ភ្នំពេញៈ នគរបាលព្រហ្មទណ្ឌកម្រិតស្រាលរាជធានីភ្នំពេញកំពុងរៀបចំបញ្ជូនក្រុមយុវជនជាចោរប្លន់ និងអ្នកទទួលទិញម៉ូតូពីចោរសរុបចំនួន ៥ នាក់ទៅតុលាការរាជធានីភ្នំពេញនៅថ្ងៃទី ៩ វិច្ឆិកានេះ បន្ទាប់ពីស្រាវជ្រាវចាប់ខ្លួនបានកាលពីយប់ថ្ងៃទី ៦ វិច្ឆិកា នៅសង្កាត់ព្រៃវែង ខណ្ឌដង្កោ រាជធានីភ្នំពេញ។
លោក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញឱ្យដឹងនៅថ្ងៃទី ៨ វិច្ឆិកាថា ក្រុមចោរប្លន់រួមទាំងអ្នកទទួលទិញផលចោរកម្មសរុបចំនួន ៥ នាក់ គឺជាក្រុមប្លន់យ៉ាងសកម្ម ហើយក៏ស្ថិតក្នុងវ័យជាយុវជនដែរ។ ពួកគេនឹងត្រូវសមត្ថកិច្ចរបស់លោកបញ្ជូនបន្តទៅសាលាដំបូងរាជធានីនៅថ្ងៃទី ៩ វិច្ឆិកានេះហើយ។
លោកបានប្រាប់ថា៖ «ពួកគេត្រូវបញ្ជូនទៅតុលាការ តែនៅថ្ងៃនេះ (ថ្ងៃទី ៨ វិច្ឆិកា) បញ្ជូនទៅមិនទាន់ទេ»។
លោក ជាង ហុកសែ អធិការរងទទួលការងារនគរបាលព្រហ្មទណ្ឌខណ្ឌដង្កោ បានប្រាប់ ភ្នំពេញ ប៉ុស្ដិ៍ នៅថ្ងៃទី ៨ វិច្ឆិកាថា ក្នុងចំណោមជនសង្ស័យទាំង ៥ នាក់នេះ គឺមានម្នាក់ជាអ្នកចាំទទួលទិញផលចោរកម្ម រីឯ ៤ នាក់ជាក្រុមចេញធ្វើសកម្មភាពប្លន់។ មុនពេលចាប់ខ្លួនគឺពួកគេបានធ្វើសកម្មភាពប្លន់នៅក្នុងភូមិសាស្ត្រ សង្កាត់ព្រៃវែង ខណ្ឌដង្កោ រាជធានីភ្នំពេញ កាលពីថ្ងៃទី ១ ខែវិច្ឆិកា ឆ្នាំ ២០២១។
លោកបានឱ្យដឹងថា នៅថ្ងៃដដែលនោះ បន្ទាប់ពីកើតហេតុគឺសមត្ថកិច្ចជំនាញខណ្ឌដង្កោបានស្រាវជ្រាវដោយមានកិច្ចសហការជាមួយនគរបាលព្រហ្មទណ្ឌកម្រិតស្រាលរាជធានីភ្នំពេញ។ លុះដល់នៅយប់ថ្ងៃទី ៦ វិច្ឆិកា សមត្ថកិច្ចក៏បានឃាត់ខ្លួនពួកគេ នៅចំណុចភូមិព្រៃវែងលិច សង្កាត់ព្រៃវែង ខណ្ឌដង្កោ រាជធានីភ្នំពេញ។
លោកបានបន្តទៀតថា នៅពេលឃាត់ខ្លួនក្រុមជនសង្ស័យទាំងនោះ សមត្ថកិច្ចដកហូតម៉ូតូបានចំនួន ២ គ្រឿង ម៉ាកហុងដ្រាឌីមស៊េរីឆ្នាំ ២០២២ និងម៉ូតូម៉ាកហុងដ្រាឌីមស៊េរីឆ្នាំ ២០១៨ ដែលពួកគេប្លន់បាន ហើយបានប្រគល់ឱ្យទៅជនរងគ្រោះ ២ នាក់វិញហើយ។
លោកបានបញ្ជាក់ថា៖ «ករណីនេះខាងព្រហ្មទណ្ឌកម្រិតស្រាលរាជធានីភ្នំពេញគាត់ជាអ្នកជួយស្រាវជ្រាវយើង។
ហេតុដូច្នេះយើងបាន ប្រគល់ជនសង្ស័យឱ្យគាត់កសាងសំណុំរឿងតាមនីតិវិធីបញ្ជូនទៅតុលាការ ព្រោះខាងគាត់ជាកម្លាំងជំនាញ»៕