មណ្ឌលគិរីៈ តំណាងជនជាតិដើមភាគតិចព្នង ១៧ នាក់ បានផ្តិតមេដៃដាក់ពាក្យប្តឹងទៅស្នងការនគរបាលខេត្តមណ្ឌលគិរី សូមឱ្យចាត់វិធានការច្បាប់លើម្ចាស់គណនីសង្គមហ្វេសប៊ុក (Narin Run (pich) ឈ្មោះ ណារីន កូនស្រីទី២ ស្រឡាញ់គ្រួសារ ព្រមទាំងបក្ខពួក និងទាមទារសំណង ជំងឺចិត្តចំនួន ១០ ០០០ ដុល្លារ ដោយសារហ្វេសប៊ុកនេះបង្ហោះសារសំឡេងនិយាយមាក់ងាយប្រមាថជនជាតិដើម។
ពាក្យប្តឹងរបស់ជនជាតិដើមភាគតិចព្នង ដែលភ្នំពេញប៉ុស្តិ៍ទទួលបាននៅថ្ងៃទី ៨ ខែវិច្ឆិកា បានឱ្យដឹងថា ជនជាតិដើមភាគតិចព្នង មកពីស្រុកទាំង ៥ នៃខេត្តមណ្ឌលគិរី ប្តឹងគណនីសង្គមហ្វេសប៊ុក (Narin Run (pich) ឈ្មោះ ណារីន កូនស្រីទី២ ស្រឡាញ់គ្រួសារ និងបក្ខពួកពីបទមាក់ងាយធ្វើឱ្យមានការរើសអើងជាតិសាសន៍ ធ្វើឱ្យមានការប្រកាន់ឋានៈ ពណ៌សម្បុរ និងធ្វើឱ្យជនជាតិភាគតិចព្នងមានការឈឺចាប់ ទើបនាំគ្នាប្តឹង តវ៉ា ទាមទាររកយុត្តិធម៌។
លោក គ្រើង តុលា អ្នកប្រឹក្សាយោបល់ ក្រុមការងារបណ្តាញសហគមន៍ជនជាតិដើមភាគតិចខេត្តមណ្ឌលគិរី ថ្លែងនៅថ្ងៃទី ៨ ខែវិច្ឆិកាថា មូលហេតុនៃការប្តឹងនេះ ដោយសារបានឃើញសារសំឡេងរបស់ហ្វេសប៊ុក (Narin Run (pich) ឈ្មោះ ណារីន កូនស្រីទី២ ស្រឡាញ់គ្រួសារ ដែលត្រូវបានចែករំលែកដោយហ្វេសប៊ុកឈ្មោះ «បុត្រា ជី ជីង» នៅថ្ងៃទី ៥ វិច្ឆិកា ដែលសារសំឡេងនោះ និយាយមាក់ងាយប្រមាថ ប៉ះពាល់ដល់កិត្តិយស និងសេចក្តីថ្លៃថ្នូរ ថែមទាំងប៉ះពាល់ដល់ផ្លូវចិត្ត និងជាតិសាសន៍ ជនជាតិដើមភាគតិចព្នងជាខ្លាំង។
លោក គ្រើង តុលា ប្រាប់ថា សារសំឡេងនោះបាននិយាយមើលងាយថា «មើលតែពួកវារៀបការ ក៏ដឹងដែរមិនមែនថ្លៃថ្នូរដូចយើងផងហ្នឹង។ វាព្រៃតើ មិនមែនស្រុកដូចយើងណា។ បើថា វាហំ វាមិនដែលនៅក្រោមគេណា គេឱ្យពួកវាធ្វើធំបាត់ហើយ។ អាណែត អាគា ពួកវាព្នងអ៊ីចឹងហើយគ្នាអត់មានការអប់រំដូចយើង»។ បើតាមលោក តុលា ការប្តឹងនេះជនជាតិដើមភាគតិចព្នងទាមទារសំណងជំងឺចិត្ត ចំនួន ១០ ០០០ ដុល្លារ ហើយលុយទាំងនេះនឹងដាក់បញ្ចូលក្នុងកម្មវិធីរក្សាវប្បធម៌ជនជាតិដើមភាគតិចប្រចាំឆ្នាំ។
