.jpg)
មន្ត្រីឧទ្យានុរក្សចុះល្បាតព្រៃពីខែមីនា ឆ្នាំ ២០២១។ រូប មន្ទីរបរិស្ថានខេត្តស្ទឹងត្រែង
កំពង់ស្ពឺៈ ក្រសួងបរិស្ថានសហការជាមួយសាលានាយទាហានសកម្ម (ត្មាតពង) ក្នុងខេត្តកំពង់ស្ពឺបានបើកវគ្គហ្វឹកហ្វឺន ប្រតិបត្តិការពិសេស ស្តីពីវិធីសាស្ត្រល្បាតក្នុងតំបន់ការពារធម្មជាតិ ដើម្បីបង្រៀនដល់មន្ត្រីឧទ្យានុរក្ស ដែលធ្លាប់បានរៀនវគ្គមូលដ្ឋាន ហើយឱ្យទទួលបានចំណេះដឹងបន្ថែម ពីការដាក់បទបញ្ជា ការធ្វើផែនការ និងការប្រើប្រាស់អាវុធ។
លោកឧត្តមសេនីយ៍ឯក ប៊ុត សុភាព នាយកសាលានាយទាហានសកម្ម ប្រាប់ ភ្នំពេញ ប៉ុស្តិ៍ នៅថ្ងៃទី ៤ វិច្ឆិកាថា កន្លងមកមន្ត្រីឧទ្យានុរក្សបានទទួលវគ្គហ្វឺកហ្វឺន ៩ លើករួចមកហើយ ដែលវគ្គទាំងនោះ ជាវគ្គបណ្តុះបណ្តាលថ្នាក់មូលដ្ឋានកម្រិតបុគ្គលដែលបង្រៀនឱ្យមន្ត្រីចេះសម្របសម្រួលខ្លួន នៅក្នុងព្រៃដាច់សង្វែង ចេះប្រើប្រាស់អាវុធ ចេះក្លែងភេទ ចេះលាក់ខ្លួន ចេះឆ្លើយតបទៅនឹងសត្រូវដែលយាយី ឬអាចបង្ក្រាបសត្រូវបានដោយខ្លួនឯង នៅពេលណាឃើញបទល្មើសជាក់ស្តែង។
វគ្គថ្មីនេះគឺជាវគ្គទី១ នៃវគ្គប្រតិបត្តិការពិសេស ស្តីពីវិធីសាស្ត្រល្បាតក្នុងតំបន់ការពារធម្មជាតិ ដែលខុសពីវគ្គមុនៗ ត្រង់ថា វគ្គនេះគឺបង្វឹកបង្រៀនពីការដាក់បទបញ្ជា ការធ្វើផែនការ និងបង្កើនចំណេះដឹងបន្ថែមមួយចំនួនទៀត ដល់មន្ត្រីឧទ្យានុរក្សអំពីការប្រើប្រាស់អាវុធ។ វគ្គនេះមានរយៈពេល ៥៤ ថ្ងៃចាប់ពីថ្ងៃទី ១ វិច្ឆិកា ដល់ថ្ងៃទី ២៤ ធ្នូ ឆ្នាំ ២០២១ ដែលមានសិក្ខាកាមជាមន្ត្រីឧទ្យានុរក្សចំនួន ២៥ នាក់មកពីទូទាំងប្រទេស។
លោក សុភាព បញ្ជាក់ថា៖ «លើកមុនគាត់គ្រាន់តែចេះបាញ់ដោយខ្លួនគាត់ទេ តែលើកនេះ គាត់ចេះបញ្ជាឱ្យបាញ់អាវុធថែមទៀត ទៅតាមក្រុម តាមពួក តាមបុគ្គលម្នាក់ៗ ដែលមានបែបផែននៃការបញ្ជា។ អ៊ីចឹងសរុបឱ្យខ្លីវគ្គនេះ មានរយៈពេលខ្លីក៏ពិតមែន តែសារៈសំខាន់គឺបង្រៀនអ្នកដឹកនាំជាមន្ត្រីឧទ្យានុរក្សទៅថ្ងៃអនាគត» ។
លោក ស្រ៊ុន ដារិទ្ធិ រដ្ឋលេខាធិការក្រសួងបរិស្ថានថ្លែងក្នុងពិធីបើកវគ្គហ្វឹកហ្វឺននេះ ពីថ្ងៃទី ៣ ខែវិច្ឆិកាថា ការងាររបស់មន្ត្រីឧទ្យានុរក្សឆ្លុះបញ្ចាំងឱ្យឃើញយ៉ាងច្បាស់អំពីកិច្ចខិតខំប្រឹងប្រែង និងការយកចិត្តទុកដាក់ខ្ពស់របស់រាជរដ្ឋាភិបាលក្នុងការបន្តអភិវឌ្ឍធនធានមនុស្ស ទាំងក្នុងវិស័យយោធា និងវិស័យស៊ីវិល។
