.jpg)
ពលរដ្ឋមើលរថយន្តដែលបានឆេះនៅខណ្ឌព្រែកព្នៅ ពីថ្ងៃទី ៨ វិច្ឆិកា។ រូប FB
ភ្នំពេញៈ កម្លាំងសមត្ថកិច្ចនគរបាលខណ្ឌព្រែកព្នៅ កំពុងបន្តស្រាវជ្រាវករណីឆេះរថយន្ត ១ គ្រឿង នៅចំណុចដងមហាវិថីឈ្នះៗ ស្ថិតក្នុងភូមិកប់ស្រូវ សង្កាត់គោករកា ខណ្ឌព្រែកព្នៅ កាលពីវេលាម៉ោង ៣ ទៀបភ្លឺ ថ្ងៃទី ៨ ខែវិច្ឆិកា បន្ទាប់ពីពិនិត្យឃើញមានមនុស្សម្នាក់ឆេះស្លាប់នៅក្នុងរថយន្តនោះ។ នេះបើតាមសមត្ថកិច្ចនគរបាលមូលដ្ឋាន។
លោក ឈិន គឹមធុយ អធិការខណ្ឌព្រែកព្នៅប្រាប់ ភ្នំពេញ ប៉ុស្តិ៍ នៅថ្ងៃទី ៨ វិច្ឆិកាថា រហូតមកទល់វេលាម៉ោង ១១ ព្រឹកថ្ងៃដដែលនេះ កងកម្លាំងសមត្ថកិច្ចនៅមិនទាន់ដឹងអំពីអត្តសញ្ញាណជនរងគ្រោះ ដែលស្លាប់ក្នុងហេតុការណ៍ឆេះរថយន្តនោះនៅឡើយទេ។ ប៉ុន្តែកម្លាំងសមត្ថកិច្ចបានរកឃើញស្លាកលេខរថយន្តដែលឆេះនោះ គឺភ្នំពេញ 2AC-9736 ដែលជាតម្រុយមួយសម្រាប់ស្វែងរកសាច់ញាតិនៃជនរងគ្រោះ។
លោកបានបញ្ជាក់ថា៖ «សមត្ថកិច្ចយើង នៅមិនទាន់អាចសន្និដ្ឋានលើករណីនេះនៅឡើយទេ ដោយសារនៅពេលកម្លាំងសមត្ថកិច្ចដែលចុះល្បាតតាមដងវិថីនោះ ប្រទះឃើញ គឺរថយន្តបានឆេះអស់សល់តែគ្រោងឆ្អឹង និងមនុស្សបានឆេះស្លាប់បាត់ទៅហើយ»។
បើតាមលោក គឹមធុយ ក្រុមសមត្ថកិច្ចនគរបាលជំនាញកំពុងបន្តស្រាវជ្រាវ ស្វែងរកការពិតលើករណីនេះ។ ខណៈសពជនរងគ្រោះត្រូវបាននាំយកទៅរក្សាទុកនៅវត្តស្ទឹងមានជ័យក្នុងខណ្ឌមានជ័យ ដើម្បីរង់ចាំការទំនាក់ទំនងពីក្រុមគ្រួសារសាច់ញាតិនៃសពមកនាំយកទៅធ្វើបុណ្យតាមប្រពៃណី៕
វីដេអូ៖
