ស្ទឹងត្រែងៈ នគរបាលខេត្តស្ទឹងត្រែង កំពុងបន្តស្វែងរកចាប់ខ្លួន ជនសង្ស័យក្នុងអំពើឃាតកម្ម ២ នាក់បន្ថែមទៀត ក្រោយពីជនសង្ស័យម្នាក់ ដែលត្រូវបានចាប់ខ្លួន កាលពីថ្ងៃទី ០៥ វិច្ឆិកា បានសារភាពថា ខ្លួននិងបក្ខពួក ២ នាក់ទៀត បានរួមដៃគ្នាពួនស្ទាក់វាយសម្លាប់បុរសម្នាក់ នៅកណ្ដាលព្រៃ កាលពីយប់ថ្ងៃទី ៣១ តុលា ។
លោក វ៉ា សុផាន់ ស្នងការរងខេត្តស្ទឹងត្រែង ទទួលបន្ទុកផ្នែកព្រហ្មទណ្ឌ បានប្រាប់ភ្នំពេញប៉ុស្តិ៍ថា កាលពីថ្ងៃទី ០២ វិច្ឆិកា លោក ភីម លៀម អាយុ ៥០ ឆ្នាំ ត្រូវបានក្រុមគ្រួសារ និងសាច់ញាតិ ប្រទះឃើញស្លាប់ នៅក្បែរមាត់អូរកណ្ដាលព្រៃស្ងាត់មួយកន្លែង ដែលស្ថិតនៅក្នុងភូមិសាស្ត្រ ឃុំកោះស្នែង ស្រុកបូរីអូរស្វាយសែនជ័យ បន្ទាប់ពីគាត់បានបាត់ខ្លួនពីផ្ទះចំនួន ៣ ថ្ងៃ។
ក្រោយពីទទួលបានសេចក្ដីរាយការណ៍ ពីការប្រទះឃើញសពជនរងគ្រោះ ក្រុមសមត្ថកិច្ចជំនាញ បានចុះទៅធ្វើកោលសល្យវិច្ច័យសាកសពជនរងគ្រោះ នៅនឹងកន្លែងកើតហេតុ ហើយបានពិនិត្យឃើញជនសង្ស័យ មានរបួសផ្នែកក្បាល ដែលនគរបាលជំនាញសន្និដ្ឋានថា ការស្លាប់របស់ជនរងគ្រោះជា «អំពើឃាតកម្ម» សម្លាប់ប្លន់យកទ្រព្យ ព្រោះសាច់ញាតិអះអាងថា ជនរងគ្រោះពេលចេញពីផ្ទះ បានជិះម៉ូតូមួយគ្រឿង។
លោកបានបញ្ជាក់ថា៖ «ក្រោយពីធ្វើការស្រាវជ្រាវ យ៉ាងស្ងប់ស្ងាត់ និងយ៉ាងម៉ត់ចត់បំផុតនោះ នៅថ្ងៃទី ០៥ វិច្ឆិកា ក្រុមកម្លាំងសមត្ថកិច្ចជំនាញយើង ក៏បានចាប់ឃាត់ខ្លួន បុរសសង្ស័យម្នាក់ឈ្មោះ ធា សុភា អាយុ ២៤ ឆ្នាំ ជាអ្នករស់នៅភូមិកោះហិប ឃុំកោះស្នែង ស្រុកបូរីអូរស្វាយសែនជ័យ។ ជនសង្ស័យបានសារភាពថា ពួកគេមានគ្នាបីនាក់»។
លោក សុផាន់ បានឱ្យដឹងទៀតថា តាមចម្លើយសារភាពរបស់ជនសង្ស័យ ជនរងគ្រោះឈ្មោះ ភឹម លៀម ចេះអំពើអាបធ្មប់ បានធ្វើអំពើឱ្យឪពុករបស់គេស្លាប់ កាលពីប៉ុន្មានឆ្នាំមុន ទើបនៅយប់ថ្ងៃទី ៣១ ខែតុលា ជនសង្ស័យ និងបក្ខពួក ២ នាក់ទៀត ដែលជាអ្នករស់នៅភូមិជាមួយគ្នា រួមមានឈ្មោះ លៀង ស៊ីដា អាយុ ២៨ ឆ្នាំ និង ឈ្មោះ សា សីហា អាយុ២៨ឆ្នាំ បានរួមគំនិតគ្នា ធ្វើសកម្មភាពពួនស្ទាក់វាយសម្លាប់ជនសង្ស័យក្នុងព្រៃនោះ ហើយនាំគ្នាយកម៉ូតូជិះរត់គេចពីភូមិ។
លោកបានលើកយកសម្ដីរបស់ជនសង្ស័យឈ្មោះ ធា សុភា មកបញ្ជាក់ទៀតថា «កាលពីប៉ុន្មានឆ្នាំមុន គាត់ [ជនរងគ្រោះ] បានធ្វើអំពើអាបធ្មប់ឱ្យពុកខ្ញុំស្លាប់»។
លោកបញ្ជាក់ថា៖ «យ៉ាងណាក៏ដោយ នោះគឺជាការចោទប្រកាន់ ដោយគ្មានភស្ដុតាង និងជាចម្លើយដោះសាររបស់ជនសង្ស័យប៉ុណ្ណោះ»។
លោក បានបន្តថា គ្មានអ្នកភូមិណាមួយអះអាងថា ជនរងគ្រោះ ចេះអំពើអាបធ្មប់នោះទេ ពីព្រោះជនរងគ្រោះគ្រាន់តែជាអ្នកនេសាទសាមញ្ញម្នាក់ប៉ុណ្ណោះ ហើយគាត់ក៏មិនធ្លាប់មានទំនាស់ជាមួយអ្នកភូមិណាម្នាក់ដែរ។
បើតាមលោក សុផាន់ ក្រុមមន្ត្រីនគរបាលជំនាញ បានកសាងសំណុំរឿងចោទប្រកាន់ជនសង្ស័យក្នុងបទល្មើស «ឃាតកម្មគិតទុកជាមុន» នឹងត្រៀមបញ្ជូនសំណុំរឿង និង ជនសង្ស័យ ទៅកាន់តុលាការនៅព្រឹកថ្ងៃទី ០៨ វិច្ឆិកា ដើម្បីចំណាត់ការបន្តតាមនីតិវិធី ហើយសមត្ថកិច្ចនឹងបន្តស្រាវជ្រាវ ស្វែងរកជនសង្ស័យ ២ នាក់ទៀត ដែលជាបក្ខពួក៕