ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) ប្រកាសនៅព្រឹកនេះថា រយៈពេល ២៣ ថ្ងៃ មានប្រជាពលរដ្ឋទៅចុះឈ្មោះបោះឆ្នោតថ្មីសរុបមានចំនួន ២៦២ ៥៨៥ នាក់ ខណៈអ្នកដែលនឹងត្រូវលុបឈ្មោះចេញពីបញ្ជីបោះឆ្នោតសរុបមានចំនួន ១២៩ ១៩៨ នាក់ និងអ្នកដែលបានកែតម្រូវទិន្នន័យសរុប មានចំនួន ៩១ ៨៩៣ នាក់។
សេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត នៅថ្ងៃទី ៥ ខែវិច្ឆិកានេះ បង្ហាញថារបាយការណ៍ពីឃុំ សង្កាត់ ចំនួន ១ ៣៩២ លទ្ធផលបណ្តោះអាសន្ននៅថ្ងៃទី ២៣ នៃការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ ២០២១ ត្រូវនឹងថ្ងៃទី ៤ ខែវិច្ឆិកា ឆ្នាំ ២០២១ នៅទូទាំងប្រទេស មាន ប្រជាពលរដ្ឋដែលបានអញ្ជើញចុះឈ្មោះបោះឆ្នោតថ្មី មានចំនួន ៩ ៤២៨ នាក់ អ្នកដែលនឹងត្រូវលុបឈ្មោះចេញពីបញ្ជីបោះឆ្នោតមានចំនួន ៤ ៩៧៦ នាក់ អ្នកដែលបានកែតម្រូវនិន្នន័យ មានចំនួន ៥០៥១ នាក់ និងអ្នកដែលបានផ្ទេរទីលំនៅចូលក្នុងឃុំ-សង្កាត់ថ្មី មានចំនួន ២ ៦៤៦ នាក់។
សេចក្តីប្រកាសព័ត៌មានរបស់ គ.ជ.ប បញ្ជាក់ថា សរុបរយៈពេល ២៣ ថ្ងៃ ប្រជាពលរដ្ឋដែលអញ្ជើញមកចុះឈ្មោះបោះឆ្នោតថ្មី សរុប មានចំនួន ២៦២ ៥៨៥ នាក់ អ្នកដែលនឹងត្រូវលុបឈ្មោះចេញពីបញ្ជីបោះឆ្នោតសរុបមានចំនួន ១២៩ ១៩៨ នាក់ អ្នកដែលបានកែតម្រូវទិន្នន័យសរុប មានចំនួន ៩១ ៨៩៣ នាក់ និងអ្នកដែលបានផ្ទេរទីលំនៅចូលក្នុងឃុំសង្កាត់ថ្មីសរុប មានចំនួន ៧៨ ១៥៩ នាក់។
គ.ជ.ប បានឱ្យដឹងថា ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២១ ប្រព្រឹត្តទៅចាប់ពីថ្ងៃទី ១២ ខែតុលា ដល់ថ្ងៃទី ៣០ ខែវិច្ឆិកា ឆ្នាំ ២០២១ គិតទាំងថ្ងៃសៅរ៍ និងថ្ងៃអាទិត្យ។ គណៈកម្មាធិការជាតិរៀបចំការបោះឆ្នោត បានអំពាវនាវឱ្យប្រជាពលរដ្ឋដែលមានសិទ្ធិបោះឆ្នោត អញ្ជើញទៅពិនិត្យបញ្ជីឈ្មោះ និងចុះឈ្មោះបោះឆ្នោត នៅតាមការិយាល័យចុះឈ្មោះបោះឆ្នោត ដែលបច្ចុប្បន្ន មានទីតាំងនៅតាមភូមិមួយចំនួន ក្នុងឃុំ-សង្កាត់។
គ.ជ.ប បញ្ជាក់ថា «ការពិនិត្យបញ្ជីឈ្មោះ និងចុះឈ្មោះបោះឆ្នោត គឺដើម្បីពិនិត្យមើលឈ្មោះ និងទិន្នន័យ របស់ខ្លួនក្នុងបញ្ជីឈ្មោះបោះឆ្នោតចុងក្រោយ។ ប្រសិនបើមានកំហុសឆ្គងសាមីខ្លួនត្រូវស្នើសុំកែតម្រូវតាមអត្តសញ្ញាណបណ្ណសញ្ជាតិខ្មែរ ដែលនឹងត្រូវប្រើក្នុងពេលបោះឆ្នោត» ។
ជាមួយគ្នានោះ ចំពោះអ្នកដែលទើបគ្រប់អាយុ ១៨ (កើតមុន ឬកើតត្រឹមថ្ងៃទី ៦ ខែ មិថុនា ឆ្នាំ ២០០៤) និង ប្រជាពលរដ្ឋខ្មែរដែលបានផ្លាស់លំនៅឋានឬទីសំណាក់ចូលក្នុងឃុំ-សង្កាត់ថ្មី និងប្រជាពលរដ្ឋដែលមិនធ្លាប់ចុះឈ្មោះបោះឆ្នោតពីមុនមកនោះ ក៏អាចទៅចុះឈ្មោះបោះឆ្នោតផងដែរ៕