ភ្នំពេញៈ មន្ទីរពហុព្យាបាលនីយ៉ា នៅថ្ងៃទី ៥ ខែវិច្ឆិកា បានប្រកាសទទួលពិនិត្យថែទាំ និងព្យាបាលអ្នកជំងឺកូវីដ១៩ ដើម្បីចូលរួមជាមួយក្រសួងសុខាភិបាលកម្ពុជាក្នុងការទប់ស្កាត់ និងសង្គ្រោះអាយុជីវិតប្រជាជនកម្ពុជាពីការឆ្លង និងការរីករាលដាលជំងឺដ៏សាហាវនេះ។
លោក កែវ សំ ប្រធានគ្រប់គ្រងទូទៅមន្ទីរពហុព្យាបាលនីយ៉ា បានឱ្យដឹងថា ការប្រកាសបើកទទួលពិនិត្យ ថែទាំ និងព្យាបាលអ្នកជំងឺកូវីដ១៩នេះ ធ្វើឡើងបន្ទាប់ពី ក្រសួងសុខាភិបាលបានចេញលិខិតអនុញ្ញាត កាលពីដើមខែវិច្ឆិកានេះ។
លោកប្រាប់ថា មន្ទីរពហុព្យាបាលនីយ៉ាមានទីតាំង នៅផ្ទះលេខ ៣៦ ផ្លូវលេខ ១០៥ សង្កាត់ទួលសង្កែទី ១ ខណ្ឌឬស្សីកែវ រាជធានីភ្នំពេញ និងអាចទំនាក់ទំនងតាមរយៈទូរស័ព្ទលេខ ០៨១ ៧៩៩ ៨០០។
លោកប្រធានគ្រប់គ្រងទូទៅមន្ទីរពហុព្យាបាល នីយ៉ា បញ្ជក់ថា៖ «យើងប្រកាសទទួលពិនិត្យព្យាបាលអ្នកជំងឺកូវីដ១៩នេះ គឺដើម្បីចូលរួមជាមួយក្រសួងសុខាភិបាលកម្ពុជាក្នុងការទប់ស្កាត់ និងសង្គ្រោះអាយុជីវិតប្រជាជនកម្ពុជាពីការឆ្លង និងការរីករាលដាលជំងឺកូវីដ១៩»។
លោក សំ បានអះអាងថា នឹងអនុវត្តតាមគោលការណ៍ណែនាំរបស់ក្រសួង សុខាភិបាល ស្តីពីការអនុញ្ញាតឱ្យម្ចាស់សេវាព្យាបាលឯកជន និងសម្ភពស្របច្បាប់ក្នុងរាជធានីភ្នំពេញទាំងអស់ អាចទទួលពិនិត្យ ថែទាំ និងព្យាបាលអ្នកជំងឺកូវីដ១៩ និងសេចក្តីណែនាំពាក់ព័ន្ធផ្សេងទៀតផងដែរ។
អ្នកគ្រប់គ្រងទូទៅមន្ទីរពហុព្យាបាលនីយ៉ា បានឱ្យដឹងទៀតថា មន្ទីរពហុព្យាបាលនីយ៉ា មានបន្ទប់សម្រាកព្យាបាល ៣ប្រភេទ ក្នុងនោះមានបន្ទប់ព្យាបាលធម្មតា បន្ទប់សម្រាកព្យាបាលពិសេស (VIP) និងបន្ទប់សម្រាកព្យាបាលសង្គ្រោះបន្ទាន់។ បន្ទប់ព្យាបាលធម្មតាតម្លៃ ៣០០ដុល្លារក្នុងមួយថ្ងៃ បន្ទប់ VIP ៥០០ ដុល្លារក្នុងមួយថ្ងៃ និងបន្ទប់សម្រាកព្យាបាលសង្គ្រោះបន្ទាន់ ៦០០ ដុល្លារក្នុងមួយថ្ងៃ។
លោកបញ្ជាក់ថា បន្ទាប់ទាំងអស់សុទ្ធតែមានម៉ាស៊ីនត្រជាក់ មានអាហារប្រចាំថ្ងៃ ៣ពេល មានវេជ្ជបណ្ឌិត និងគិលានុបដ្ឋាយិកាថែទាំ ២៤ម៉ោង អនុញ្ញាតឱ្យមានអ្នកថែកំដរអ្នកជំងឺមួយនាក់ដោយមិនគិតថ្លៃ ថតសួតលើកដំបូង និងធ្វើតេស្តលើកដំបូងមិនគិតថ្លៃឡើយ៕