.jpg)
ជនសង្ស័យ ដែលសមត្ថកិច្ចឃាត់ខ្លួននិងបញ្ជូនទៅតុលាការ ពាក់ព័ន្ធការប្រើអំពើហិង្សា និងញុះញង់ នៅខេត្តកំពត។ រូបថត ប៉ូលិសខេត្តកំពត
ភ្នំពេញៈ កម្លាំងស្នងការដ្ឋាននគរបាលខេត្តកំពត បញ្ជូនជនសង្ស័យ ៦ នាក់ ទៅតុលាការ នៅល្ងាចថ្ងៃទី ៩ វិច្ឆិកា ក្នុងនោះ ៤ នាក់ ជាជនសង្ស័យពាក់ព័ន្ធករណីប្រើអំពើហិង្សាទៅលើអ្នកកាន់កាប់អចលនវត្ថុដោយសុចរិត និងញុះញង់ឱ្យប្រព្រឹត្តបទឧក្រិដ្ឋ ជាអាទិ៍ និង ២ នាក់ទៀត ជាអ្នកកាសែត ពាក់ព័ន្ធបទញុះញង់ឱ្យប្រព្រឹត្តបទឧក្រិដ្ឋ ជាអាទិ៍ និងបរិហារកេរ្តិ៍។
លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត ថ្លែងនៅល្ងាចថ្ងៃទី ៩ វិច្ឆិកាថា កម្លាំងសមត្ថកិច្ចស្នងការដ្ឋាននគរបាលខេត្តកំពត បញ្ជូនជនសង្ស័យចំនួន ៦ នាក់ ទៅតុលាការដើម្បីចាត់ការតាមនីតិវិធី។ ក្នុងនោះ ៤ នាក់ ជាជនសង្ស័យមុខសញ្ញាចាស់ដែលដើរទន្ទ្រានដី នៅឃុំត្រពាំងភ្លាំង ស្រុកឈូក។
ដោយឡែក ២ នាក់ទៀត ជាអ្នកសារព័ត៌មាន LSN TV ដែលធ្វើការផ្សាយផ្ទាល់វាយប្រហារសមត្ថកិច្ច និងអាជ្ញាធរខេត្ត ដោយមិនបានសួរនាំឱ្យបានច្បាស់លាស់ជុំវិញរឿងរ៉ាវដែលសមត្ថកិច្ចបានឃាត់ជនសង្ស័យទាំង ៤ នាក់នោះ។
លោកថ្លែងថា៖ «គាត់មកឡាយអ៊ីចឹងមិនមែនជារឿងល្អឯណា។ គាត់មកការពារប្រជាពលរដ្ឋហ្នឹងដើម្បីឱ្យបន្តទន្ទ្រានដីគេ ដែលគេមានច្បាប់មានទម្លាប់របស់គេត្រឹមត្រូវ ឬយ៉ាងម៉េច។ បើគាត់មកសួរនាំយើង គឺយើងនឹងបង្ហាញឯកសារប្រាប់ឱ្យគាត់ដឹងថា គេឃាត់ហ្នឹងដោយសារមូលហេតុអីហើយ»។
សេចក្តីប្រកាសព័ត៌មាន របស់ស្នងការដ្ឋាននគរបាលខេត្តកំពត នៅថ្ងៃទី ៩ ខែវិច្ឆិកា ឱ្យដឹងថា នៅថ្ងៃទី ៧ ខែ វិច្ឆិកា ឆ្នាំ ២០២១ វេលាម៉ោង ១០ និង ៣០ នាទី កម្លាំងអធិការដ្ឋាននគរបាលស្រុកឈូក បានឃាត់ខ្លួនជនសង្ស័យចំនួន ៤ នាក់ ពាក់ព័ន្ធករណីប្រើអំពើហិង្សាទៅលើអ្នកកាន់កាប់អចលនវត្ថុដោយសុចរិត និងញុះញង់ឱ្យប្រព្រឹត្តបទឧក្រិដ្ឋជាអាទិ៍ ស្ថិតនៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត ក្នុងកិច្ចប្រតិបត្តិការបង្ក្រាបបទល្មើសជាក់ស្តែង។
សេចក្តីប្រកាសព័ត៌មានដដែលឱ្យដឹងទៀតថា លុះថ្ងៃទី ៨ ខែ វិច្ឆិកា ឆ្នាំ ២០២១ វេលាម៉ោង ១៤ និង ៥០ នាទី កម្លាំងនគរបាល នៃអធិការដ្ឋាននគរបាលក្រុងកំពត បានឃាត់ខ្លួនមនុស្សចំនួន ២ នាក់ (អ្នកសារព័ត៌មាន LSN TV)។ ទី១ មាន ឈ្មោះ អ៊ីង ធឿន ភេទប្រុស អាយុ ២៧ ឆ្នាំ និងម្នាក់ទៀត ឈ្មោះ សាយ សុភា ភេទប្រុស អាយុ ២៤ ឆ្នាំ។ ទាំង ២ នាក់ នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។
អ្នកទាំង ២ នោះ បានមកផ្សាយផ្ទាល់នៅចំណុចមុខរដ្ឋបាលខេត្តកំពត ស្ថិតក្នុងភូមិ ១ ឧសភា សង្កាត់កំពង់កណ្តាល ក្រុងកំពត វាយប្រហារលើចំណាត់ការកម្លាំងមានសមត្ថកិច្ច និងអាជ្ញាធរមូលដ្ឋាន ដោយមិនបានទំនាក់ទំនងជាមួយសមត្ថកិច្ច ដើម្បីសួរនាំឱ្យបានច្បាស់លាស់ជុំវិញករណីឃាត់ខ្លួនជនសង្ស័យចំនួន ៤ នាក់ កាលពីថ្ងៃទី ៧ ខែ វិច្ឆិកា ឆ្នាំ ២០២១ឡើយ។
ក្នុងសេចក្តីប្រកាសនោះសរសេរថា៖ «នេះជាហេតុធ្វើឱ្យប្រជាពលរដ្ឋមានការភាន់ច្រឡំ និងអរិយភាព លើកម្លាំងមានសមត្ថកិច្ច និងអាជ្ញាធរមូលដ្ឋាន។ ម៉្យាងទៀតគឺបានជំរុញឱ្យបង្កើនសកម្មភាពទន្ទ្រានកាន់កាប់ដីខុសច្បាប់លើដីដែលមានបណ្ណកម្មសិទ្ធិស្របច្បាប់»។
សេចក្តីប្រកាសព័ត៌មានបញ្ជាក់ថា ទង្វើរបស់អ្នកកាសែតទាំងនេះមានចេតនាញុះញង់ឱ្យប្រព្រឹត្តបទឧក្រិដ្ឋជាអាទិ៍ និងប្តឹងបរិហារកេរ្តិ៍ ដែលមានចែងក្នុងមាត្រា ៤៩៥ និងបរិហារបង្កាច់កេរិ៍្ត ដែលមានចែងក្នុង មាត្រា ៣១១ នៃក្រមព្រហ្មទណ្ឌ ហេតុនេះសមត្ថកិច្ចចាំបាច់ត្រូវចាត់ការតាមនីតិវិធីច្បាប់៕
