ភ្នំពេញៈ បណ្ដាប្រទេសអាស៊ីបូព៌ា និងប៉ាស៊ីហ្វិក ក្នុងនោះក៏មានកម្ពុជាផងដែរប្រកាសប្តេជ្ញាបញ្ចប់អំពើហិង្សាលើកុមារ ក្នុងអំឡុងពេលនៃការរាតត្បាតជំងឺកូវីដ ១៩ និងរយៈពេលក្រោយមកទៀត ខណៈមានការប៉ាន់ប្រមាណថា មានកុមាររហូតដល់ ១ ពាន់លាននាក់នៅទូទាំងសកលលោក ជួបប្រទះអំពើហិង្សាក្នុងទម្រង់មួយចំនួនជារៀងរាល់ឆ្នាំ។
សេចក្តីប្រកាសព័ត៌មាន រួមគ្នារបស់អង្គការ UNICEF និងអង្គការ WHO ពីទីក្រុងបាងកក និងម៉ានីល ពីថ្ងៃទី ៥ វិច្ឆិកា បានឱ្យដឹងថាថ្នាក់ដឹកនាំ និងអ្នកតំណាងរដ្ឋាភិបាលពី ២៥ ប្រទេស នៅក្នុងតំបន់អាស៊ីបូព៌ា និងប៉ាស៊ីហ្វិកបានពង្រឹងការប្ដេជ្ញាចិត្តរបស់ខ្លួនក្នុងការបញ្ចប់អំពើហិង្សាលើកុមារ នៅក្នុងសន្និសីទតាមប្រព័ន្ធអនឡាញ ដែលមានរយៈពេល ៥ ថ្ងៃ ចន្លោះពីថ្ងៃទី ១ ដល់ថ្ងៃទី ៥ ខែវិច្ឆិកា។
សេចក្តីប្រកាសដដែលបន្តថា គណៈប្រតិភូកម្ពុជាមានវត្តមានចូលរួមប្រមាណជិត ៨០ រូប និងមានតំណាងមកពីស្ថាប័នជាតិ និងអន្តរជាតិជាច្រើនរូបទៀត។
សេចក្តីប្រកាសបញ្ជាក់ថា៖ «សន្និសីទរយៈពេល ៥ ថ្ងៃដែលត្រូវបានរៀបចំឡើងនៅក្នុងបរិបទនៃការរាតត្បាតជំងឺកូវីដ ១៩ នេះមានគោលបំណងបញ្ចប់អំពើហិង្សាលើកុមារនៅលើរបៀបវារៈនៃការស្ដារឡើងវិញ ស្របពេលអនុវត្តក្របខ័ណ្ឌនៃ យុទ្ធសាស្ត្រ INSPIRE: យុទ្ធសាស្ត្រទាំង ៧ សម្រាប់ការបញ្ចប់អំពើហិង្សាលើកុមារដែលត្រូវបានរៀបចំដោយ WHO យូនីសេហ្វ និងដៃគូដទៃទៀត ដើម្បីធ្វើសកម្មភាពនានាដោយផ្អែកលើភ័ស្តុតាង»។
ការប្រកាសនេះស្របពេលមានការប៉ាន់ប្រមាណថា មានកុមាររហូតដល់ ១ ពាន់លាននាក់នៅទូទាំងសកលលោកជួបប្រទះអំពើហិង្សាក្នុងទម្រង់មួយចំនួនជារៀងរាល់ឆ្នាំ ក្នុងនោះរួមមានអំពើហិង្សាលើផ្លូវកាយ និងផ្លូវភេទ ការមិនអើពើ ព្រមទាំងការធ្វើទុក្ខបុកម្នេញ។ អំពើហិង្សាកើតឡើងនៅទីកន្លែងជាច្រើន រួមមាននៅផ្ទះសាលារៀន សហគមន៍ និងតាមប្រព័ន្ធអនឡាញ និងត្រូវបានប្រព្រឹត្តដោយសមាជិកគ្រួសារ ដៃគូស្និទ្ធស្នាល គ្រូបង្រៀន អ្នកជិតខាង និងជនចម្លែក ខណៈអំពើហិង្សាបែបនេះបង្កគ្រោះថ្នាក់ ធ្វើឱ្យមានការឈឺចាប់ និងភាពអាម៉ាស់ចំពោះកុមារ ហើយអំពើហិង្សាក៏ធ្វើឱ្យកុមារស្លាប់ផងដែរ។
