ភ្នំពេញៈ បារាំងបានផ្ដល់ប្រាក់កម្ចីបន្ថែមចំនួន ២០ លានអឺរ៉ូដល់កម្ពុជា សម្រាប់ការស្តារឡើងវិញនូវប្រព័ន្ធធារាសាស្ត្រចំនួន ១៧ ដែលរងការខូចខាតដោយទឹកជំនន់នៅខែតុលា ឆ្នាំ ២០២០។ នេះបើយោងតាមសេចក្តីប្រកាសព័ត៌មានរបស់ទីភ្នាក់ងារអភិវឌ្ឍន៍បារាំង (AFD) ដែល ភ្នំពេញ ប៉ុស្តិ៍ ទទួលបាននៅរសៀលថ្ងៃទី ៤ ខែ វិច្ឆិកា ឆ្នាំ ២០២១។
លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកស្រី Ophélie BOURHIS តំណាងប្រចាំប្រទេសនៃទីភ្នាក់ងារអភិវឌ្ឍន៍បារាំង (AFD) ប្រចាំកម្ពុជា បានចុះហត្ថលេខាលើកិច្ចព្រមព្រៀងកម្ចីបន្ថែមនេះ កាលពីថ្ងៃទី ២៦ ខែ តុលា ឆ្នាំ ២០២១។
តាមរយៈសេចក្ដីប្រកាសព័ត៌មាននោះ ទឹកប្រាក់កម្ចីបន្ថែមចំនួន ២០ លានអឺរ៉ូ នឹងត្រូវបញ្ចូលទៅក្នុងកម្មវិធីគ្រប់គ្រងធនធានទឹក និងការផ្លាស់ប្តូរបរិស្ថានកសិកម្មកម្ពុជា (WAT4CAM) ដែលមានសាច់ប្រាក់ស្រាប់ចំនួន ៦៦,៥ លានអឺរ៉ូ ដែលជាសហហិរញ្ញប្បទានដោយសហភាពអឺរ៉ុប(ជំនួយចំនួន ១១,៥ លានអឺរ៉ូ)។ ថវិកាបន្ថែមនេះនឹងអនុញ្ញាតឲ្យក្រសួងធនធានទឹក និងឧតុនិយម ស្តារប្រព័ន្ធធារាសាស្ត្រចំនួន ១៧ ដែលមានទីតាំងនៅក្នុងខេត្តបាត់ដំបង និងបន្ទាយមានជ័យ ក្នុងចំណោមតំបន់ដែលរងផលប៉ះពាល់ខ្លាំងបំផុតដោយទឹកជំនន់នៅខែតុលា ឆ្នាំ ២០២០។
លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយម មានប្រសាសន៍ថា៖ «យើងសូមកោតសរសើរយ៉ាងខ្លាំងចំពោះការបន្តគាំទ្ររបស់ប្រទេសបារាំង ចំពោះវិស័យគ្រប់គ្រងធនធានទឹកនៅកម្ពុជា។ នេះជាជំហានថ្មីមួយមិនត្រឹមតែក្នុងការស្តារឡើងវិញនូវហេដ្ឋារចនាសម្ព័ន្ធធារាសាស្ត្រដែលរងការខូចខាតដោយទឹកជំនន់ប៉ុណ្ណោះទេ ប៉ុន្តែថែមទាំងក្នុងការកសាងសមត្ថភាពនៃហេដ្ឋារចនាសម្ព័ន្ធនេះឱ្យកាន់តែប្រសើរឡើងក្នុងការទប់ទល់នឹងហានិភ័យអាកាសធាតុនាពេលនាគត»។