គណនីហ្វេសប៊ុកឈ្មោះ បុត្រា ជី ជីង បានចែករំលែកនៅថ្ងៃទី ២៧ តុលា បានសរសេរបង្ហាញពីការហួសចិត្ត បន្ទាប់ពីបានឮសារសំឡេងមើលងាយទៅលើជនជាតិដើមភាគតិចព្នង។
ហ្វេសប៊ុកនោះបានសរសេរថា៖ «ខ្ញុំថាមិនចង់ចេះដឹងទេរឿងគេមិនចង់លូកមាត់ទេ តែគាត់បកសម្តីមកសាហាវពេក ឮសម្តីរបស់គាត់និយាយហើយចុកឈាមពេក។ នេះហើយជនជាតិខ្មែរមួយចំនួនតូចរើសអើង ជនជាតិពូជសាសន៍របស់ពួកខ្ញុំ។ ខ្ញុំបានឆាតមួយដែរហើយ ខ្ញុំនិយាយស្រួលបួលទេ តែគាត់វិញនិយាយមកសុទ្ធតែដល់ម៉ែឪ»។
លោក សី ទូច ប្រធានមន្ទីរវប្បធម៌ និងវិចិត្រសិល្បៈ ខេត្តមណ្ឌលគិរី ថ្លែងនៅថ្ងៃទី ៨ ខែវិច្ឆិកាថា រាល់ការប្រមាថមើលងាយ មិនថាតែជនជាតិដើមភាគតិចនោះទេ ជនជាតិណាក៏ដោយ គឺមិនអាចទទួលយកបាននោះទេ។ លោកថ្លែងថា ជាទស្សនៈរួម ជនជាតិខ្មែរ តែងមានសីលធម៌ ហើយមិនដែលណែនាំអ្នកជំនាន់ក្រោយឱ្យចេះប្រមាថមើលងាយអ្នកដទៃឡើយ។ ដោយឡែកពាក់ព័ន្ធជាមួយ ជនជាតិដើមភាគតិចវិញ ក៏មានច្បាប់ មានគោលនយោបាយលើកកម្ពស់ពួកគាត់ដូចជនជាតិខ្មែរយើងផងដែរ។
លោកថ្លែងថា៖ «ក្នុងនាមខ្ញុំជាមន្ត្រីមន្ទីរវប្បធម៌ និងវិចិត្រសិល្បៈ ខ្ញុំមិនអាចទទួលយកបាននូវការមើលងាយទេ។ ខ្ញុំក៏សូមឱ្យស្ថាប័នជំនាញលោកស្រាវជ្រាវដើម្បីរកជនដែលប្រមាថមើលងាយនោះ ព្រោះអាហ្នឹងវាផ្ទុយទៅនឹងរដ្ឋធម្មនុញ្ញ ក៏ដូចជាច្បាប់នានា ដែលយើងបានចូលរួមលើកកម្ពស់ជនជាតិដើមភាគតិច ហើយណាមួយវាក៏ប៉ះពាល់ដល់តម្លៃសីលធម៌សង្គមផងដែរ»។
លោក ឡោ សុខា ស្នងការនគរបាលខេត្តមណ្ឌលគិរី ថ្លែងនៅថ្ងៃទី ៨ ខែវិច្ឆិកាថា ចំពោះរឿងនេះ លោកនឹងចាត់ឱ្យមានការស្រាវជ្រាវរកអ្នកប្រព្រឹត្តយកមកអនុវត្តតាមនីតិវិធី ដោយមិនមានការលើកលែងឡើយ។ លោកថ្លែងថា៖ «រឿងហ្នឹងយើងត្រូវតែមានចំណាត់ការ ព្រោះកាលណាមានបណ្តឹងហើយ សមត្ថកិច្ចត្រូវតែមានចំណាត់ការលើបណ្តឹង។ គាត់មានពាក្យបណ្តឹងគាត់ គឺគាត់មានអំណះអំណាងរបស់គាត់មានភ័ស្តុតាងរបស់គាត់ហើយ ខ្ញុំចាត់ការតាមវិធានការច្បាប់»៕