UNICEF ឱ្យដឹងថា តាមទិន្នន័យពីការអង្កេតនានាបង្ហាញដូចៗគ្នាថាប្រេវ៉ាឡង់នៃអំពើហិង្សាលើកុមារនៅផ្ទះបានកើនឡើងគួរឱ្យកត់សម្គាល់ចាប់តាំងពីការចាប់ផ្ដើមនៃជំងឺរាតត្បាតកូវីដ ដោយសារការដាក់វិធានការរាំងខ្ទប់ និងការបិទសាលារៀន។
UNICEF បញ្ជាក់ថា៖ «កុមារប្រមាណ ៣៧៥ លាននាក់ នៅអាស៊ីបូព៌ា និងប៉ាស៊ីហ្វិក បានប្រឈមមុខនឹងការបិទសាលារៀនអស់រយៈពេលច្រើនជាង ៣០ ថ្ងៃ ហើយការរៀនសូត្រតាមប្រព័ន្ធអនឡាញបានក្លាយទៅជាសមាសធាតុយ៉ាងចាំបាច់នៃការអប់រំ និងការភ្ជាប់ទំនាក់ទំនងសង្គមសម្រាប់កុមារជាច្រើននៅក្នុងទូទាំងតំបន់នេះ»។
លោក Takeshi Kasai នាយកប្រចាំតំបន់នៃ WHO សម្រាប់តំបន់ប៉ាស៊ីហ្វិកខាងលិចថ្លែងថា ខណៈយើងឈានទៅបញ្ចប់ឆ្នាំ ២០២១ យើងបានកំណត់ឃើញមេរៀនសំខាន់ៗជាច្រើន។ លោកថា៖ «មេរៀនមួយ គឺសេចក្ដីត្រូវការក្នុងការធានាថា កុមារមិនត្រូវបានទុកចោលហើយកិច្ចខិតខំប្រឹងប្រែងទប់ស្កាត់ និងឆ្លើយតបចំពោះអំពើហិង្សា គឺជាស្នូលនៃយុទ្ធសាស្ត្រឆ្លើយតបចំពោះជំងឺកូវីដ ១៩ និងយុទ្ធសាស្ត្រស្ដារឡើងវិញ»។
ចំណែកលោក Marcoluigi Corsi នាយកស្តីទីយូនីសេហ្វ ប្រចាំតំបន់អាស៊ីបូព៌ា និងប៉ាស៊ីហ្វិកថ្លែងដែរថា អំពើហិង្សាលើកុមារអាចទប់ស្កាត់បាន។ មានភ័ស្តុតាងកាន់តែច្រើនអំពីអ្វីដែលដំណើរការទៅបាននៅក្នុងការទប់ស្កាត់ និងឆ្លើយតបប្រកបដោយប្រសិទ្ធភាពចំពោះអំពើហិង្សាលើកុមារនៅគ្រប់ទីកន្លែង។
លោកបញ្ជាក់ថា៖ «អ្វីដែលត្រូវការ គឺឆន្ទៈនយោបាយក្នុងការប្រែក្លាយភ័ស្តុតាងនេះនៅជាចំណាត់ការសម្រាប់កុមារ ហើយយើងស្វាគមន៍ចំពោះការប្តេជ្ញាចិត្ត ដែលថ្នាក់ដឹកនាំរដ្ឋាភិបាល និងមេដឹកនាំក្នុងតំបន់នេះបានធ្វើឡើង»។
លោក តូច ចាន់នី អ្នកនាំពាក្យក្រសួងសង្គមកិច្ចប្រាប់ ភ្នំពេញ ប៉ុស្តិ៍ នៅថ្ងៃទី ៧ វិច្ឆិកាថា កម្ពុជាបានចូលរួមការប្តេជ្ញាចិត្តក្នុងការបញ្ចប់អំពើហិង្សាលើកុមារអំឡុងពេលនៃការរាតត្បាតជំងឺកូវីដ និងរយៈពេលក្រោយមកទៀតដោយការដាក់ចេញនូវកម្មវិធីជាច្រើន ដើម្បីគាំទ្រដល់កុមារ។
លោកបញ្ជាក់ថា៖ «កម្ពុជាយើងនឹងអាចរួមចំណែកកាត់បន្ថយអំពើហិង្សាលើកុមារ។ នៅពេលនេះក្រសួងសង្គមកិច្ចរួមទាំងស្ថាប័នពាក់ព័ន្ធកម្ពុជាកំពុងតែបង្កើតកិច្ចការងារជាច្រើនលើបញ្ហាទាំងនេះ»៕