.jpg)
វ៉ាក់សាំងបង្ការជំងឺកូវីដ ១៩ ប្រភេទ COVAXIN ក្រសួងសុខាភិបាលអនុញ្ញាតឱ្យប្រើក្នុងលក្ខខណ្ឌបន្ទាន់។ រូបថត AFP
ភ្នំពេញៈ ក្រសួងសុខាភិបាលនៅថ្ងៃទី ៥ ខែវិច្ឆិកានេះ បានប្រកាសអនុញ្ញាតឱ្យប្រើប្រាស់វ៉ាក់សាំងឈ្មោះ COVAXIN ក្នុងលក្ខខណ្ឌបន្ទាន់ សម្រាប់បង្ការជំងឺកូវីដ ១៩ ចំពោះមនុស្សមានអាយុចាប់ពី ១៨ ឆ្នាំឡើងទៅ។
លិខិតប្រកាសអនុញ្ញាតចុះហត្ថលេខាដោយលោក ម៉ម ប៊ុនហេង រដ្ឋមន្ត្រីក្រសួងសុខាភិបាល នៅថ្ងៃនេះ បានឱ្យដឹងថាលក្ខខណ្ឌនៃការប្រើប្រាស់ វ៉ាក់សាំងនេះគឺ ប្រើតែក្នុងអំឡុងពេលគ្រោះអាសន្នសុខភាពសាធារណៈ នៃជំងឺកូវីដ ១៩ ដែលកំពុងកើតមាន និង ប្រើក្រោមរូបភាពរបស់រាជរដ្ឋាភិបាលដូចមានចែងក្នុងផែនការដាក់ពង្រាយវ៉ាក់សាំងជាតិបច្ចុប្បន្ន និងក្រុមមនុស្សអាទិភាព។
ក្នុងលិខិតដដែលនោះលោករដ្ឋមន្ត្រីបានប្រាប់ពី លក្ខខណ្ឌពិសេសសម្រាប់រាយការណ៍អំពីសុវត្ថិភាព និងគ្រប់គ្រងប្រតិកម្មរំខាន បន្ទាប់ពីការចាក់វ៉ាក់សាំង (ត្រូវអនុវត្តដោយអង្គភាពពាក់ព័ន្ធទាំងអស់ដែលមានកាតព្វកិច្ចអនុវត្តការចាក់វ៉ាក់សាំង បង្ការជំងឺកូវីដ ១៩)។
ចំណុចដំបូងគឺ កម្មវិធីជាតិផ្តល់ថ្នាំបង្ការ (NIP) នឹងដឹកនាំអង្គភាពពាក់ព័ន្ធដទៃទៀត ដើម្បីអនុវត្តផែនការគ្រប់គ្រងហានិភ័យ ដោយផ្អែកលើ Risk Management Plan (RMP) ដែលផ្តល់ដោយក្រុមហ៊ុន ឬអាចរកបានពីអង្គការសុខាភិបាលពិភពលោក។
ចំណុចបន្ទាប់គឺ មណ្ឌលព័ត៌មានឱសថកម្ពុជា នៃនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង កម្មវិធីជាតិផ្តល់ថ្នាំបង្ការ និងអង្គភាពពាក់ព័ន្ធដទៃទៀត ត្រូវរាយការណ៍អំពីប្រតិកម្មរំខាន បន្ទាប់ពីចាក់វ៉ាក់សាំងបង្ការ (AEFI) និងតាមដានវ៉ាក់សាំង រួមទាំងកំណត់ត្រាលេខឡូតិ៍ ដែលបានចែកចាយទៅកន្លែងផ្តល់ថ្នាំបង្ការ និងដែលបានចាក់ជូនបុគ្គលម្នាក់ៗ (ត្រូវកត់ត្រាលេខឡូតិ៍វ៉ាក់សាំងក្នុងសៀវភៅផ្តល់ថ្នាំបង្ការ និងទម្រង់របាយការណ៍ស្តីពីប្រតិកម្មរំខានបន្ទាប់ពីចាក់វ៉ាក់សាំងបង្ការ)។
ចំណុចចុងក្រោយគឺ កម្មវិធីជាតិផ្តល់ថ្នាំបង្ការត្រូវសហការជាមួយអង្គភាពដទៃទៀត ដើម្បីបង្កើនសមត្ថភាពគ្រប់គ្រងគ្លីនិកក្នុងការឆ្លើយតបបន្ទាន់ និងទាន់ពេលវេលា ចំពោះប្រតិកម្មរំខាន បន្ទាប់ពីចាក់វ៉ាក់សាំងបង្ការ (ដូចជាប្រតិកម្មអាណាហ្វីឡាក់ទិច) នៅកន្លែងចាក់វ៉ាក់សាំងរៀបចំប្រព័ន្ធសម្រាប់បញ្ជូន និងគ្រប់គ្រងបន្ទាន់នៃប្រតិកម្មរំខានបន្ទាប់ពីចាក់វ៉ាក់សាំងបង្ការ៕
វីដេអូ៖
