ត្បូងឃ្មុំៈ នាយនគរបាលប៉ុស្ដិ៍រដ្ឋបាលឃុំនាងទើត លោក ឆេង ធិ ត្រូវបានរដ្ឋបាលស្រុកតំបែរ ខេត្តត្បូងឃ្មុំ កោះហៅឱ្យចូលបំភ្លឺករណីប្រើអាកប្បកិរិយា និងសម្ដីអសុរោះធ្វើឱ្យបែកបាក់សាមគ្គីរវាងអាជ្ញាធរ និងពលរដ្ឋក្នុងមូលដ្ឋាន។ នេះបើតាម លោក សុខ សារិទ្ធ អភិបាលស្រុកតំបែរ កាលពីរសៀលថ្ងៃទី ៨ ខែ វិច្ឆិកា ឆ្នាំ ២០២១។
លោកបានប្រាប់ ភ្នំពេញ ប៉ុស្តិ៍ថា កាលពីថ្ងៃទី ៩ ខែ កក្កដា ឆ្នាំ ២០២១ មេភូមិ និងអនុភូមិទាំង ៥ នៃឃុំនាងទើត បានធ្វើលិខិតរួមគ្នា ១ ច្បាប់ស្នើសុំឱ្យរដ្ឋបាលស្រុកតំបែរ ជួយអន្តរាគមន៍ ដើម្បីផ្លាស់ប្ដូរភារកិច្ច លោក ឆេង ធិ នាយនគរបាលប៉ុស្តិ៍រដ្ឋបាលឃុំនាងទើតដោយបានចោទប្រកាន់ថាបានប្រើប្រាស់អាកប្បកិរិយា និងពាក្យពេចន៍អសុរោះ និងមានលក្ខណៈបែបញុះញង់បំបែកបំបាក់សាមគ្គីផ្ទៃក្នុងរវាងអាជ្ញាធរ និងពលរដ្ឋក្នុងមូលដ្ឋាន។
លោក សារិទ្ធ បានបញ្ជាក់ថា៖ «ខ្ញុំបានបង្កើតក្រុមគណៈកម្មការមួយធ្វើការស្រាវជ្រាវ ស៊ើបអង្កេតលើករណីនេះ ដោយបានកោះហៅមេភូមិម្ដងមួយៗមកសាកសួរ ហើយកាលពីថ្ងៃម្សិលមិញ [ថ្ងៃទី ៧ ខែ វិច្ឆិកា ឆ្នាំ ២០២១] ក្រុមគណៈកម្មការយើងបានកោះអញ្ជើញឱ្យលោក ឆេង ធិ ឱ្យចូលឆ្លើយបំភ្លឺផ្ទាល់មាត់»។
លោកបានបន្ថែមថា៖ «នៅចំពោះមុខក្រុមគណៈកម្មការយើង លោក ឆេង ធិ បានទទួលស្គាល់ថា មានពេលខ្លះគាត់បានប្រើកាយវិការ និងពាក្យពេចន៍មិនពីរោះស្ដាប់ពិតប្រាកដមែន ប៉ុន្តែក្នុងចេតនាល្អគឺចង់ឱ្យអាជ្ញាធរមូលដ្ឋានភូមិ-ឃុំ មានការពង្រឹងការអនុវត្តច្បាប់ប្រកបដោយការទទួលខុសត្រូវខ្ពស់បំផុត»។
បើតាម លោក សារិទ្ធ នៅពេលនេះ ក្រុមគណៈកម្មការចម្រុះនៃរដ្ឋបាលស្រុកតំបែរនៅមិនទាន់សម្រេចថា នឹងផ្លាស់ប្ដូរភារកិច្ច លោក ឆេង ធិ ទៅតាមសេចក្ដីស្នើរបស់មេភូមិ និងអនុភូមិទាំង ៥ នៃឃុំនាងទើតនោះទេ ប៉ុន្តែករណីនេះក៏នៅមិនទាន់បិទបញ្ចប់នៅឡើយដែរ។
លោកថា គណៈកម្មការចម្រុះនៃរដ្ឋបាលស្រុកតំបែរ នៅតែបន្តនីតិវិធីស្រាវជ្រាវបន្ថែមទៀតលើករណីនេះ ដោយគ្រោងនឹងកោះហៅប្រធានក្រុមប្រឹក្សាឃុំនាងទើត និងស្មៀនឃុំនេះមកសួរនាំបន្ថែមទៀត និងគ្រោងចុះស្រង់មតិប្រជាពលរដ្ឋនៅក្នុងមូលដ្ឋាន មុនពេលសម្រេចចិត្តថា គួរផ្លាស់ប្ដូរភារកិច្ចរបស់លោក ឆេង ធិ ឬយ៉ាងណានោះ។
ទោះយ៉ាងណា លោក ស៊ូ មិន មេភូមិខ្ទុរ ក្នុងចំណោមមេភូមិទាំង ៥ នៃឃុំនាងទើតបានប្រាប់ ភ្នំពេញ ប៉ុស្តិ៍ថា មកទល់ពេលនេះ លោក និងមេភូមិ និងអនុភូមិទាំងអស់នៅទូទាំងឃុំនាងទើត មិនសប្បាយចិត្តនឹងធ្វើការជាមួយបុគ្គលឈ្មោះ ឆេង ធិ នោះទេ ហើយនៅតែប្រកាន់ជំហរស្នើសុំឱ្យរដ្ឋបាលស្រុកតំបែរ ខេត្តត្បូងឃ្មុំជួយផ្ទេរភារកិច្ចបុគ្គលខាងលើនេះទៅបម្រើការនៅឃុំផ្សេងហើយជ្រើសរើស ឬតែងតាំងមន្ត្រីនគរបាលផ្សេងមកជំនួសវិញ។
លោក ស៊ូ មិន បានបញ្ជាក់ថា៖ «យើងមិននិយាយពីកំហុសឆ្គងអ្វីច្រើនទៀតដែលបុគ្គលនេះ [ឆេង ធិ] បានប្រព្រឹត្តនាពេលកន្លងមកនោះទេ។ យើងសុំឱ្យតែរដ្ឋបាលស្រុកតំបែរពិនិត្យនូវខ្លឹមសារដែលយើងខ្ញុំបានរៀបរាប់ក្នុងលិខិតស្នើសុំអន្តរាគមន៍ផ្លាស់ប្ដូរផ្ទេរភារកិច្ច បុគ្គលនេះចេញពីមូលដ្ឋានឃុំនាងទើត ហើយជ្រើស ឬតែងតាំងមន្ត្រីដែលល្អមកជំនួសវិញ»។
ជុំវិញករណីនេះ លោក ឆេង ធិ បានប្រាប់ភ្នំពេញប៉ុស្តិ៍យ៉ាងខ្លីថា៖ «ខ្ញុំគ្មានអ្វីនិយាយបន្ថែមក្រៅពីការគោរពអនុវត្តតាមបទបញ្ជា និងសេចក្ដីសម្រេចរបស់ថ្នាក់ដឹកនាំប៉ុណ្ណោះ»៕