កាលពីខែតុលា ឆ្នាំ ២០២០ កម្ពុជាមានភ្លៀងធ្លាក់ខ្លាំងដោយសារព្យុះត្រូពិកជាច្រើនបានបង្កជាទឹកជំនន់យ៉ាងធ្ងន់ធ្ងរក្នុងខេត្តចំនួន ១៩ បណ្តាលឲ្យមនុស្ស ៤២ នាក់ស្លាប់ និង ១៤ ៣០០គ្រួសារត្រូវជម្លៀសចេញ។ ខេត្តចំនួនពីរ គឺខេត្តបាត់ដំបង និងបន្ទាយមានជ័យបានទទួលរងការខាតបង់យ៉ាងធ្ងន់ធ្ងរ ជាពិសេសមនុស្សចំនួន ២៦ នាក់បានស្លាប់ និងផ្ទៃដីដាំដុះដំណាំស្រូវនិងដំណាំផ្សេងទៀត សរុប ៨៥ ០០០ ហិកតា ឬ ស្មើ ៨២% នៃផ្ទៃដីដាំដុះសរុប ត្រូវបានបំផ្លាញ។ បន្ថែមពីលើការលំបាកដែលគ្រួសារជួបប្រទះរួចហើយដោយសារវិបត្តិជំងឺរាតត្បាតកូវីដ១៩ គ្រោះធម្មជាតិទាំងនេះបានជះឥទ្ធិពលយ៉ាងខ្លាំងដល់កម្រិតនៃភាពក្រីក្រនៅក្នុងខេត្តទាំង ២ នេះ។
នៅក្នុងឱកាសនោះ លោកស្រី OphélieBourhis តំណាង AFD ប្រចាំកម្ពុជា បានថ្លែងថា៖«ការចុះហត្ថលេខានេះបានគូសបញ្ជាក់ពីការឆ្លើយតបរបស់ AFD ចំពោះគម្រោងសង្គ្រោះបន្ទាន់ដែលបង្កើតឡើងដោយដៃគូកម្ពុជារបស់យើង។ក្នុងអំឡុងពេលមានវិបត្តិទាក់ទងនឹងជំងឺរាតត្បាតកូវីដ ១៩ ការស្តារឡើងវិញនូវបរិមាត្រប្រព័ន្ធធារាសាស្ត្រទាំងនេះ មានទំហំទឹកប្រាក់ដល់ ២០ លានអឺរ៉ូ នឹងផ្តល់លទ្ធភាពឱ្យប្រជាជននៃខេត្តទាំង ២»។
AFD បាននិងកំពុងគាំទ្រដល់ការអភិវឌ្ឍប្រព័ន្ធធារាសាស្ត្រនៅកម្ពុជាអស់រយៈពេលជាង ២៥ ឆ្នាំមកហើយ។ កម្មវិធី WAT4CAM សហការផ្តល់ហិរញ្ញប្បទានជាមួយសហភាពអឺរ៉ុប មានគោលបំណង៣ គឺបង្កើនតំបន់ស្រោចស្រព គាំទ្រដល់ការពង្រឹងប្រព័ន្ធអេកូឡូស៊ីនៃកសិកម្មស្រោចស្រព ប៉ុន្តែក៏ដើម្បីកែលម្អការចម្រុះដំណាំផងដែរ។
លើសពីនេះ កិច្ចព្រមព្រៀងផ្តល់ជំនួយចំនួន ៣០០ ០០០ អឺរ៉ូ ត្រូវបានចុះហត្ថលេខារវាង AFD និងក្រសួងសេដ្ឋកិច្ច និងហិរញ្ញវត្ថុដើម្បីអនុវត្តការសិក្សាលទ្ធភាពសម្រាប់គម្រោង «ស្តារនិងគ្រប់គ្រងទន្លេស្វាយចេក»ថ្មីនៅក្នុងខេត្តបន្ទាយមានជ័យ។
គម្រោងថ្មីតម្លៃ ៥០ លានអឺរ៉ូនេះ មានគោលបំណងអភិវឌ្ឍដំណោះស្រាយប្រកបដោយនិរន្តរភាពចំពោះបញ្ហាទឹកជំនន់ដែលកើតឡើងដដែលៗក្នុងខេត្តនេះ ធានានូវការគ្រប់គ្រងធនធានទឹកប្រកបដោយនិរន្តរភាពសម្រាប់ទាំងការប្រើប្រាស់កសិកម្ម និងមនុស្ស និងធ្វើឱ្យមានការអភិវឌ្ឍកសិកម្មឡើងវិញនៅក្នុងអាងទន្លេនេះ។
AFD បានចាប់ផ្តើមប្រតិបត្តិការរបស់ខ្លួននៅក្នុងប្រទេសកម្ពុជា ក្នុងឆ្នាំ ១៩៩៣ ហើយបានកៀរគរថវិកាជាង ៨៦៧ លានអឺរ៉ូ ក្នុងគោលបំណងជួយដល់ប្រទេសកម្ពុជា ក្នុងការផ្លាស់ប្តូរទឹកដី អេកូឡូស៊ី និងសង្គម។
