កំពង់ធំៈ មនុស្សប្រុស ៣ នាក់បានស្លាប់ភ្លាមៗនៅកន្លែងកើតហេតុ ដោយសារគ្រោះថ្នាក់ចរាចរណ៍ រថយន្ត២គ្រឿងបុកគ្នាកាលពីវេលារំលងអធ្រាត្រឈានចូលថ្ងៃទី ៤ខែវិច្ឆិកា លើផ្លូវជាតិលេខ ៦ ត្រង់ចំណុចភូមិត្រពាំងស្វាយ ឃុំបល្ល័ង្ក ស្រុកបារាយណ៍ ខេត្តកំពង់ធំ។
លោក សួន ថេន អធិការនគរបាលស្រុកបារាយណ៍បានប្រាប់ ភ្នំពេញ ប៉ុស្តិ៍ នៅថ្ងៃទី ៤ ខែវិច្ឆិកាថា ពេលកម្លាំងសមត្ថកិច្ចទៅដល់កន្លែងកើតហេតុបានឃើញរថយន្តបុកក្រពឹតជាប់គ្នា ដែលភាគីរថយន្តតូចមានអ្នកជិះ៣នាក់ស្លាប់ទាំងអស់ ចំណែកអ្នកបើករថយន្តធំមិនស្គាល់អត្តសញ្ញាណបានរត់គេចខ្លួនបាត់។ លោកអធិការបញ្ជាក់ថា ករណីគ្រោះថ្នាក់ចរាចរណ៍នេះសមត្ថកិច្ចកំពុងបន្តស្រាវជ្រាវបន្ថែមទៀត។
លោកថ្លែងថា៖ «ពេលវេលាថ្មើរហ្នឹងព័ត៌មានជុំវិញសុទ្ធតែយើងត្រូវធ្វើការស្រាវជ្រាវដោយប្រយ័ត្នប្រយែងណាស់ ពីព្រោះកណ្តាលយប់បងប្អូនស្រុកភូមិគេសម្រាកអស់ទៅហើយ» ។
បើតាមលោក សួន ថេន គ្រោះថ្នាក់ចរាចរណ៍នេះបណ្តាលឲ្យខូចខាតរថយន្តចំនួន ២ គ្រឿង ដែលសមត្ថកិច្ចបានយកវត្ថុតាងទាំងនេះមករក្សាទុកនៅអធិការដ្ឋាននគរបាលស្រុកបារាយណ៍ ដើម្បីរង់ចាំដោះស្រាយទៅតាមនីតិវិធី។ ចំណែកសាកសពជនរងគ្រោះ ត្រូវបានសាច់ញាតិទទួលយកទៅធ្វើបុណ្យតាមប្រពៃណី។
លោកបានឲ្យដឹងដែរថា រថយន្តបង្កម៉ាកតូយ៉ូតាព្រុស ពណ៌ទឹកប្រាក់ ពាក់ស្លាកលេខភ្នំពេញ 2AC-8411 បើកបរដោយឈ្មោះ វ៉ាត សំអេន ភេទប្រុស អាយុ២៩ឆ្នាំ នៅភូមិសិរីរាជ្យ ឃុំឈូកខ្សាច់ ស្រុកបារាយណ៍ និងអ្នករួមដំណើរ ២ នាក់ឈ្មោះ ម៉ិក វាសនា ភេទប្រុស អាយុ ២៩ ឆ្នាំ នៅភូមិឈូកខ្សាច់ ឃុំឈូកខ្សាច់ ស្រុកបារាយណ៍ និងឈ្មោះស៊ុន អៀម ភេទប្រុស អាយុ ៤១ ឆ្នាំ នៅភូមិសិរីរាជ្យ ឃុំឈូកខ្សាច់ ស្រុកបារាយណ៍ អ្នកទាំង ៣ សុទ្ធតែស្លាប់ក្នុងរថយន្តនៅកន្លែងកើតហេតុទាំងអស់។
ដោយឡែករថយន្ត១គ្រឿងទៀត ម៉ាកហ៊ីយ៉ាន់ដាយ ពណ៌ស ស្លាកលេខ កំពង់ចាម 3A-2975 ស្លាកលេខរ៉ឺម៉ក 51R 09444 តែអ្នកបើកបរមិនស្គាល់អត្តសញ្ញាណបានរត់គេចខ្លួនបាត់៕