ភ្នំពេញៈ គណៈកម្មាធិការជាតិរៀបចំការបោះឆ្នោត (គជប) ចែកលិខិតអញ្ជើញប្រជាពលរដ្ឋនៅទូទាំងប្រទេស ដែលមានឈ្មោះបោះឆ្នោះឆ្នាំ ២០២០ ឱ្យទៅពិនិត្យមើលបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២១ នេះ ដែលសម្រេចបានចំនួន ៨ ២០៥ ៧០៣ ស្មើនឹង ៩២.៩១%។ នេះបើយោងតាម តារាងបូកសរុបលទ្ធផលបណ្ដោះអាសន្ននៅថ្ងៃទី ៩ ខែ វិច្ឆិកា ឆ្នាំ ២០២១។
លោក ហង្ស ពុទ្ធា អ្នកនាំពាក្យ គ.ជ.ប. ប្រាប់ ភ្នំពេញ ប៉ុស្តិ៍ នៅថ្ងៃទី ៩ ខែវិច្ឆិកាថា ក្នុងនាមជាអ្នកចាត់ចែងរៀបចំការបោះឆ្នោត គ.ជ.ប. បានធ្វើកិច្ចការងារជាច្រើន ដូចជាការអញ្ជើញប្រជាពលរដ្ឋឱ្យមកពិនិត្យបញ្ជីឈ្មោះ និងចុះឈ្មោះបោះឆ្នោត។ នេះជាលទ្ធផលដ៏ច្រើនលើសលប់ ដែលប្រជាពលរដ្ឋបានទទួលលិខិតអញ្ជើញនេះ។ ចំពោះការអញ្ជើញប្រជាពលរដ្ឋនេះ គឺក្នុងន័យឱ្យប្រជាពលរដ្ឋផ្ទៀងផ្ទាត់ប្រកបដោយភាពហ្មត់ចត់ជាទីបំផុតនូវឈ្មោះរបស់ខ្លួន នៅក្នុងបញ្ជីបោះឆ្នោត ឆ្នាំ ២០២០ និងត្រូវបានបោះពុម្ពជាលិខិតអញ្ជើញ ទៅជាបណ្ណព័ត៌មានអ្នកបោះឆ្នោត។
ជាមួយនឹងលទ្ធផលដែលសម្រេចបាននេះ គ.ជ.ប.បានធ្វើការជាមួយអាជ្ញាធរដែនដី រួមមានមេឃុំ ចៅសង្កាត់ និងប្រធានភូមិជាដើម ដើម្បីធ្វើការចុះចែកនៅតាមខ្នងផ្ទះរបស់ប្រជាពលរដ្ឋនីមួយៗ។ បើទោះបីមានការជួបការលំបាកទាំងពេលវេលា និងបញ្ហាអាកាសធាតុ និងទឹកជំនន់ ជាដើម ប៉ុន្តែអ្វីៗត្រូវបានប្រព្រឹត្តទៅតាមការគ្រោងទុក ហើយជាលទ្ធផល ប្រជាពលរដ្ឋច្រើនលើសលប់ បានទទួលនូវលិខិតអញ្ជើញនេះ ។
លោកបញ្ជាក់ថា ដោយឡែកចំពោះប្រជាពលរដ្ឋដែលមិនទាន់ទទួលបណ្ណបោះឆ្នោត ឬលិខិតអញ្ជើញ គឺប្រជាពលរដ្ឋអាចទៅទទួលយក នៅតាមសាលាឃុំសង្កាត់ទាំងនោះបាន។ ព្រោះបណ្ណបោះឆ្នោត ឬលិខិតអញ្ជើញនេះ ត្រូវបានគេរក្សាទុកយ៉ាងត្រឹមត្រូវនៅតាមសាលាឃុំសង្កាត់ដែលខ្លួនរស់នៅទីនោះ។
