.jpg)
ក្រុមក្មេងទំនើងក្រោយសមត្ថកិច្ចនគរបាលឃាត់ខ្លួន កាលពីថ្ងៃទី ៧ វិច្ឆិកា ។ រូបថត ប៉ូលិសខេត្តកំពង់ស្ពឺ
កំពង់ស្ពឺៈ ក្មេងទំនើងចំនួន ២៣ នាក់ ត្រូវបានសមត្ថកិច្ចឱ្យធ្វើកិច្ចសន្យា និងធ្វើការអប់រំរួចឱ្យឪពុកម្ដាយមកធានា យកទៅផ្ទះវិញ បន្ទាប់ពីឃាត់ខ្លួនកាលពីថ្ងៃទី ៧វិច្ឆិកា នៅស្រុកចំនួន ២ ក្នុងខេត្តកំពង់ស្ពឺ ពាក់ព័ន្ធនឹងករណីបង្កការអុកឡុកនៅក្នុងភូមិ។
លោក ខឹម សាម៉ុន អធិការនគរបាលស្រុកឧដុង្គប្រាប់នៅរសៀលថ្ងៃទី ៨ វិច្ឆិកាថា សមត្ថកិច្ចរបស់លោកបានឃាត់ក្រុមយុវជនទំនើងចំនួន ១៣ នាក់ ដោយសារពួកគេដើរអុកឡុកបង្កការរំខានតាមភូមិក្នុងភូមិសាស្ត្រស្រុកឧដុង្គ។
លោកបានបន្តថា ពួកក្មេងទំនើងទាំងនោះច្រើនតែបង្កការរំខានដូចជា ប្រើកាំបិតផ្គាក់ និងដាវធ្វើសកម្មភាពអូសនៅតាមដងផ្លូវថ្នល់។សកម្មភាពបែបនេះមើលទៅដូចជា មនុស្សគ្មានសីលធម៌ គ្មានការអប់រំ និងបង្កភាពគ្មានសណ្តាប់ធ្នាប់នៅក្នុងមូលដ្ឋាន។
លោក សា ម៉ុន បានថ្លែងថា៖ «យើងមិនចង់ឃើញភាពគ្មានសណ្តាប់ធ្លាប់នេះទេហើយថា ពួកគេនឹងកែប្រែចិត្តគំនិតមិនគួរគប្បីនេះ»។
លោកបានបញ្ជាក់ថា យុវជនទាំង ១៣ នាក់នោះ ត្រូវសមត្ថកិច្ចរបស់លោកចាប់កោរសក់ និងហៅឪពុកម្តាយពួកគេមកធ្វើកិច្ចសន្យានៅចំពោះមុខសមត្ថកិច្ចទើបអនុញ្ញាតឱ្យត្រឡប់ទៅផ្ទះវិញ។
ចំណែកវត្ថុតាងដែលដកហូតពីពួកគេរួមមាន ដាវដែកចំនួន ៤ ដើម, កាំបិតផ្គាក់ ១ ដើម កូនកាំបិតចុងស្រួច ១។
ដោយឡែកលោក ឃុត សុផល អធិការនគរបាល ស្រុកសំរោងទង បានឱ្យដឹងនៅរសៀលថ្ងៃទី ៨ វិច្ឆិកាដែរថា ពាក់ព័ន្ធក្មេងអត់សណ្តាប់ធ្នាប់នេះសមត្ថកិច្ចរបស់លោកក៏បានឃាត់ខ្លួនបានចំនួន ១០ នាក់ផងដែរ។ ការឃាត់នេះដោយសារពួកគេជិះម៉ូតូឆាបបង្អើលមនុស្សក្នុងពិធីបុណ្យកឋិនទានមួយកាលពីថ្ងៃទី ៧ វិច្ឆិកា។
លោកបន្តថា ក្រោយឃាត់ខ្លួនសមត្ថកិច្ចរបស់លោកបានហៅឪពុកម្តាយរបស់យុវជនទាំង ១០ នាក់នោះ មកធ្វើកិច្ចសន្យាកុំឱ្យប្រព្រឹត្តអំពើគ្មានសណ្តាប់ធ្នាប់តទៅទៀត។
លោកបញ្ជាក់ថា៖ «ឈ្មោះយុវជនទំនើងទាំង ១០ នាក់នោះ យើងកត់នៅក្នុងបញ្ជីក្មេងទំនើងទុករួចហើយ»។ លោកថា ពួកគេត្រូវសមត្ថកិច្ចបង្គាប់ឱ្យលុតជង្គង់សំពះសុំទោសឪពុកម្តាយនៅចំពោះមុខសមត្ថកិច្ចមុនអនុញ្ញាតឱ្យត្រឡប់ទៅផ្ទះរៀងៗខ្លួនវិញ៕
