ភ្នំពេញៈ មន្ត្រីក្រសួងសាធារណការ និងដឹកជញ្ជូន ពិនិត្យ និងពិភាក្សាលើសេចក្តីព្រាងអនុក្រឹត្យ ស្តីពីការគ្រប់គ្រងដីចំណីផ្លូវនៅតាមបណ្តោយផ្លូវថ្នល់ និងផ្លូវរថភ្លើងដែលអនុក្រឹត្យថ្មីនេះនឹងបើកផ្លូវឱ្យរដ្ឋាភិបាលបង្កើតគណៈកម្មការថ្នាក់ជាតិមួយ ដើម្បីគ្រប់គ្រងលើកិច្ចការងារនេះចៀសវាងមានការរំលោភបំពានដីចំណីផ្លូវ។
កាលពីថ្ងៃទី ៣ វិច្ឆិកា មន្ត្រីជាន់ខ្ពស់ក្រសួងសាធារណការ និងដឹកជញ្ជូន បើកកិច្ចប្រជុំក្រុមការងារ ពិនិត្យ និងពិភាក្សាលើសេចក្តីព្រាងអនុក្រឹត្យស្តីពីការគ្រប់គ្រងលើកិច្ចការប្រើប្រាស់ដីចំណីផ្លូវ នៅតាមបណ្តោយផ្លូវថ្នល់ និងផ្លូវរថភ្លើងតាមប្រព័ន្ធវីដេអូពីចម្ងាយ។ ទំព័រហ្វេសប៊ុករបស់ក្រសួងឱ្យដឹង ថាមន្ត្រីជំនាញបច្ចេកទេសពាក់ព័ន្ធបានប្រមូលធាតុចូលបន្ថែមសម្រាប់បំពេញបន្ថែមចំណុចខ្វះខាត សំដៅធ្វើយ៉ាងណាឱ្យការរៀបចំសេចក្ដីព្រាងអនុក្រឹត្យនេះមានខ្លឹមសារច្បាស់លាស់ និងគ្រប់ជ្រុងជ្រោយ។
ទំព័រហ្វេសប៊ុកដដែលបញ្ជាក់ថា៖ «ក្រុមលេខាធិការដ្ឋាន បានរាយការណ៍អំពីការងាររៀបចំ និងចំណុចមួយចំនួនដែលបានឯកភាពគ្នាកាលពីកិច្ចប្រជុំលើកមុន។ ក្នុងនោះមានការដាក់បញ្ចូលក្នុងសេចក្តីយោងទាក់ទងនឹងអនុក្រឹត្យ ពាក់ព័ន្ធចំនួន ៥ [ការបង្កើតអគ្គនាយកដ្ឋានប្រព័ន្ធចម្រោះទឹកកខ្វក់ ការដំឡើងវិទ្យាស្ថានតេជោ សែន សាធារណការ និងដឹកជញ្ជូន អនុក្រឹត្យលេខ ១៨១ ១៨២ និង ១៨៣] ការឯកភាពលើមាត្រា ១ (ថ្មី)»។
អង្គប្រជុំបានចាប់ផ្តើមពិភាក្សាលើមាត្រា ២ (ថ្មី) ដោយពិនិត្យឃើញថា មានសំណើសុំកែប្រែទាំងស្រុងលើមាត្រា ២ (ថ្មី) និងមាត្រាបន្តបន្ទាប់។ អង្គប្រជុំក៏បានឯកភាពឱ្យក្រុមលេខាធិការដ្ឋាន ពិនិត្យសំណើសុំកែប្រែតាមមាត្រានីមួយៗបញ្ចូលគ្នាជាសេចក្តីព្រាងមាត្រាថ្មីសិន ទើបស្នើដាក់ចូលក្នុង កិច្ចប្រជុំគណៈកម្មការជាក្រោយ។
ជាមួយគ្នានោះ អង្គប្រជុំក៏បានពិភាក្សាផងដែរ លើនីតិវិធីថ្មីដែលជូនដំណឹង ដោយក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រីស្នើឱ្យមានតំណាងក្រុមអ្នកច្បាប់ចូលរួមពិភាក្សា និងរៀបចំសេចក្តីព្រាងច្បាប់ពីដើមដំបូង។ នេះបើតាមទំព័រហ្វេសប៊ុករបស់ក្រសួង។
