.jpg)
ជនសង្ស័យទាំង ២ នាក់ ករណីប្លន់លុយ ៦ ម៉ឺនរៀលពីក្មេងស្រីម្នាក់។ រូបថត ប៉ូលិស
ភ្នំពេញៈ តំណាងអយ្យការអមសាលាដំបូងរាជធានីភ្នំពេញ កំពុងសាកសួរជនសង្ស័យប្រុស-ស្រី ២ នាក់នាថ្ងៃទី ៤ វិច្ឆិកា បន្តទៀត ពាក់ព័ន្ធនឹងការប្លន់យកលុយក្មេងស្រីម្នាក់ចំនួន ៦ ម៉ឺនរៀល នៅភូមិដើមចាន់ សង្កាត់ច្បារអំពៅ ២ ខណ្ឌច្បារអំពៅ។
លោក ម៉ៅ សឿត អធិការនគរបាលខណ្ឌច្បារអំពៅប្រាប់នៅថ្ងៃទី ៤ វិច្ឆិកាថា ជនទាំង ២ នាក់ ឈ្មោះ ផន ណេត ភេទប្រុស អាយុ ២១ ឆ្នាំ និងឈ្មោះ គុណ ស្រីនី ភេទ ស្រី អាយុ ២៨ ឆ្នាំ។ ពួកគេគ្មានមុខរបរអ្វីធ្វើទេ និងស្នាក់នៅភូមិដើមចាន់ ១ សង្កាត់ច្បារអំពៅ ២ ខណ្ឌច្បារអំពៅ។
លោកបន្តថា ជនសង្ស័យទាំង ២ នាក់ត្រូវបានសមត្ថកិច្ចបញ្ជូនទៅសាលាដំបូងរាជធានីភ្នំពេញកាលពីថ្ងៃទី ៣ វិច្ឆិកា។ ប៉ុន្តែដោយសារតំណាងអយ្យការសាកសួរមិនទាន់គ្រប់គ្នាក៏បន្តនីតិវិធីស៊ើបសួរទៀត។ លោកថ្លែងថា៖ «នៅថ្ងៃនេះ [ថ្ងៃទី ៤ វិច្ឆិកា] តុលាការ បន្តស៊ើបសួរពួកគេទៀត»។
ពាក់ព័ន្ធនឹងអង្គហេតុដែលនាំឱ្យមានការចាប់ខ្លួនជនសង្ស័យទាំង ២ នាក់ខាងលើមិនត្រូវបានលោកអធិការ ម៉ៅ សឿត បញ្ជាក់លម្អិតទេ។ ប៉ុន្តែបើតាមហ្វេសប៊ុករបស់នគរបាលប៉ុស្តិ៍សង្កាត់ច្បារអំពៅ ២ បានសរសេរថា មុនពេលកើតហេតុកាលពីថ្ងៃទី ៣០ តុលា ឆ្នាំ ២០២១ វេលាម៉ោងប្រមាណជា ៤ រសៀល កុមារីឈ្មោះ សំ អៃឧស្សា អាយុ ១៣ ឆ្នាំជាមួយប្អូនប្រុសនាងម្នាក់ទៀតបាននាំគ្នាដើរទៅផ្ទះនៅភូមិដើមចាន់ សង្កាត់ច្បារអំពៅ ២។ ខណៈក្មេងទាំង ២ កំពុងដើរ ស្រាប់តែជនសង្ស័យទាំង ២ នាក់ខាងលើចាប់ក្មេងរងគ្រោះប្លន់យកលុយចំនួន ៦ ម៉ឺនរៀល ហើយគំរាមកុមារីរងគ្រោះថា «បើហ៊ានប្រាប់គេនឹងសម្លាប់ចោល»។
ទំព័រហ្វេសប៊ុករបស់នគរបាលប៉ុស្តិ៍បន្តថា ក្រោយកើតហេតុ កុមារីរងគ្រោះបានប្រាប់ម្តាយនាង ហើយប្តឹងនគរបាលប៉ុស្តិ៍សង្កាត់ច្បារអំពៅ ២។ លុះនៅវេលាប្រហែលម៉ោង ១ រសៀលថ្ងៃទី ២ វិច្ឆិកាជនសង្ស័យទាំង ២ ត្រូវបានឃាត់ខ្លួននៅទីតាំងខាងលើ។ ជនសង្ស័យឈ្មោះ ផន ណេត បានប្រាប់ថា រូបគេធ្លាប់ជាប់ពន្ធនាគារព្រៃស ៨ ខែក្នុងឆ្នាំ ២ ០០០ ពីបទលួច។
ភ្នំពេញ ប៉ុស្ដិ៍ បានសាកសួរទៅលោក អ៊ុ រតនា នាយប៉ុស្តិ៍នគរបាលច្បារអំពៅ ២ ពាក់ព័ន្ធនឹងរបាយការណ៍ចុះផ្សាយក្នុងផេកត្រង់ជនសង្ស័យឈ្មោះ ផន ណេតបច្ចុប្បន្ន អាយុ ២១ឆ្នាំ ហើយធ្លាប់ជាប់គុក ៨ខែក្នុងឆ្នាំ ២០០០ អ៊ីចឹងមានន័យថាកាលនោះគាត់អាយុបាន ១ ឆ្នាំ គាត់ជាប់គុក លោកតបវិញថា ឱ្យមើលតាមរបាយការណ៍ហ្នឹងទៅ តែលោកថា បើជាប់គុកឆ្នាំ ២០២០ ទើបត្រូវ៕
វីដេអូ៖