តាមរយៈវគ្គនេះ មន្ត្រីឧទ្យានុរក្សនៃក្រសួងបរិស្ថាននឹងមានសមត្ថភាព និងគុណធម៌ខ្ពស់បន្ថែមទៀត សម្រាប់បុព្វហេតុការពារជាតិ និងប្រជាជន ក៏ដូចជាកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវចម្រុះ និងការអភិវឌ្ឍដោយចីរភាព។
លោកថ្លែងថា៖ «សមិទ្ធផលទាំងនេះអាចសម្រេចទៅបានក៏អាស្រ័យដោយប្រទេសយើងមានសុខសន្តិភាព ស្ថិរភាពសង្គម នីតិរដ្ឋ កំណើនសេដ្ឋកិច្ចខ្ពស់ ការអភិវឌ្ឍលើគ្រប់វិស័យ និងអភិបាលកិច្ចតាមបែបប្រជាធិបតេយ្យយ៉ាងពិតប្រាកដ» ។
លោក នេត្រ ភក្ត្រា អ្នកនាំពាក្យក្រសួងបរិស្ថានថ្លែងនៅថ្ងៃទី ៤ វិច្ឆិកាថា មន្ត្រីបរិស្ថានដែលមិនទាន់ទទួលបានការហ្វឹកហាត់បំប៉នសមត្ថភាពមិនទាន់មានការជ្រើសរើសថ្មីទេ។ បច្ចុប្បន្ននៅទូទាំងប្រទេសមន្ត្រីឧទ្យានុរក្សមានចំនួន ១ ២៦០ នាក់។ ចំណែកសហគមន៍តំបន់ការពារធម្មជាតិមានចំនួនកើនឡើងបន្ថែមទៀត នៅក្នុងឆ្នាំ ២០២១ នេះ។
លោកថ្លែងថា៖ « គិតត្រឹមឆមាសទី ១ ឆ្នាំ ២០២១ សហគមន៍តំបន់ការពារធម្មជាតិមានចំនួន ១៨២ សហគមន៍ត្រូវបានបង្កើតឡើង ដែលមានការចូលរួមពីប្រជាពលរដ្ឋចំនួន ៥៥ ៤៤៦ គ្រួសារនៅក្នុង ៣៣៥ ភូមិ ក្នុង ១០៨ ឃុំ ក្នុង ១៦ ខេត្ត បានចូលរួមគ្រប់គ្រងលើផ្ទៃដីព្រៃចំនួន ៣០៩ ៤៦៣ ហិកតា» ។
បើតាមលោក ភក្ត្រា ទោះបីមន្ត្រីឧទ្យានុរក្សមានបទពិសោធច្រើនក្នុងការងារដើរល្បាត បង្ក្រាបបទល្មើស និងការពារ និងអភិរក្សធនធានធម្មជាតិក្តី តែមន្ត្រីឧទ្យានុរក្សទាំងអស់ត្រូវបន្តហ្វឹកហាត់ផ្នែកបច្ចេកទេសថ្មីៗ បន្ថែមទៀត ដើម្បីបង្កើនសមត្ថភាព និងទទួលបាននូវមេរៀន និងបទពិសោធថ្មីៗបន្ថែមទៀតក្នុងគោលដៅបង្កើនប្រសិទ្ធភាពក្នុងតួនាទីរបស់ខ្លួន។
លោក សុខ សុខុម ប្រធានអង្គការស្រាវជ្រាវជាតិកម្ពុជាកត់សម្គាល់ថា ការអនុវត្តកិច្ចការងាររបស់មន្ត្រីឧទ្យានុរក្សជារួមមានកន្លែងខ្លះធ្វើបានល្អ និងមានកន្លែងខ្លះទៀតនៅមានចន្លោះប្រហោង ខណៈជនឆ្លៀតឱកាសតែងលូកដៃចូលទៅទន្ទ្រានកាន់កាប់ដីព្រៃឈើ ពេលឃើញមានការចន្លោះប្រហោងទាំងនោះ។
លោកថ្លែងថា៖ «មន្ត្រីជំនាញត្រូវតែមានផែនការទប់ស្កាត់ឱ្យបានតឹងរ៉ឹងបំផុត ហើយការអនុវត្តច្បាប់ត្រូវធ្វើឱ្យមានប្រសិទ្ធភាពចំពោះបុគ្គលណាដែលទន្ទ្រានកាន់កាប់លើដីសាធារណៈរបស់រដ្ឋ នៅលើព្រៃធនធានធម្មជាតិ ជីវចម្រុះ។ សំខាន់រួមគ្នាអភិរក្សទាំងអស់គ្នាមិនមែនអ្នកណាម្នាក់ធ្វើទៅតែឯងបានទេ» ៕
វីដេអូ៖
