.jpg)
អ្នកចូលរួមសិក្ខាសាលាស្តីពី «ការអប់រំខ្ញុំ អនាគតខ្ញុំ» ពីថ្ងៃទី ៧ វិច្ឆិកា។ រូបថត វិទ្យាស្ថានតេជោសែន សាធារណការ
កណ្តាលៈ ក្រសួងសាធារណការ និងដឹកជញ្ជូនបានរៀបចំសិក្ខាសាលាតាមប្រព័ន្ធអនឡាញក្រោមប្រធានបទ «ការអប់រំខ្ញុំ អនាគតខ្ញុំ» ដល់សិស្សានុសិស្ស នៅវិទ្យាល័យចំនួន ៤ នៃស្រុកកោះធំ ខេត្តកណ្តាល ដើម្បីបំផុសស្មារតីឱ្យសិស្សយល់អំពីតម្លៃនៃការអប់រំ និងឈ្វេងយល់ពីចំណុចគន្លឹះក្នុងការអភិវឌ្ឍខ្លួន ដើម្បីឆ្ពោះទៅសម្រេចគោលដៅនៃការកសាងជីវិត។
សិក្ខាសាលានេះបានធ្វើឡើងកាលពីថ្ងៃទី ៧ ខែវិច្ឆិកា ដោយមានការចូលរួមពីសិស្សានុសិស្សនៃវិទ្យាល័យ ហ៊ុន សែន កោះធំ វិទ្យាល័យ ហ៊ុន សែន សំពៅពូន វិទ្យាល័យ ប៊ុន រ៉ានី ហ៊ុនសែន ព្រែកតាដួង វិទ្យាល័យ ហ៊ុន សែន កំពង់កុង និងមានការចូលរួមពីសាធារណជនជាង ១០០ នាក់។
ទំព័រហ្វេសប៊ុករបស់ក្រសួងសាធារណការបានឱ្យដឹងនៅថ្ងៃទី ៨ វិច្ឆិកាថា៖ «សិក្ខាសាលានេះត្រូវបានរៀបចំឡើងក្នុងគោលបំណង ដើម្បីបំផុសស្មារតីឱ្យសិស្សបានយល់អំពីតម្លៃនៃការអប់រំ និងរៀនស្គាល់ខ្លួនឯង សម្រាប់ឈ្វេងយល់ពីគន្លឹះក្នុងការត្រៀម និងបទពិសោធនៃការសិក្សារបស់បុគ្គលគំរូ»។
លោក ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូនបានថ្លែងថា គ្រប់គ្នាតែងតែប្រាថ្នាចង់បានអនាគតភ្លឺស្វាង ហើយការមានមហិច្ឆតា និងគោលដៅជីវិត ជាត្រីវិស័យដ៏ចាំបាច់សម្រាប់មនុស្សគ្រប់គ្នា។
ការអប់រំ និងការសិក្សារៀនសូត្រជាមូលដ្ឋានគ្រឹះតែមួយគត់ក្នុងការអភិវឌ្ឍខ្លួន ដើម្បីឆ្ពោះទៅសម្រេចគោលដៅនៃការកសាងជីវិត។
ប៉ុន្តែ លោក ហឿន សំនៀង មើលឃើញថា៖ «មានសិស្សានុសិស្សមួយចំនួន បាននិងកំពុងវង្វេង ឬពុំស្គាល់អ្វីជាក្តីសុបិន ឬគោលដៅរបស់ខ្លួន។ តាមពិតទៅ មានកត្តាជាច្រើនដែលធ្វើឱ្យក្មួយៗ មិនអាចសម្រេចគោលដៅ តែកត្តាខ្លួនឯង ជាកត្តាចម្បងបំផុត ព្រោះខ្លួនឯង ជាអ្នកបំផ្លាញអនាគតរបស់ខ្លួន បំផ្លាញក្តីសុបិនរបស់ខ្លួន និងខ្លួនឯងជាអ្នកពង្វក់ខ្លួនឯងឱ្យវង្វេង រកផ្លូវត្រូវមិនឃើញ ចេញមិនរួច»។
ដូចនេះលោក ហឿន សំនៀង បានចែករំលែកចំណេះដឹង និងបទពិសោធល្អៗ សម្រាប់ជាគតិដល់សិស្សានុសិស្ស ដើម្បីឱ្យតម្លៃនៃការអប់រំ ដើម្បីជាឃ្លាំងទ្រព្យសម្បត្តិដ៏មហាសាលបំផុត និងមានតម្លៃបំផុតលើភពផែនដីនេះ ហើយការអប់រំគឺជាមូលដ្ឋានគ្រឹះដ៏ចាំបាច់បំផុត សម្រាប់កសាងខ្លួន កសាងគ្រួសារ និងកសាងសង្គម។
លោកបានបញ្ជាក់ថា៖ «ក្មួយៗទាំងអស់ ជាសិស្សានុសិស្ស សូមយកកូនសោនេះ និងប្រើប្រាស់វាឱ្យបានត្រឹមត្រូវ គប្បីក្តាប់ឱកាសដ៏ល្អនេះដោយការខិតខំប្រឹងប្រែងរៀនសូត្រឱ្យក្លាំងក្លា និងពេញទំហឹងទើបបានផលពិត ខ្លាំង ច្រើន និងអស្ចារ្យ។ ក្មួយៗកុំរៀនលេងៗ តែចង់បានផលមែនទែន កុំរៀនតិចៗ តែចង់បានផលច្រើន ត្រូវតែរៀនឱ្យខ្លាំង ទើបបានផលខ្លាំង»។
ក្រៅពីជំរុញសិស្សានុសិស្សឱ្យដឹងពីតម្លៃនៃការអប់រំ លោក ហឿន សំនៀង ក៏បានណែនាំដល់សិស្សានុសិស្ស គប្បីមានគោលដៅឱ្យបានច្បាស់លាស់ការរក្សាទស្សនៈល្អៗ និងវិជ្ជមានសម្រាប់ខ្លួនឯង និងត្រូវមើលពីចំណុចគួរប្រុងប្រយ័ត្នក្នុងនាមជាយុវជន យុវវ័យ និងនៅក្មេងខ្ចីខ្លីបញ្ញា និងបទពិសោធ ដោយប្រយ័ត្នក្នុងការសេពគប់មិត្ត ដែលអាចនាំខ្លួនឱ្យធ្លាក់ទៅក្នុងផ្លូវអន្តរាយជាដើម៕
