.jpg)
ផ្ទះដែលអនុញ្ញាតសាងសង់តាមលក្ខណៈបច្ចេកទេសក្នុងតំបន់ឧទ្យានអង្គរ។ រូបថត អាជ្ញាធរជាតិអប្សរា
សៀមរាបៈ អាជ្ញាធរជាតិអប្សរាបានឱ្យដឹងថា ក្នុងអំឡុងខែតុលា ឆ្នាំ ២០២១ ក្រុមការងារបានចុះពិនិត្យ និងជួយសម្រួលលក្ខណៈបច្ចេកទេសនៃការសាងសង់លំនៅឋាននិងសំណង់ឧបសម្ព័ន្ធផ្សេងៗទៀតដល់ប្រជាពលរដ្ឋដែលរស់នៅក្នុងឧទ្យាន និងក្រៅឧទ្យានអង្គរបានចំនួន ៣៦៩ គ្រួសារ នៅក្នុងអំឡុងខែតុលា ឆ្នាំ ២០២១ នេះ។
ក្នុងនោះមានក្រុងសៀមរាប ១២៦ គ្រួសារ ស្រុកប្រាសាទបាគង ៧០ គ្រួសារ ស្រុកបន្ទាយស្រី ៦៥ គ្រួសារ ស្រុកពួក ២៩ គ្រួសារ និងស្រុកអង្គរធំ ៦៤ គ្រួសារ។ ចំណែកប្រជាពលរដ្ឋរស់នៅក្រៅឧទ្យានអង្គរចំនួន ១៥ គ្រួសារ គឺនៅស្រុកសូទ្រនិគម ៣គ្រួសារ និងស្រុកស្វាយលើ ១២ គ្រួសារ។
អ្នកនាំពាក្យអាជ្ញាធរជាតិអប្សរា លោក ឡុង កុសល បញ្ជាក់ថា ពលរដ្ឋនៅតែបន្តដាក់ពាក្យស្នើសុំមកកាន់អាជ្ញាធរដើម្បីចុះធ្វើការពិនិត្យជាបន្តបន្ទាប់។
លោកថា ប្រជាពលរដ្ឋដែលបានទទួលការអនុញ្ញាតឱ្យជួសជុល ឬរុះរើផ្ទះចាស់សាងសង់ផ្ទះថ្មីជំនួស ដែលទទួលបានការអនុញ្ញាតសាងសង់ត្រូវអនុវត្តឱ្យបានត្រឹមត្រូវបើពុំនោះទេនឹងតម្រូវឱ្យរុះរើចេញវិញ។
លោកថ្លែងថា៖ «ធម្មតានៅពេលដែលទទួលបានការអនុញ្ញាត គឺគាត់ត្រូវតែធ្វើទៅតាមលក្ខណៈបច្ចេកទេស នៃការអនុញ្ញាត ព្រោះការសាងសង់ ឬធ្វើអីមួយត្រូវមានប្លង់បច្ចេកទេសបើសិនជាធ្វើតាមប្លង់បច្ចេកទេសត្រឹមត្រូវ អាហ្នឹងបានន័យថាអនុវត្តកិច្ចការងារស្របច្បាប់ តែបើទទួលបានការអនុញ្ញាតហើយធ្វើមិនត្រឹមត្រូវអាហ្នឹងបានន័យថាយើងល្មើសច្បាប់»។
របាយការណ៍ក្រុមការងារលេខាធិការដ្ឋានសហគមន៍នៃអាជ្ញាធរជាតិអប្សរាបង្ហាញថា ក្នុងរយៈពេល ៥ ឆ្នាំ ក្រុមការងារ បានបន្តការងារចុះពិនិត្យអនុញ្ញាតការជួសជុលសំណង់តូចតាច ដែលស្ថិតនៅក្នុងតំបន់រមណីយដ្ឋានអង្គរបានចំនួន ១២ ៤៧៤ ករណី (សំណើ) ក្នុងនោះ សំណង់ស្រាល ដែលត្រូវបានក្រុមការងារអនុញ្ញាតមានចំនួន ៨ ១៣៧ ករណី (សំណើ)។
គោលដៅទាំងនោះ រួមមានស្រុកប្រាសាទបាគង អនុញ្ញាតបានចំនួន ៤៧៥ ករណី ស្រុកអង្គរធំ អនុញ្ញាតបានចំនួន ២ ១៥៤ ករណី ស្រុកពួកអនុញ្ញាតបានចំនួន ១ ១៨៤ ករណី ក្រុងសៀមរាប អនុញ្ញាតបានចំនួន ៣១៤២ ករណី និងស្រុកបន្ទាយស្រីអនុញ្ញាតបានចំនួន ១ ១៨២ ករណី។
ការអនុញ្ញាតនេះ ធ្វើឡើងបន្ទាប់ពីក្រុមការងារសហគមន៍ បានចុះពិនិត្យទៅដល់ខ្នងផ្ទះជាក់ស្តែង និងឯកសារពាក់ព័ន្ធមួយចំនួនទៀត ដើម្បីជាមូលដ្ឋានបច្ចេកទេសក្នុងការវាយតម្លៃថា ពួកអ្នកស្នើសុំ គឺជាប្រជាពលដ្ឋចាស់រស់នៅក្នុងតំបន់អង្គរពិតប្រាកដនិងមានការបញ្ជាក់យ៉ាងច្បាស់លាស់ពីអាជ្ញាធរមូលដ្ឋានភូមិ-ឃុំ-សង្កាត់ ដែលមានតម្រូវការជាក់ស្តែងក្នុងការកែលម្អការរស់នៅឱ្យបានល្អប្រសើរ៕
