.jpg)
នគរបាលត្រួតពិនិត្យវត្ថុតាងដែលជាល្បែងខុសច្បាប់។ រូបថត នគរបាល
ព្រះសីហនុៈ មនុស្ស ប្រុស-ស្រី១៦នាក់ ត្រូវបានឃាត់ខ្លួនកាលពីថ្ងៃទី៧ ខែវិច្ឆិកា ករណីលេងនិងបើកល្បែងបាញ់ត្រីខុសច្បាប់ ៣ទីតាំង ស្ថិតក្នុងភូមិ៣សង្កាត់លេខ៣ ក្រុង-ខេត្តព្រះសីហនុ។
លោកតី វិសាល អធិការនគរបាលក្រុងព្រះសីហនុប្រាប់ភ្នំពេញប៉ុស្តិ៍នៅរសៀលថ្ងៃទី៧វិច្ឆិកាថា ជនសង្ស័យទាំងនោះមានបុរសជាអ្នកលេងល្បែងចំនួន១០នាក់និងស្ត្រីអ្នកគ្រប់គ្រងទីតាំងចំនួន៦នាក់។
លោកថ្លែងថា៖«យើងបង្ក្រាបដោយសារល្បែងបាញ់ត្រីទាំងនេះខុសច្បាប់។ ក្រោយឃាត់ខ្លួនសមត្ថកិច្ចបានបញ្ជូនជនប្រុសស្រីទាំង១៦នាក់ទៅអធិការដ្ឋាននគរបាលក្រុងព្រះសីហនុដើម្បីធ្វើការស៊ើបសួរកសាងសំណុំរឿងបញ្ជូនទៅសាលាដំបូងខេត្តព្រះសីហនុចាត់ការតាមនីតិវិធីច្បាប់បន្តទៀត»។
លោកបន្តថាចំពោះវត្ថុតាងដែលសមត្ថកិច្ចដកហូតបានមានទូហ្គេមបាញ់ត្រីចំនួន៧ទូ និងទូផ្លែឈើចំនួន២។
លោក សេក សុជាតិ នាយកប្រតិបត្តិនៃអង្គការអភិវឌ្ឍន៍ផ្នត់គំនិត បានថ្លែងនៅរសៀលថ្ងៃទី៧ ខែវិច្ឆិកាថា សមត្ថកិច្ចគ្រប់គ្រងនៅតាមមូលដ្ឋានទាំងនោះ អាចរួមដៃជាមួយម្ចាស់អ្នករកស៊ីខុសច្បាប់ទាំងនោះ រកផលប្រយោជន៍រួមគ្នា៕
