.jpg)
ជនសង្ស័យនៅពេលសមត្ថកិច្ចចាប់ខ្លួនបានកាលពីថ្ងៃទី ៨ វិច្ឆិកា ។ រូបថត ហ្វេសប៊ុក
ព្រៃវែងៈ នគរបាលព្រហ្មទណ្ឌខេត្តព្រៃវែងកាលពីថ្ងៃទី ៨ វិច្ឆិកា បានសហការចាប់ខ្លួនជនសង្ស័យម្នាក់ពាក់ព័ន្ធករណីសម្លាប់ក្មេងស្រីម្នាក់ និងប៉ុនប៉ងរំលោភសេពសន្ថវៈនាង ប្រព្រឹត្តនៅក្នុង ឃុំ-ស្រុកព្រះស្តេច ខេត្តព្រៃវែង កាលពីយប់ថ្ងៃទី ៦ វិច្ឆិកា។
លោក ពៅ ជីវី ស្នងការរងទទួលផែនការងារនគរបាលព្រហ្មទណ្ឌនៃស្នងការនគរបាលខេត្តព្រៃវែងប្រាប់ ភ្នំពេញ ប៉ុស្តិ៍ នៅថ្ងៃទី ៩ វិច្ឆិកាថា ជនសង្ស័យឈ្មោះ យ៉ែម សុផែន ភេទប្រុស អាយុ ២០ ឆ្នាំ ស្នាក់នៅភូមិទួលជៃ ឃុំព្រះស្តេច ស្រុកព្រះស្តេច ខេត្តព្រៃវែង ។រីឯក្មេងស្រីរងគ្រោះឈ្មោះ ផ.ន អាយុ ១២ ឆ្នាំ។ ជនសង្ស័យត្រូវបានសមត្ថកិច្ចចាប់ខ្លួននៅថ្ងៃទី ៨ វិច្ឆកា ក្នុងភូមិកើតហេតុ បន្ទាប់ពីទទួលពាក្យបណ្តឹងពីម្តាយក្មេងស្រីរងគ្រោះកាលពីថ្ងៃទី ៧ វិច្ឆិកា។
លោកថ្លែងថា៖ «ជនសង្ស័យមិនបានរំលោភលើក្មេងរងគ្រោះទេ តែជាការប៉ុនប៉ងរំលោភ។ គាត់ជាអ្នកសម្លាប់ក្មេងស្រីផ្ទាល់ដៃ»។ លោកបន្តថា ការស្រាវជ្រាវចាប់ខ្លួនជនសង្ស័យនេះ គឺមានការចូលរួមសហការពីនាយកដ្ឋានព្រហ្មទណ្ឌនៃអគ្គស្នងការដ្ឋាននគរបាលជាតិផងដែរ។
លោក ជីវី បានប្រាប់តាមចម្លើយសារភាពរបស់ជនសង្ស័យថា កាលពីយប់ថ្ងៃទី ៦ ខែ វិច្ឆិកា ឆ្នាំ ២០២១ រូបគេបានទៅចូលរួមកម្មវិធីខួបកំណើតកូនរបស់អ្នកជិតខាងនៅក្នុងភូមិរហូតដល់ម៉ោងប្រហែល ១២ យប់។ នៅពេលនោះម្ចាស់កម្មវិធីបានប្រើជនសង្ស័យឱ្យទៅទិញទឹកកក។
លោកបន្តតាមសម្តីជនសង្ស័យថា ពេលកំពុងជិះម៉ូតូតាមផ្លូវក្នុងភូមិរូបគេបានប្រទះឃើញក្មេងស្រីរងគ្រោះឈរនៅមុខផ្ទះហើយគេក៏បានឈប់ម៉ូតូ និងបាននិយាយលួងលោមក្មេងស្រីរងគ្រោះឱ្យទៅផ្ទះជប់លៀងជាមួយគ្នា។ ពេលនោះក្មេងរងគ្រោះក៏ឡើងជិះម៉ូតូទៅជាមួយដោយជនសង្ស័យបានឱ្យនាងឱបចង្កេះពីក្រោយផង។
