.jpg)
បុរសជនជាតិចិន ដែលអះអាងថា ត្រូវបានជនជាតិចិនដូចគ្នាឆបោក ត្រូវបានសមត្ថកិច្ចកម្ពុជាជួយសង្គ្រោះ។ រូបថត នគរបាល
ពោធិ៍សាត់ៈ បុរសជនជាតិចិនម្នាក់ ដែលត្រូវបានជនជាតិចិនដូចគ្នា ឆបោកពីប្រទេសចិន ឱ្យមកធ្វើការនៅក្នុងតំបន់សេដ្ឋកិច្ចពិសេសមួយ នៅខេត្តពោធិ៍សាត់ ត្រូវបានសមត្ថកិច្ចកម្ពុជាជួយអន្តរាគមន៍សង្គ្រោះ និងបញ្ជូនមកអគ្គនាយកដ្ឋានអន្តោប្រវេសន៍ នៅថ្ងៃទី ៩ វិច្ឆិកា ដើម្បីត្រៀមបញ្ជូនត្រឡប់ទៅប្រទេសចិនវិញ។
លោក អ៊ិត ប៊ុនណា ស្នងការរងទទួលផែនការងារនគរបាលអន្តោប្រវេសន៍ នៃស្នងការដ្ឋាន នគរបាលខេត្តពោធិ៍សាត់ឱ្យដឹងនៅរសៀលថ្ងៃទី ៩ វិច្ឆិកាថា បុរសជនជាតិចិនឈ្មោះ Xiong Liqiang អាយុ ២៣ ឆ្នាំ ត្រូវបានជនជាតិចិនដូចគ្នា ឆបោកពីប្រទេសចិន មកធ្វើការនៅតំបន់សេសកិច្ចពិសេសថ្មដា ក្នុងខេត្តពោធិ៍សាត់។
គាត់ត្រូវបានសមត្ថកិច្ចជំនាញក្រសួងមហាផ្ទៃ សហការជាមួយស្នងការដ្ឋាននគរបាលខេត្តពោធិ៍សាត់ជួយសង្គ្រោះបានកាលពីថ្ងៃទី ៨ វិច្ឆិកា ឆ្នាំ ២០២១ នៅក្នុងក្រុមហ៊ុនមួយ នៃតំបន់សេដ្ឋកិច្ចពិសេសថ្មដា។
លោកថ្លែងថា៖ «នៅថ្ងៃនេះ (ថ្ងៃទី ៩ វិច្ឆិកា) ខាងជំនាញអន្តោប្រវេសន៍ខេត្ត បានយកឡានដឹកគាត់ទៅអគ្គនាយកដ្ឋានអន្តោប្រវេសន៍ហើយ ដើម្បីត្រៀមបញ្ជូនត្រឡប់ទៅប្រទេសចិនវិញ»។
លោកបានប្រាប់ថា មុនមានការអន្តរាគមន៍នេះ កាលពីថ្ងៃទី ៦ វិច្ឆិកា ជនរងគ្រោះ បានសរសេរសារចូលក្នុងហ្វេសប៊ុករបស់លោកនាយករដ្ឋមន្ត្រី ហ៊ុន សែន ជាភាសាអង់គ្លេស។
ទន្ទឹមនោះដែរ បុរសរងគ្រោះ ក៏បានទាក់ទងទៅក្រុមគ្រួសារ នៅប្រទេសចិន ហើយក្រុមគ្រួសារគាត់ បានទាក់ទងមកស្ថានទូតចិន ប្រចាំនៅប្រទេសកម្ពុជា ដើម្បីសុំជួយអន្តរាគមន៍។
លោក ប៊ុនណា បញ្ជាក់ថា បន្ទាប់ពីមានការសុំជួយអន្តរាគមន៍បន្ទាន់ ពីស្ថានទូតចិនប្រចាំនៅប្រទេសកម្ពុជាមក ក៏ត្រូវបានក្រុមការងារ និងប្រតិកម្មរហ័ស នៃអគ្គស្នងការដ្ឋាន នគរបាលជាតិ សហការជាមួយលោកស្នងការនគរបាលខេត្តពោធិ៍សាត់ចុះធ្វើអន្តរាគមន៍ជួយសង្គ្រោះ នៅថ្ងៃទី ៨ វិច្ឆិកា នៅតំបន់សេដ្ឋកិច្ចថ្មដា បានសម្រេចតាមការស្នើសុំពីជនរងគ្រោះ។
ក្នុងកិច្ចជួយជនរងគ្រោះនេះ ក៏មានការសម្របសម្រួលផ្លូវច្បាប់ពីសាលាដំបូងខេត្តពោធិ៍សាត់ និងអ្នកតំណាងក្រុមហ៊ុនតំបន់សេដ្ឋកិច្ចពិសេសផងដែរ៕
