ភ្នំពេញៈកម្ពុជា-ថៃ បានឯកភាពគ្នាបន្តកិច្ចសហប្រតិបត្តិការក្នុងការស្វែងរកវិធីសាស្ត្រនិងមធ្យោបាយគាំទ្រ ដើម្បីបំផ្លាញក្រុមអង្គការចាត់តាំងនៃក្រុមឧក្រិដ្ឋជនដែលជាមេខ្លោងជួញដូរគ្រឿងញៀនឆ្លងកាន់ព្រំដែននៃប្រទេសទាំង២ បន្ទាប់ពីកម្ពុជាបានបង្ក្រាបបទល្មើសធំៗចំនួន ២ ករណី កាលពីពេលថ្មីនេះ ដែលមានជាប់ព័ន្ធនឹងជនជាតិថៃមួយចំនួន ។
លោក មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនប្រាប់ភ្នំពេញប៉ុស្តិ៍នៅថ្ងៃទី ៧ ខែវិច្ឆិកា ឆ្នាំ ២០២១ ថា រូបលោក និង លោក វីចៃ ចៃម៉ុងខន អគ្គលេខាធិការក្រុមប្រឹក្សាត្រួតពិនិត្យគ្រឿងញៀនថៃកាលពីថ្ងៃទី ៥ ខែ វិច្ឆិកា ឆ្នាំនេះ បានពិភាក្សាគ្នាលើការប្រយុទ្ធប្រឆាំងបទល្មើសគ្រឿងញៀនឆ្លងកាត់ព្រំដែន ដោយបានពិនិត្យវាយតម្លៃទៅលើផ្លូវចរាចរណ៍គ្រឿងញៀននេះថា វាចេញមកពីប្រភពណា និងទិសដៅសំខាន់ទៅទីណា។
លោកបានបន្តថា ភាគីទាំង ២ បានឯកភាពបន្តជួយគ្នាទៅវិញទៅមក តាមរយ:ការផ្លាស់ប្តូរព័ត៌មាន ការតាមដានផ្លូវចរាចរណ៍ ខ្សែបណ្តាញក្រុមឧក្រិដ្ឋជននិងបទល្មើសសម្អាតប្រាក់ ដើម្បីពង្រឹងប្រសិទ្ធភាពកិច្ចសហប្រតិបត្តិការប្រយុទ្ធប្រឆាំងគ្រឿងញៀនពិសេសការបង្ក្រាបបទល្មើសគ្រឿងញៀនឆ្លងកាត់ព្រំដែន។
លោកបានបញ្ជាក់ថា៖ «យើងរួមគ្នាធ្វើការវិភាគទៅលើទិដ្ឋភាពបច្ចេកទេស និងក្របខ័ណ្ឌនៃកិច្ចសហប្រតិបត្តិការក្នុងការអនុវត្តច្បាប់ ដោយបានកំណត់ថាប្រភពគ្រឿងញៀនេះមានចេញមកពីតំបន់ត្រីកោណមាសហើយក្រុមឧក្រិដ្ឋជនដែលបានចរាចរណ៍គ្រឿងញៀនចេញពីតំបន់ផលិតទៅរកទីផ្សារប្រើប្រាស់ និងយកទៅកាន់ប្រទេសទី ៣ បានប្រឹព្រឹត្តសម្រេចជាច្រើនលើក»។
លោកបញ្ជាក់ទៀតថាឈរលើមូលដ្ឋាននៃកិច្ចសហការនេះភាគីថៃបានឃាត់ខ្លួនជនជាតិថៃមួយចំនួន នៅក្នុងទឹកដីថៃដែលមានការជាប់ពាក់ព័ន្ធទៅនឹងការប្រព្រឹត្តបទល្មើសឬចូលរួមប្រព្រឹត្តបទល្មើសគ្រឿងញៀនទាំង ២ ករណីនេះនៅក្នុងប្រទេសកម្ពុជាផងដែរ ដោយបានអនុវត្តច្បាប់ស្របទៅតាមនីតិវិធីភ័ស្ដុតាងដែលភាគីកម្ពុជា បង្ក្រាបបាន និងភ័ស្តុតាងបច្ចេកទេស។