លោកបានបន្តថា ខណៈនោះជនសង្ស័យមានអារម្មណ៍ចង់រួមភេទក៏ដឹកក្មេងស្រីរងគ្រោះបង្ហួសទៅដល់វាលស្រែដែលមានទឹកអូរ រួចក៏ស្ទាបអង្អែលដោះនាង តែក៏ត្រូវក្មេងស្រីរងគ្រោះរើមិនព្រមឱ្យចាប់។ ដោយមិនអាចធ្វើអ្វីក្មេងរងគ្រោះកើត និងខ្លាចបែកការផងជនសង្ស័យក៏បានច្រានក្មេងស្រីរងគ្រោះទម្លាក់ចូលក្នុងទឹកអូរ។ បន្ទាប់មកក៏ចាប់ក្បាលនាងជ្រមុជក្នុងទឹកអូររហូតដាច់ខ្យល់ស្លាប់រួចក៏បានជិះម៉ូតូទៅផ្ទះវិញ។
លោកបានបញ្ជាក់ថា ការចាប់ខ្លួននេះ គឺបន្ទាប់ពីទទួលបានបណ្តឹងពីម្តាយក្មេងស្រីរងគ្រោះដោយសមត្ថកិច្ចចម្រុះមកពីខាងស្នងការដ្ឋាននគរបាលខេត្តព្រៃវែង និងនាយកដ្ឋានព្រហ្មទណ្ឌនៃអគ្គស្នងការដ្ឋាននគរបាលជាតិបានបើកការស្រាវជ្រាវបន្ទាន់រហូតចាប់ជនសង្ស័យបាននៅថ្ងៃទី ៨ វិច្ឆិកា។
លោកបន្តទៀតថា នៅក្នុងការធ្វើកោសល្យវិច័យក៏មានការចូលរួមពីខាងអង្គការស៊ីភីយូ (CPU) ដែរ។ តាមរយៈការវះកាត់សាកសពសមត្ថកិច្ចពិនិត្យឃើញមានភក់នៅក្នុងបំពង់ក និងមានភក់នៅក្នុងសួតថែមទាំងបាក់ឆ្អឹងជំនីរខាងស្តាំ តែទ្វារមាសពុំមានស្លាកស្នាម ពីការចាប់រំលោភទេ។
លោកថា៖ «ខាងជំនាញខ្ញុំកំពុងបន្តនីតិវិធីបន្ថែមនៅថ្ងៃនេះ (ថ្ងៃទី ៩ វិច្ឆិកា) ព្រោះមិនទាន់ចប់គ្រប់ជ្រុងជ្រោយ។ ពេលបំពេញនីតិវិធីចប់យើងនឹងបញ្ជូនជនសង្ស័យទៅតុលាការ»។
បើតាមលោក សន សំអឿន នាយប៉ុស្ដិ៍នគរបាលព្រះស្តេច បានប្រាប់ ភ្នំពេញ ប៉ុស្តិ៍ នៅរសៀលថ្ងៃទី ៨ វិច្ឆិកាថា ក្មេងស្រីរងគ្រោះរស់នៅជាមួយម្តាយជាស្ត្រីមេម៉ាយក្នុងឃុំកើតហេតុខាងលើ។នៅថ្ងៃទី ៦ វិច្ឆិកា ម្តាយរបស់ក្មេងរងគ្រោះបានទៅចូលរួមក្នុងកម្មវិធីជួបជុំច្រៀងជាមួយអ្នកជិតខាងក្នុងភូមិ ស្ថិតនៅក្នុងឃុំព្រះស្តេច ដោយមិនបានចាប់អារម្មណ៍ទៅលើកូនទេ។ តែពេលត្រឡប់មកវិញបាត់កូន ក៏នាំគ្នាដើររក។ លុះដល់ថ្ងៃទី ៧ វិច្ឆិកា អ្នកភូមិបាននាំគ្នាជួយរកក៏ប្រទះឃើញក្មេងរងគ្រោះស្លាប់ក្នុងទឹកនៅវាលស្រែចម្ងាយពីផ្ទះរបស់ក្មេងរងគ្រោះប្រហែល ៣០០ ម៉ែត្រតែម្ដង៕
