មណ្ឌលគិរីៈ លោក សី ទូច ប្រធានមន្ទីរវប្បធម៌ និងវិចិត្រសិល្បៈ ខេត្តមណ្ឌលគិរី ថ្លែងនៅថ្ងៃទី ៧ ខែវិច្ឆិកាថា ជនខិលខូចបានលួចទៅចូលកាប់រានទន្ទ្រានដីមជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំ ក្នុងពេលមានភ្លៀងខ្លាំងជាប់ៗគ្នារយៈពេលជាច្រើនថ្ងៃកន្លងមក។
លោកថា កាលពីថ្ងៃទី ៦ ខែវិច្ឆិកា មន្ទីរវប្បធម៌ និងអាជ្ញាធរមូលដ្ឋានបានសហការជាមួយជនជាតិដើមភាគតិចក្នុងខេត្តមណ្ឌលគិរីចុះទៅពិនិត្យទីតាំងនោះ ជាក់ស្តែងឃើញមានការកាប់រានដីព្រៃប្រមាណជាង ២ ហិកតា។
លោកថ្លែងថា៖ «ខ្ញុំកំពុងស្រាវជ្រាវរឿងហ្នឹង ហើយនៅថ្ងៃទី ៨ ខែវិច្ឆិកានេះ ខ្ញុំនឹងបញ្ជូនសំណុំរឿងទៅតុលាការ។ យើងសោកស្តាយដែលបានបាត់ដើមឈើ ហើយយើងនឹងដាំស្តារឡើងវិញផងដែរនៅទីតាំងនោះ»។
លោក សី ទូច បញ្ជាក់ថា មន្ទីរវប្បធម៌ខេត្តមណ្ឌលគិរីមានបង្គោលបេតិកភណ្ឌចំនួន ៤៧ បង្គោល ប៉ុន្តែមិនអាចបោះបានដោយសារតែបញ្ហានៅមិនទាន់ដោះស្រាយចប់។
លោកថ្លែងថា៖ «បង្គោលបេតិកភណ្ឌវប្បធម៌យើងមានហើយ ប៉ុន្តែយើងអត់បានបោះទេ ដោយសារវានៅមានបញ្ហា ខ្លាចបោះទៅចូលដីយើងខ្លួនឯង ឬក៏ទៅប៉ះពាល់ដីគេ អ៊ីចឹងយើងបោះបង្គោលតម្រុយ»។
លោក គ្រើង តុលា អ្នកប្រឹក្សាយោបល់ក្រុមការងារបណ្តាញសហគមន៍ជនជាតិដើមភាគតិច ថ្លែងនៅថ្ងៃទី ៧ ខែវិច្ឆិកាថា ការកាប់រានទន្ទ្រានដីរដ្ឋជាអំពើក្បត់ជាតិបំផ្លាញជាតិខ្លួនឯង ព្រោះដីនោះមិនមែនជាដីសម្រាប់ទិញលក់នោះទេ គឺជាដីសម្រាប់អភិរក្ស ការពារដើម្បីបង្កើតជាតំបន់ទេសចរណ៍វប្បធម៌ សារមន្ទីរវប្បធម៌ សាលប្រជុំវប្បធម៌ និងការគោរពបូជា ជំនឿសាសនាផ្សេងៗផងដែរ៕