សៀមរាបៈ អាជ្ញាធរជាតិអប្សរានៅថ្ងៃទី ៨ ខែវិច្ឆិកា បានជូនដំណឹងពីការបន្តគម្រោងជួសជុលពង្រឹងរចនាសម្ព័ន្ធខឿនរួតបាកាណនៃប្រាសាទអង្គរវត្ត បន្ទាប់ពីផ្អាកមួយរយៈដោយសារតែបញ្ហាកូវីដ ១៩ រាលដាលខ្លាំកាលពីចុងខែសីហា កន្លងទៅ។
អាជ្ញាធរជាតិអប្សរានៅថ្ងៃទី ៨ ខែវិច្ឆិកា បានជម្រាបជូនដល់ក្រសួងស្ថាប័នជាតិ អន្តរជាតិ អាជ្ញាធរដែនដី មន្ទីរ អង្គភាព សមាគមទីភ្នាក់ងារទេសចរណ៍ សមាគមមគ្គុទ្ទេសក៍ទេសចរណ៍ សមាគមដឹកជញ្ជូនភ្ញៀវទេសចរ ក្រុមហ៊ុនទេសចរណ៍ ភ្ញៀវទេសចរជាតិ និងអន្តរជាតិ សាធារណជនព្រមទាំងបងប្អូនប្រជាពលរដ្ឋទាំងអស់មេត្តាជ្រាបថា រចនាសម្ព័ន្ធខឿនរួតបាកាណនៃប្រាសាទអង្គរវត្ត កំពុងមានសភាពទ្រុឌទ្រោម ដែលប្រឈមហានិភ័យខ្ពស់ដោយសារកត្តាអាយុកាលនិងធម្មជាតិ។
សេចក្តីជូនដំណឹងរបស់អាជ្ញាធរជាតិអប្សរាដែល ភ្នំពេញ ប៉ុស្តិ៍ ទទួលបាននៅថ្ងៃទី ៩ ខែវិច្ឆិកា សរសេរថា «ដោយសង្កេតឃើញពីបញ្ហានៅចំពោះមុខនេះ ក្រុមអ្នកជំនាញអាជ្ញាធរជាតិអប្សរា នឹងត្រូវអនុវត្តគម្រោងជួសជុលពង្រឹងរចនាសម្ព័ន្ធខឿនរួតបាកាណជ្រុងនិរតីនិងពាយ័ព្យនៃប្រាសាទឡើងវិញ ដោយត្រូវដំឡើងរន្ទា និងធ្វើផ្លូវសម្រាប់ជញ្ជូនថ្មចូលការដ្ឋានតាមច្រកចូលខាងកើត ឡើងទៅរួតបាកាណ» ។
អាជ្ញាធរជាតិអប្សរាបានបញ្ជាក់ថា ក្នុងន័យដើម្បីសម្រួលដល់ការងារនេះ ក៏ដូចជា ដើម្បីចៀសវាងគ្រោះថ្នាក់ជាយថាហេតុដល់ភ្ញៀវទេសចរជាតិនិងអន្តរជាតិ និងសាធារណជនទូទៅ អាជ្ញាធរជាតិអប្សរានឹងអនុវត្តការងារខាងលើនេះគិតចាប់ពីថ្ងៃទី ៩ ខែ វិច្ឆិកា ឆ្នាំ ២០២១ តទៅ រហូតដល់ការដ្ឋានត្រូវបានជួសជុលរួចរាល់ ។
លោក ឡុង កុសល អ្នកនាំពាក្យអាជ្ញាធរជាតិអប្សរា ថ្លែងនៅថ្ងៃទី ៩ ខែវិច្ឆិកាថា ការអនុវត្តគម្រោងជួសជុលនេះ មិនធ្វើឲ្យប៉ះពាល់ដល់ការទស្សនារបស់ភ្ញៀវទេសចរឡើយ ពីព្រោះការជួសជុលនឹងបែងចែកជាជ្រុងៗ និងជាដំណាក់កាលៗ ដោយអ្នកជំនាញប្រមូលថ្ម សិក្សាអំពីថ្ម រួចហើយទើបត្រូវរៀបចំដាក់ឲ្យត្រូវតាមបច្ចេកទេស។
លោក គឹម សុធិន អគ្គនាយករង អាជ្ញាធរជាតិអប្សរា បានឲ្យដឹងនៅថ្ងៃទី ៩ ខែវិច្ឆិកាដែរថា គម្រោងជួសជុលរួតបាកាណអង្គរនេះ ទើបតែធ្វើបានតិចតួចប៉ុណ្នោះ។លោកថាដំណាក់កាលដំបូងត្រូវពង្រាយថ្មដែលនៅគរៗលើរួតបាកាណដើម្បីពិនិត្យមើលថ្មប្រភេទណា នៅកន្លែងណាឲ្យប្រាកដ ទើបចាប់ផ្តើមធ្វើប្លង់ អំពីតម្រូវការថ្មថ្មីចំនួនប៉ុន្មាន រួចទើបធ្វើការជញ្ជូនថ្មទៅដាក់។
លោកថ្លែងថា ៖«យើងត្រូវរកដុំថ្ម ប៉ាន់មើលកម្ពស់ថ្ម ហើយថ្មយើងកំពុងកុម្ម៉ង់ឲ្យគេកាត់។ ថ្មអង្គរវត្តយើងកម្ពស់វា ៥០ ទទឹង ៦០ [សង់ទីម៉ែត្រ] និងបណ្តោយ ១ ម៉ែត្រ អ៊ីចឹងយើងត្រូវធ្វើផែនការធ្វើផ្លូវយកថ្មដុំខ្នាតហ្នឹងឡើងទៅលើដែលឆ្លងកាត់រោងទងចូលទៅក្នុងលើកដាក់បន្តបន្ទាប់៣តង់ ទើបដល់កន្លែងជួសជុលខឿនហ្នឹង» ។
លោក គឹម សុធិន បញ្ជាក់ថា ទោះបីជាដុំថ្មមានទម្ងន់ធ្ងន់រហូតដល់ ៧០០ ទៅ ៨០០ គីឡូក៏ដោយ ក៏មិនមានបញ្ហាប្រឈមអ្វីនោះទេ។ពេលនេះអ្នកជំនាញកំពុងតែច្នៃលក្ខណៈបច្ចេកទេសដោយក្រាលកៅស៊ូការពារប្រើកុងផ្លាកេទ្របាតដាក់លើរទេះច្នៃដែលដាក់កង់ម៉ូតូឆាលី សម្រាប់អូសដើម្បីឲ្យមានភាពងាយស្រួលជាងប្រើកម្លាំងសុទ្ធ ។
លោកថ្លែងថា៖ «កាលមុនយើងអត់បានបិទបានទ្រអីទេគឺយើងដាក់ឈើអូសដៃទៅតែម្តងអាហ្នឹង៣ថ្ងៃបានយកថ្មមួយដុំទៅដល់លើតែឥឡូវយើងនឹងប្រើបច្ចេកទេសថ្មីចាំមើលក្នុងមួយថ្ងៃយើងអូសបានប៉ុន្មាន»៕