បើតាមលោក ហង្ស ពុទ្ធា ប្រជាពលរដ្ឋដែលទទួលបានលិខិតអញ្ជើញនេះ មានន័យថា ពួកគាត់ មានឈ្មោះនៅក្នុងបញ្ជីបោះឆ្នោត និងធ្វើការផ្ទៀងផ្ទាត់ឈ្មោះ វាខុសអក្ខរាវិរុទ្ធ ឬក៏ខុសទិន្នន័យណាមួយ សាមីខ្លួនអាចទៅធ្វើការស្នើសុំ កែតម្រូវក្នុងអំឡុងពេលនៃការពិនិត្យបញ្ជី និងចុះឈ្មោះបោះឆ្នោតនេះ។ ប្រសិនបើបានទទួលលិខិតអញ្ជើញនេះ ហើយបានពិនិត្យឃើញឈ្មោះអ្នកដទៃទៀត ដែលគ្មានលក្ខខណ្ឌគ្រប់គ្រាន់ដូចជាមិនមែនសញ្ជាតិខ្មែរ មិនទាន់គ្រប់អាយុ ប៉ុន្តែមានឈ្មោះនៅក្នុងបញ្ជី ឬក៏ដឹងថា អ្នកនោះទទួលមរណភាព ពួកគាត់អាចស្នើសុំ ឬប្តឹងឱ្យលុបឈ្មោះអ្នកនោះចេញពីបញ្ជីបោះឆ្នោតបានដែរ។
លោកថ្លែងថា៖ «អ៊ីចឹងលិខិតអញ្ជើញនេះ គឺដើម្បីឱ្យមានការចូលរួមពីប្រជាពលរដ្ឋទាំងអស់គ្នា ប្រកបដោយតម្លាភាព ប្រកបដោយការទទួលខុសត្រូវទាំងអស់គ្នា សម្រាប់វិស័យបោះឆ្នោតនៅកម្ពុជា»។
យោងតាមសេចក្តីប្រកាសព័ត៌មានរបស់ គ.ជ.ប. នៅថ្ងៃទី ៩ ខែ វិច្ឆិកា ឆ្នាំ ២០២១ ប្រជាពលរដ្ឋដែលបានអញ្ជើញមកចុះឈ្មោះបោះឆ្នោតថ្មីមានចំនួន ៣០២ ៨៤៩ នាក់។ អ្នកដែលនឹងត្រូវលុបឈ្មោះចេញពីបញ្ជីបោះឆ្នោតសរុបចំនួន ១៤៣ ៧១១ នាក់។ អ្នកដែលបានកែតម្រូវទិន្នន័យសរុបមានចំនួន ១១០ ១៥៨ នាក់ និងអ្នកដែលផ្ទេរទីលំនៅ ចូលឃុំសង្កាត់ថ្មី សរុបមានចំនួន៩០ ១៣៣ នាក់។
សេចក្តីប្រកាសព័ត៌មាននេះបន្តថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ ២០២១ ប្រព្រឹត្តទៅចាប់ពីថ្ងៃទី ១២ ខែ តុលា ដល់ ថ្ងៃទី ៣០ ខែ វិច្ឆិកា ឆ្នាំ ២០២១ គិតទាំងថ្ងៃសៅរិ៍ និងអាទិត្យ។
ជាមួយគ្នានេះ គ.ជ.ប.ក៏បានអំពាវនាវដល់ប្រជាពលរដ្ឋដែលមានសិទ្ធិបោះឆ្នោត និងទទួលបានលិខិតអញ្ជើញពីមេឃុំ ចៅសង្កាត់ និងមេភូមិ សូមទៅពិនិត្យបញ្ជីឈ្មោះ និងចុះឈ្មោះបោះឆ្នោត នៅតាមការិយាល័យ ចុះឈ្មោះបោះឆ្នោត ដែលបច្ចុប្បន្ន មានទីតាំងនៅតាមភូមិមួយចំនួនក្នុងឃុំសង្កាត់ដែលខ្លួនរស់នៅ៕