.jpg)
ការសម្ដែងរបាំព្រះរាជទ្រព្យនៅសាលចតុមុខ កាលពីឆ្នាំ ២០១៩។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន ប្រកាសអបអរសាទរខួប ១៨ ឆ្នាំនៃរបាំព្រះរាជទ្រព្យ បន្ទាប់ពីត្រូវបានចុះក្នុងបញ្ជីជាសម្បត្តិបេតិកភណ្ឌវប្បធម៌អរូបីនៃមនុស្សជាតិ។ ចំណែកក្រសួងវប្បធម៌នៅតែទទូចដល់ពលរដ្ឋឱ្យមានការយកចិត្តទុកដាក់ថែរក្សាការពារ និងលើកស្ទួយវប្បធម៌ជាតិ។
លោក ហ៊ុន សែន បានសរសេរនៅលើទំព័រហ្វេសប៊ុករបស់លោកយ៉ាងដូច្នេះថា ថ្ងៃទី ៧ ខែ វិច្ឆិកា ឆ្នាំ ២០២១ គឺជាខួបទី១៨ ឆ្នាំហើយ ដែលកម្ពុជាបានចុះបញ្ជី “របាំព្រះរាជទ្រព្យ” ជាសម្បត្តិបេតិកភណ្ឌដ៏មានតម្លៃមិនអាចកាត់ថ្លៃបានរបស់ព្រះរាជាណាចក្រកម្ពុជាតែមួយគត់ ដែលបានថែរក្សានាដកម្មបុរាណមួយនេះ អស់រយៈពេលដ៏យូរលង់ណាស់មកហើយ។
លោកបានបន្ថែមថា របាំព្រះរាជទ្រព្យត្រូវបានចុះក្នុងបញ្ជីជាសម្បត្តិបេតិកភណ្ឌវប្បធម៌អរូបីនៃមនុស្សជាតិ នៅថ្ងៃទី ៧ ខែ វិច្ឆិកា ឆ្នាំ ២០០៣ នៅទីក្រុងអ៊ីស្តង់ប៊ុល ប្រទេសតួកគី។ របាំក្បាច់ខ្មែរបុរាណ ឬរបាំព្រះរាជទ្រព្យនេះ គឺជាទម្រង់របាំសក្ការ:មានភាពល្បីល្បាញខាងកាយវិការទន់ភ្លន់ គួរឱ្យចង់គយគន់ និងមានទ្រង់គ្រឿងចាំងភ្លឺផ្លេកៗ។
លោកថ្លែងថា៖ «របាំព្រះរាជទ្រព្យ របាំក្បាច់បុរាណខ្មែរ ជាប្រភេទរបាំ ដែលនាដករ ប្រើចលនាកាយវិការ ក្បាច់ និងមនោសញ្ចោតនាយ៉ាងប៉ិនប្រសប់ទៅតាមការវិវឌ្ឍនៃសាច់រឿង ដែលរៀបរាប់បញ្ជាក់ដោយទំនុកច្រៀងនៃក្រុមចម្រៀងជាពួកនឹងត្រូវបានប្រគំដោយវង់ភ្លេងពិណពាទ្យ ដែលមានតួនាទីប្រគំជូនរបាំនេះផងដែរ»។
លោក ឡុង ប៉ុណ្ណាស៊ីរីវត្ថ អ្នកនាំពាក្យក្រសួងវប្បធម៌ និងវិចិត្រសិល្បៈ ថ្លែងនៅថ្ងៃទី ៧ វិច្ឆិកាថា ជារៀងរាល់ឆ្នាំ ក្រសួងតែងរៀបចំពិធីផ្សព្វផ្សាយធំមួយដោយមានការចូលរួមពីសិល្បកររបាំបុរាណ ដើម្បីបង្ហាញដល់សាធារណជនឱ្យស្គាល់ពីរបាំព្រះរាជទ្រព្យ។ ប៉ុន្តែឆ្នាំនេះខកខានពិធីជួបជុំ ដោយសារតែការរាតត្បាតជំងឺកូវីដ ១៩ ដោយក្រសួងគ្រាន់តែធ្វើជាវីដេអូឯកសារខ្លីៗសម្រាប់បង្ហាញលើបណ្តាញសង្គម ដើម្បីចូលរួមអបអរខួបលើកទី ១៨ នេះ។
លោកបញ្ជាក់ថា៖ «បើទោះជាគ្មានអ្វីមកវាស់ស្ទង់បានជាក់លាក់អំពីកំណើននៃការចូលរួមរបស់យុវជនខ្មែរ ក្នុងការការពារសម្បត្តិបេតិកភណ្ឌជាតិ ប៉ុន្តែបច្ចុប្បន្នប្រជាពលរដ្ឋខ្មែរ ជាពិសេសយុវជនខ្មែរបានចូលរួមយ៉ាងសកម្មក្នុងការថែរក្សា ដោយស្តែងឡើងតាមរយៈចូលរួមគ្រប់កម្មវិធីដែលបានបង្កើតឡើងសម្រាប់ផ្សព្វផ្សាយអំពីសិល្បៈវប្បធម៌ខ្មែរ»។
លោក ប៉ុណ្ណា ស៊ីរីវត្ថ ក៏អំពាវនាវដល់ប្រជាពលរដ្ឋ ជាពិសេស យុវជនចូលរួមស្វែងយល់សម្បត្តិវប្បធម៌ដ៏មានតម្លៃរបស់ខ្មែរ និងត្រូវរក្សាការពារឱ្យបានគង់វង្សកុំឱ្យបាត់បង់ សម្រាប់មនុស្សជំនាន់ក្រោយបន្តទៀត។ លោកបារម្ភថា បើវប្បធម៌បាត់បង់ និងមិនត្រូវបានលើកតម្កើងនឹងធ្វើឱ្យប៉ះពាល់ដល់ជាតិទាំងមូល ដូចទ្រឹស្តីមួយពោលថា វប្បធម៌រលត់ ជាតិរលាយ។
លោកថ្លែងថា៖ «១ ឆ្នាំទៅ ១ ឆ្នាំ គឺយើងតែងតែអំពាវនាវឱ្យយុវជនចូលរួមក្នុងការថែរក្សាការពារលើកស្ទួយ ហើយបើគាត់អាចចូលរួមជាសកម្មភាពបានទៀតគឺកាន់តែល្អ។ ការចូលរួមនេះ គឺមិនមែនតែស្ថាប័នណាមួយ ឬនរណាម្នាក់ទេចំពោះវប្បធម៌ គឺយើងត្រូវការការចូលរួមទាំងអស់គ្នា»៕
