ភ្នំពេញៈ យុវជនចំនួន ៣ នាក់ បានទទួលជយលាភី លេខ ១ លេខ ២ និងលេខ ៣ ពីការប្រកួតវគ្គផ្ដាច់ព្រ័ត្រ នៃការគូរគំនូរ ស្ដីពីផលប៉ះពាល់នៃការប្រើប្រាស់គ្រឿងស្រវឹង និងវិធានការមានប្រសិទ្ធភាព ក្នុងការកាត់បន្ថយគ្រោះថ្នាក់បង្កដោយគ្រឿងស្រវឹង ខណៈមានយុវជនជិត ២០០ នាក់ បានផ្ញើស្នាដៃគំនូររបស់ខ្លួនចូលរួមការការប្រកួត ដែលរៀបចំដោយក្រសួងអប់រំ យុវជននិងកីឡា។
ការប្រកាសពីលទ្ធផលនៃការប្រកួតនេះ មានការអញ្ជើញចូលរួមពីលោកស្រី គឹម សុដ្ឋានី រដ្ឋលេខាធិការក្រសួងអប់រំ និងថ្នាក់ដឹកនាំក្រសួងពាក់ព័ន្ធ និងអង្គការជាដៃគូរតាមរយៈប្រព័ន្ធអនឡាយ (zoom) ខណៈ មានយុវជន ១៧៥ នាក់ បានផ្ញើស្នាដៃគំនូរមកកាន់គណៈកម្មការ។
ទំព័រហ្វេសប៊ុករបស់ក្រសួងអប់រំ បានឱ្យដឹងនៅថ្ងៃទី ៩ វិច្ឆិកាថា ស្នាដៃគំនូរទាំងនេះ បានឆ្លងកាត់ការជម្រុះជាបន្តបន្ទាប់ រហូតរកឃើញស្នាដៃល្អបំផុតចំនួន៥ ឆ្លងចូលវគ្គផ្ដាច់ព្រ័ត្រ ដោយម្ចាស់ជ័យលាភីទាំង ៥ នេះ បានបកស្រាយខ្លឹមសារគំនូររបស់ខ្លួន កាលពីថ្ងៃទី ០៨ ខែវិច្ឆិកា ដើម្បីជ្រើសរើសជ័យលាភីលេខ ១ លេខ ២ និងលេខ ៣។
ក្រសួងអប់រំបានបញ្ជាក់ថា៖« កម្មវិធីនេះ ធ្វើឡើងក្នុងគោលបំណង បំផុសការយល់ដឹង អំពីផលប៉ះពាល់នៃការប្រើប្រាស់គ្រឿស្រវឹង ដល់សិស្ស និស្សិតនិងយុវជន និងគាំទ្រឱ្យមានវិធានការមានប្រសិទ្ធភាព ក្នុងការកាត់បន្ថយគ្រោះថ្នាក់ ដែលបណ្ដាលមកពីការប្រើប្រាស់គ្រឿងស្រវឹង ក្នុងចំណោមសិស្សនិស្សិតនិងយុវជន»។
តាមការប្រកាសរបស់ក្រសួងអប់រំ ក្រោយពីឆ្លងកាត់ការបកស្រាយខ្លឹមសាររូបភាពយ៉ាងក្បោះក្បាយ ជយលាភីលេខ ១ បានទៅលើ យុវជន ជ័រ ម៉េងស៊ាង មកពីខេត្តព្រះសីហនុ ជ័យលាភីលេខ ២ បានទៅលើយុវជន ជា វង្សនរិន្ទ មកខេត្តសៀមរាប ជ័យលាភីលេខ ៣ បានទៅលើយុវនារី នី ស្ទីនណា មកពីខេត្តស្ទឹងត្រែង។
គួរបញ្ជាក់ថា វិធានការមានប្រសិទ្ធភាពក្នុងការកាត់បន្ថយគ្រោះថ្នាក់ បង្កមកពីការប្រើប្រាស់គ្រឿងស្រវឹងមាន ១.ហាមឃាត់ការផ្សាយពាណិជ្ជកម្មគ្រឿងស្រវឹង ២.ដំឡើងពន្ធគ្រឿងស្រវឹង ៣.កំណត់អាយុដែលអាចទិញនិងប្រើប្រាស់គ្រឿងស្រវឹង និង ៤.កាត់បន្ថយភាពងាយរកបាន នៃគ្រឿងស្រវឹង ។ នេះបើតាមទំព័រហ្វេសប៊ុករបស់ក្រសួងអប់រំ។
បើយោងតាមអង្គការសុខភាពពិភពលោក គ្រឿងស្រវឹង បង្កឱ្យមានជំងឺជាង ២០០ មុខ ហើយជាកត្តាចម្បងបង្កឱ្យមានគ្រោះថ្នាក់ចរាចរណ៍ និងក៏ជាកត្តាហានិភ័យ ជំរុញឱ្យមានអំពើហិង្សាគ្រប់ប្រភេទ ព្រមទាំងភាពក្រីក្រ។
ទាំងនេះ គឺជាហេតុផលសំខាន់ ដែលមិនគួរឱ្យមានការជំរុញឱ្យមានការប្រើប្រាស់គ្រឿងស្រវឹង។
លោក មុំ គង់ នាយកអង្គការចលនាដើម្បីសុខភាពកម្ពុជា បានមើលឃើញថា ការប្រកួតគូរគំនូរលើកនេះគឺមានយុវជន បានចូលរួមច្រើន ជាពិសេសយុវជន មកពីតាមបណ្តាលខេត្តនានា ដើម្បីប្រកួតប្រជែងស្នាដៃរបស់ពួកគេ។
ការចូលរួមរបស់យុវជន ក្នុងការបង្ហាញ ឬរំលិចឱ្យឃើញពីផលប៉ះពាល់បណ្តាលមកពីគ្រឿងស្រវឹង តាមរយៈគំនូរគឺចូលរួមចំណែកបានច្រើនដល់សង្គម ។
លោកបន្តថា៖ «ការចូលរួមរបស់យុវជន និងលើកឡើងនូវវិធានការមានប្រសិទ្ធភាពដើម្បីស្នើសុំឱ្យរដ្ឋាភិបាល ចាត់វិធានការទៅលើការប្រើប្រាស់គ្រឿងស្រវឹងនេះ គឺជាការចូលរួមចំណែកមួយយ៉ាងសកម្មនៅក្នុងការជួយសង្គម ដើម្បីឱ្យសង្គមកាន់តែមានសុវត្ថិភាព ហើយមានសណ្តាប់ធ្នាប់ជាងមុន និងកាត់បន្ថយផលប៉ះពាល់»៕