ក្រុមទីភ្នាក់ងារអភិវឌ្ឍន៍បារាំង(AFD Group) អនុវត្តគោលនយោបាយរបស់ប្រទេសបារាំង ក្នុងវិស័យអភិវឌ្ឍន៍ និងសាមគ្គីភាពអន្តរជាតិ។ ដោយផ្តល់ហិរញ្ញប្បទានគាំទ្រ និងពន្លឿនការផ្លាស់ប្តូរឆ្ពោះទៅកាន់ពិភពលោកដែលមានភាពស៊ីចង្វាក់គ្នានិងធន់។ រួមមាន AFD ដែលផ្តល់ហិរញ្ញប្បទានដល់វិស័យសាធារណៈ និងអង្គការក្រៅរដ្ឋាភិបាល។ Proparco ដែលផ្តល់ហិរញ្ញប្បទានដល់វិស័យឯកជន ហើយឆាប់ៗនេះ អ្នកជំនាញបារាំងសម្រាប់កិច្ចសហប្រតិបត្តិការបច្ចេកទេស ហិរញ្ញវត្ថុក្រុមគាំទ្រនឹងពន្លឿនការផ្លាស់ប្តូរឆ្ពោះទៅកាន់ពិភពលោកដែលមានភាពធន់ និងនិរន្តរភាព។
ជាមួយនឹងដៃគូ AFD Group កំពុងបង្កើតដំណោះស្រាយរួមគ្នាជាមួយ និងប្រជាជននៃ Global South។ ក្រុមនេះមានសកម្មភាពនៅក្នុងគម្រោងជាង ៤ ០០០ នៅក្នុងវិស័យនេះដោយនៅក្រៅប្រទេសប្រទេសបារាំងមានប្រទេសចំនួន ១១៥ និងនៅក្នុងតំបន់មានវិបត្តិដោយធ្វើការដើម្បីលើកកម្ពស់ «ផលប្រយោជន៍រួម» ដែលមានដូចជា អាកាសធាតុ ជីវចម្រុះ សន្តិភាព សមភាពយេនឌ័រ ការអប់រំ និងសុខភាព។
ចំណែកសហភាពអឺរ៉ុប (EU) ដើរតួនាទីយ៉ាងសំខាន់ផ្នែកការទូត និងធ្វើការដើម្បីជំរុញស្ថិរភាព សន្តិសុខ និងវិបុលភាព លទ្ធិប្រជាធិបតេយ្យ សេរីភាពជាមូលដ្ឋាន និងនីតិរដ្ឋនៅកម្រិតអន្តរជាតិ។
សហភាពអឺរ៉ុបគឺជាប្លុកពាណិជ្ជកម្មដ៏ធំបំផុតនៅក្នុងពិភពលោក និងជាប្រទេសនាំចេញទំនិញ និងសេវាកម្មធំបំផុតរបស់ពិភពលោកដែលជាទីផ្សារនាំចូលធំបំផុតសម្រាប់ជាង ១០០ ប្រទេស និងជាគោលដៅធំទី២ សម្រាប់ការនាំចេញរបស់កម្ពុជា។
EUនិងរដ្ឋសមាជិកទាំង ២៧ របស់ខ្លួន (TeamEurope) គឺជាអ្នកផ្តល់ជំនួយអភិវឌ្ឍន៍ធំជាងគេដែលមានច្រើនជាង ៥០%នៃជំនួយដែលបានផ្តល់នៅទូទាំងពិភពលោក និងធ្វើការក្នុងភាពជាដៃគូជាមួយបណ្តាប្រទេសកំពុងអភិវឌ្ឍន៍ ដើម្បីផ្តល់នៅលើរបៀបវារៈឆ្នាំ ២០៣០ សម្រាប់ការអភិវឌ្ឍប្រកបដោយចីរភាព។
នៅក្នុងប្រទេសកម្ពុជា Team Europe គឺជាអ្នកផ្តល់ជំនួយអភិវឌ្ឍន៍ធំជាងគេទី២ និងទី១ សម្រាប់ជំនួយឥតសំណង៕