លោក ប៉ាល់ ចន្ទតារា រដ្ឋលេខាធិការក្រសួងសាធារណការប្រាប់ភ្នំពេញប៉ុស្តិ៍ថា ពាក់ព័ន្ធនឹងដីចំណីផ្លូវ គឺកម្ពុជាមានច្បាប់និងលិខិតបទដ្ឋាន ដើម្បីគ្រប់គ្រងរួចមកហើយ។ ប៉ុន្តែបច្ចុប្បន្ន ការរំលោភបំពានដីចំណីផ្លូវនេះ នៅតែបន្តកើនឡើងធ្វើឱ្យប៉ះពាល់ដល់ផ្លូវថ្នល់។ ជាពិសេស នៅពេលរដ្ឋាភិបាលត្រូវការអភិវឌ្ឍផ្លូវបន្ថែម គឺមានការខូចខាតទ្រព្យសម្បត្តិរបស់ប្រជាពលរដ្ឋ ដែលទាមទារឱ្យរដ្ឋសងការខូចខាតទាំងនោះ។
លោកអះអាងថា អនុក្រឹត្យនេះនឹងសំដៅពង្រឹងការគ្រប់គ្រងដីចំណីផ្លូវ ខណៈក្រសួងនឹងបែងចែក អនុក្រឹត្យមួយដោយឡែកជុំវិញការគ្រប់គ្រងដីចំណីផ្លូវរថភ្លើង ឱ្យស្របតាមបរិបទ នាពេលបច្ចុប្បន្ន និងអនាគតដែលនឹងមានការអភិវឌ្ឍហួសពីការរំពឹងទុក។
លោកថ្លែងថា៖ «យើងធ្វើអនុក្រឹត្យនេះ គឺដើម្បីការពារគ្រប់គ្រងដីចំណីផ្លូវឱ្យបាន នៅពេលដែលយើងអភិវឌ្ឍទាំងផ្លូវថ្នល់ ផ្លូវជាតិ បូកទាំងផ្លូវរថភ្លើងទៀត។ សព្វថ្ងៃនេះ ផ្លូវរថភ្លើងយើងមានតែ ១ ទេ តែបើថ្ងៃក្រោយទៅប្រទេសយើងមានការរីកចម្រើនទៅ នៅពេលយើងធ្វើផ្លូវរថភ្លើង ២ ទៅ គឺប៉ះពាល់ទៀត។ អ៊ីចឹង យើងត្រូវធ្វើអនុក្រឹត្យគ្រប់គ្រងដីចំណីផ្លូវទាំងអស់ឱ្យហើយចាប់ពីពេលនេះ»។
លោក ប៉ាល់ ចន្ទតារា ក៏បានអះអាងដែរថា អនុក្រឹត្យនេះនឹងបង្កលទ្ធភាពឱ្យរដ្ឋាភិបាលអាចបង្កើតគណៈកម្មការថ្នាក់ជាតិមួយ ដឹកនាំដោយថ្នាក់ដឹកនាំកំពូល និងស្ថាប័នពាក់ព័ន្ធដើម្បីរួមគ្នាគ្រប់គ្រង និងការពារដីចំណីផ្លូវ។
លោក គង់ សុវណ្ណ នាយកកម្មវិធីមូលនិធិសុវត្ថិភាពអន្តរជាតិថ្លែងថា ការរៀបចំបទដ្ឋានថ្មីគួរតែយោងលើបទពិសោធដែលកម្ពុជាធ្លាប់ជួបប្រទះ ដើម្បីឱ្យបទដ្ឋានទាំងអស់អាចអនុវត្តបានដល់អនាគត។
លោកថា៖ «ជារួម មុននឹងរៀបចំនូវអនុក្រឹត្យ ឬរៀបចំសេចក្តីប្រកាសគឺទាមទារឆ្លងកាត់បទពិសោធ ឬទទួលបានអំពីកំហុសឆ្គងដែលឆ្លងកាត់ពីការសាកល្បង ហើយក៏ទទួលបានបទពិសោធថា តើមានកម្រិតកំហុសឆ្គងត្រង់ចំណុចណា ដើម្បីយើងយកមកតាក់តែងបទដ្ឋានគតិយុត្តឱ្យស្របជាមួយស្ថានភាពបច្ចុប្បន្ន ហើយគ្របដណ្តាប់ការវិវឌ្ឍនៃស្ថានភាពផ្លូវដែកនាពេលអនាគតទៀត»៕