.jpg)
សកម្មភាពសមត្ថកិច្ចចុះពិនិត្យទីតាំងរំលោភសម្លាប់កុមារីកាលពីថ្ងៃទី ៨ វិច្ឆិកា។ រូបថត ហ្វេសប៊ុក
ព្រៃវែងៈ នគរបាលស្រុកព្រះស្តេច និងនគរបាលខេត្តខេត្តព្រៃវែង នៅថ្ងៃទី ៨ វិច្ឆិកា កំពុងស្រាវជ្រាវករណីរំលោភសម្លាប់កុមារីអាយុ ១២ ឆ្នាំម្នាក់ នៅឃុំ-ស្រុកព្រះស្តេចខេត្តព្រៃវែង បន្ទាប់ពីអ្នកភូមិរកឃើញសា្លប់កាលពីថ្ងៃទី ៧ វិច្ឆិកា។
លោក សន សំអឿន នាយប៉ុស្តិ៍នគរបាលឃុំព្រះស្តេចប្រាប់ ភ្នំពេញ ប៉ុស្តិ៍ នៅរសៀលថ្ងៃទី ៨ វិច្ឆិកាថា ករណីឃាតកម្មរំលោភសម្លាប់ក្មេងស្រីឈ្មោះផ.ន អាយុ ១២ ឆ្នាំ ពេលនេះសមត្ថកិច្ចខេត្តព្រៃវែងរួមទាំងនគរបាលស្រុកព្រះស្តេច កំពុងបន្តស្រាវជ្រាវដើម្បីកំណត់អត្តសញ្ញាណជនល្មើស។
លោកថា៖ «នៅពេលនេះកម្លាំងសមត្ថកិច្ចកំពុងបើកការស៊ើបអង្កេតហើយ។ក្មេងស្រីរងគ្រោះពិតជារងការរំលោភសម្លាប់»។
លោក សំអឿន បានរៀបរាប់ថា ក្មេងស្រីរងគ្រោះរស់នៅជាមួយម្តាយជាស្ត្រីមេម៉ាយក្នុងឃុំកើតហេតុខាងលើ។ ដោយឡែកនៅថ្ងៃទី ៦ វិច្ឆិកា នៅក្នុងភូមិដែលស្ថិតក្នុងឃុំព្រះស្តេច ម្តាយក្មេងរងគ្រោះបានទៅចូលរួមក្នុងពិធីជួបជុំច្រៀងជាមួយអ្នកជិតខាង។
ប៉ុន្តែគាត់មិនបានចាប់អារម្មណ៍ទៅលើកូនទេ ហើយពេលត្រឡប់មកវិញក៏បាត់កូននិងនាំគ្នាដើររក។ លុះដល់ថ្ងៃទី ៧ វិច្ឆិកា អ្នកភូមិបាននាំគ្នាជួយដើររក ហើយក៏ប្រទះឃើញក្មេងរងគ្រោះស្លាប់ក្នុងទឹកនៅវាលស្រែដែលមានចម្ងាយពីផ្ទះរបស់ក្មេងរងគ្រោះប្រហែល ៣០០ ម៉ែត្រ។
លោកបន្តទៀតថា ក្រោយពីប្រទះឃើញសពកូន ម្តាយក្មេងរងគ្រោះបានរត់មកប្តឹងនគរបាលប៉ុស្តិ៍របស់លោក។ភ្លាមៗនោះលោកបានរាយការណ៍ទៅនគរបាលស្រុកព្រះស្តេចហើយកម្លាំងសមត្ថកិច្ចចម្រុះបានចុះដល់ទីតាំងដែលកុមារីស្លាប់។
ទោះយ៉ាងណា លោក សន សំអឿន មិនបានប្រាប់លម្អិតពីបញ្ហានេះទេ ប៉ុន្តែបើតាមមន្ត្រីនគរបាលនៃអធិការដ្ឋាននគរបាលស្រុកព្រះស្តេចមួយរូបសុំមិនបញ្ចេញឈ្មោះប្រាប់នៅរសៀលថ្ងៃទី ៨វិច្ឆិកាថា សពកុមារីរងគ្រោះត្រូវបានសមត្ថកិច្ចជំនាញបច្ចេកទេសវិទ្យាសាស្ត្រខេត្ត និងគ្រូពេទ្យខេត្តព្រៃវែង ដែលចុះដល់កន្លែងកើតហេតុពិនិត្យឃើញថា មានបាក់ឆ្អឹងក ដាច់រលាត់ស្បែកកំភួនដៃខាងស្តាំ ១ កន្លែង ដាច់រលាត់ស្បែកលើក្បាលជង្គង់ឆ្វេង ១ កន្លែង និងមានស្នាមដាច់រយះប្រដាប់ភេទផងដែរ៕
