជ្ញាធរឃុំ និងអាជ្ញាធរស្រុកបានទទួលយកសំណូមពររបស់ប្រជាពលរដ្ឋ និងកំណត់ពេលវេលាច្បាស់លាស់មួយ ដើម្បីប្រជុំដោះស្រាយឱ្យប្រជាពលរដ្ឋអស់ចិត្ត ដោយហៅភាគីអ្នកគួកជេដី និងភាគីខាងប្រជាពលរដ្ឋបញ្ជាក់ប្រាប់គ្នាពីមូលហេតុឱ្យបានច្បាស់លាស់។
លោក អែតដា ដូរ៉ាមី អភិបាលរងស្រុកខ្សាច់កណ្តាលថ្លែងនៅថ្ងៃទី ២ ខែវិច្ឆិកាថា លោកបានចុះទៅប្រមូលព័ត៌មានពីប្រជាពលរដ្ឋអំពីការតវ៉ានេះ។ ប៉ុន្តែមិនទាន់មានការដោះស្រាយនៅឡើយទេ។
លោកបញ្ជាក់ថា៖ «ខ្ញុំគ្រាន់តែយកព័ត៌មានដែលពលរដ្ឋតវ៉ា ដើម្បីរាយការណ៍ជូនលោកអភិបាលស្រុកអំពីតម្រូវការដែលគាត់ចង់ឱ្យដោះស្រាយ អ៊ីចឹងការសម្រេចយ៉ាងម៉េច យើងមិនទាន់មានទេ»៕
