កំពង់ចាមៈ លោក អ៊ុន ចាន់ដា អភិបាលខេត្តកំពង់ចាម ប្រគល់ផ្ទះមនុស្សធម៌ទី ៦ របស់សាខាកាកបាទក្រហមកម្ពុជាខេត្តកំពង់ចាម ជូនជនពិការទ័លលំបាក ១ គ្រួសារ នៅឃុំសំពងជ័យ ស្រុកជើងព្រៃ នៅថ្ងៃទី ៥ ខែវិច្ឆិកានេះ។
រដ្ឋបាលខេត្តកំពង់ចាមបានឱ្យដឹងថា ផ្ទះមនុស្សធម៌ទី ៦ ជាកម្មវិធីផ្ទះមនុស្សធម៌ខេត្តកំពង់ចាម ក្រោមកិច្ចសហការរវាងសាខាកាកបាទក្រហមកម្ពុជាខេត្ត និងសាលាគណខេត្តជូនដល់ជនមានពិការភាពទីទ័លក្រ ១ គ្រួសារ ឈ្មោះ ឈុន ម៉េន អាយុ ៦៣ ឆ្នាំ រស់នៅភូមិអំពិលទ្វារ ឃុំសំពងជ័យ ស្រុកជើងព្រៃ ខេត្តកំពង់ចាម។
រដ្ឋបាលខេត្តនេះបានឱ្យដឹងទៀតថា លោក ឈុន ម៉េន ជាជនមានពិការភាព (ស្វិតជើងឆ្វេង ដោយសារជំងឺលើសឈាម) មានប្រពន្ធ និងចៅតូចៗ ៤ នាក់ក្នុងបន្ទុកដែលកំព្រា ដោយសារឪពុកម្តាយលែងលះគ្នា។ ជិត ៥ ឆ្នាំមកនេះក្រោយធ្លាក់ខ្លួនពិការហើយមានជំងឺប្រចាំកាយថែមទៀតនោះជនពិការរូបនេះពុំមានលទ្ធភាពប្រកបរបរកសិកម្មបានទៀតឡើយម្ល៉ោះហើយបន្ទុកត្រូវធ្លាក់ទៅលើប្រពន្ធ ដែលគ្មានទាំងទុនគ្មានមុខរបរច្បាស់លាស់សូម្បីជម្រកស្នាក់នៅ ក៏រស់នៅក្នុងកូនខ្ទមតូចទាបផ្ទាល់ដី ដែលជញ្ជាំងបាំងដោយធាងត្នោត និងដំបូលប្រក់ស្លឹកត្នោតចាស់ៗនៅលើដីទំហំ ១៥ ម៉ែត្រគុណ ៣៥ ម៉ែត្រ។
ក្រៅពីការជួយឧបត្ថម្ភរបស់រាជរដ្ឋាភិបាលតាមរយៈប័ណ្ណសមធម៌ក្រ ២ ប្រពន្ធលោក ឈុន ម៉េន ត្រូវរ៉ាប់រងចិញ្ចឹមគ្រួសារដោយដើររើសខ្យងក្តាមលក់ផង និងដើរស៊ីឈ្នួលតាមរដូវកាលផងគ្រាន់បានប្រាក់កម្រៃប្រចាំថ្ងៃចិញ្ចឹមប្តី និងចៅកំព្រាតូចៗទាំង ៤ នាក់។ ដោយមើលឃើញពីស្ថានភាពលំបាកនេះ ទើបប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ចាម បានសម្រេចផ្តល់ជូនផ្ទះឈើខ្ពស់ផុតពីដីប្រក់ស័ង្កសីជូនពួកគាត់។
ក្នុងឱកាសនោះ អភិបាលខេត្តកំពង់ចាមថ្លែងថា ពិតមែនតែស្ថានភាពឆ្លងរាលដាលនៃជំងឺកូវីដ ១៩ បានធូរស្រាលហើយប្រមុខរាជរដ្ឋាភិបាលបានប្រកាសបើកប្រទេសពេញលេញឡើងវិញក្តី តែបងប្អូនទាំងអស់គ្នាមិនត្រូវធ្វេសប្រហែស ឬមើលស្រាលបានឡើយទោះជាបានចាក់វ៉ាក់សាំងរួចហើយក៏ដោយ។
លោកថ្លែងថា៖ «គ្រប់គ្នាត្រូវបង្កើនការការពារខ្លួនថែរក្សាអនាម័យឱ្យបានជាប្រចាំដោយបុគ្គលម្នាក់ៗក៏ដូចជាក្រុមគ្រួសារនីមួយៗត្រូវបន្តរៀនរស់ជាមួយជំងឺកូវីដ ១៩ និងចាំបាច់ត្រូវអនុវត្តឱ្យបានខ្ជាប់ខ្ជួននូវវិធានសុខាភិបាល ”៣ការពារ ៣កុំ” ដើម្បីចៀសឱ្យផុតកុំឱ្យឆ្លងជំងឺដ៏កាចសាហាវនេះ» ៕