បើតាម លោក មាស វីរិទ្ធិ ភាគីថៃក៏បានស្នើសុំកិច្ចសហការដោយបញ្ជូនអ្នកបច្ចេកទេសមកចូលរួមស្តាប់ចម្លើយ និងការសួរសំណួរទៅលើជនជាតិថៃទៅតាមបច្ចេកទេសរបស់នគរបាលយុត្តិធម៌ ដែលប្រមូលបានភ័ស្តតាង និងព័ត៌មានដែលអាចបញ្ជាក់ថាក្រុមជនល្មើសប្រព្រឹត្តបទល្មើសចាប់ពីពេលណាមក និងមានចំណងទាក់ទងនឹងការដឹកជញ្ជូនគ្រឿងញៀនចេញទៅកាន់ប្រទេសទី ៣ ដែលឆ្លងកាត់ប្រទេសកម្ពុជា ។
យោងតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀនចេញកាលពីថ្ងៃទី ៥ វិច្ឆិកាបានបង្ហាញថាបញ្ហាបទល្មើសគ្រឿងញៀនឆ្លងកាត់ព្រំដែន នៅតែមានស្ថានភាពស្រួចស្រាល់ដែលតម្រូវឱ្យប្រទេសកម្ពុជា-ថៃរួមគ្នាដោះស្រាយ បង្ការ បង្ក្រាប ឱ្យដល់ឫសគល់នៃក្រុមឧក្រិដ្ឋជនមានអង្គការចាត់តាំង ដើម្បីសុវត្ថិភាពសន្តិសុខនិងសុខុមាលភាពរស់នៅរបស់ប្រជាពលរដ្ឋនៃប្រជាជាតិយើងទាំង ២។
របាយការណ៍ដដែលបន្តថាក្នុងកាលៈទេសៈពិភពលោកប្រឈមនឹងបញ្ហាជំងឺរាតត្បាតកូវីដ ១៩ ព្រំដែនរបស់បណ្តាប្រទេសលើលោកត្រូវបានបិទខ្ទប់យ៉ាងតឹងរ៉ឹង ទោះបីថា ពិបាកក្នុងការដឹកជញ្ជូនគ្រឿងញៀនឆ្លងកាត់ ប៉ុន្តែការផលិតគ្រឿងញៀនរបស់ក្រុមឧក្រិដ្ឋជននៅបន្តមានសកម្មភាពខ្លាំងក្លា រួមទាំងវិធីសាស្ត្រលួចលាក់ធ្វើសកម្មភាពកាន់តែមានភាពប្រែប្រួល និងស្មុគស្មាញឡើង។
ក្នុងរយៈពេលចុងក្រោយនេះកម្លាំងសមត្ថកិច្ចរបស់កម្ពុជាបានបង្ក្រាបការជួញដូរគ្រឿងញៀនចំនួន ២ ករណីធំៗ ដែលជាប់ព័ន្ធនឹងជនជាតិថៃ ដោយករណីទី ១ កាលពីថ្ងៃទី ២២ ខែតុលា ឆ្នាំ ២០២១ សមត្ថកិច្ចបានចុះបង្ក្រាប និងឃាត់ខ្លួន ជនសង្ស័យចំនួន ៣ ពាក់ព័ន្ធនឹងករណីជួញដូរគ្រឿងញៀនជាង ២៥ គីឡូក្រាមនៅខេត្តបន្ទាយមានជ័យ និងសៀមរាបដោយចាប់ខ្លួនបានជនជាតិថៃម្នាក់ និង ខ្មែរ ២ នាក់ ។
ករណី ១ ទៀត គឺកាលពីថ្ងៃទី ២២ ខែតុលា សមត្ថកិច្ចខេត្តកោះកុងបានបង្ក្រាបគ្រឿងជាង ២០០ គីឡូក្រាម ដែលត្រៀមនាំចេញទៅប្រទេសថៃ ដោយបានឃាត់ខ្លួនមេខ្លោងជាជនជាតិថៃចំនួន ២ នាក់ និងកម្មករខ្មែរ៥នាក់ក្នុងនោះមានស្រីម្នាក់។
បើតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀនរយ:ពេល ៩ ខែ កម្ពុជាចាប់ជនសង្ស័យសរុបប្រមាណជាង ១ ម៉ឺននាក់ (ជនជាតិខ្មែរ ៩ ៧៣១ នាក់និងជនបរទេស ២៧៧ នាក់)ក្នុងនោះ ករណីជួញដូររក្សាទុក ៦ ១៤១ នាក់,ករណីប្រើប្រាស់គ្រឿងញៀន ៣ ៨៤១ នាក់ , ករណីដាំដុះ ៩ នាក់ និងករណីកែច្នៃ ១៧ នាក់៕