The Phnom Penh Post Search

Search form




Logo of Phnom Penh Post newspaper Phnom Penh Post - ដំណើរការ​ថ្នាក់​មតេ្តយ្យ​ត្រូវ​ពន្យារពេល​ និង​អនុញ្ញាតឱ្យ​បើក​ថ្នាក់​សម្រាប់​កុមារ​អាយុ​ ៥ ​ឆ្នាំ ក្រោយ​ពួកគេ​ចាក់​វ៉ាក់សាំង​រួច

ដំណើរការ​ថ្នាក់​មតេ្តយ្យ​ត្រូវ​ពន្យារពេល​ និង​អនុញ្ញាតឱ្យ​បើក​ថ្នាក់​សម្រាប់​កុមារ​អាយុ​ ៥ ​ឆ្នាំ ក្រោយ​ពួកគេ​ចាក់​វ៉ាក់សាំង​រួច

Content image - Phnom Penh Post
កុមារអាយុ ៥ ឆ្នាំ ទទួលបានការចាក់វ៉ាក់សាំងប្រភេទស៊ីណូវ៉ាក់នៅមន្ទីរពេទ្យទួលស្លែង កាលពីថ្ងៃទី ១ វិច្ឆិកា។ ហេង ជីវ័ន

ដំណើរការ​ថ្នាក់​មតេ្តយ្យ​ត្រូវ​ពន្យារពេល​ និង​អនុញ្ញាតឱ្យ​បើក​ថ្នាក់​សម្រាប់​កុមារ​អាយុ​ ៥ ​ឆ្នាំ ក្រោយ​ពួកគេ​ចាក់​វ៉ាក់សាំង​រួច

ភ្នំពេញៈ រដ្ឋមន្ដ្រីក្រសួង​អប់រំ​លោក​ ហង់ជួន ណារ៉ុន នៅ​ថ្ងៃទី​ ៨ វិច្ឆិកា ប្រកាស​ពន្យារពេល​ដំណើរការ​រៀន​ និង​បង្រៀន​នៅ​កម្រិត​មត្តេយ្យ​សិក្សា និង​សេវា​អប់រំ​កុមារ​តូច ហើយ​ថា បន្ទាប់ពី​កុមារ​អាយុ​ ៥ ​ឆ្នាំ​បាន​ចាក់​វ៉ាក់សាំង​បង្ការ​កូវីដ​ ១៩ ​រួច ក្រសួង​នឹង​ចេញ​លិខិត​អនុញ្ញាត​ឱ្យ​គ្រឹះស្ថានសិក្សា​បើក​ថ្នាក់​សម្រាប់​កុមារ​អាយុ​ ៥ ​ឆ្នាំ​។

ការប្រកាស​ពន្យារពេល​របស់​រដ្ឋមន្ត្រីក្រសួង​អប់រំ យុវជន និង​កីឡា អនុវត្ដ​តាម​ប្រសាសន៍​របស់លោក​នាយក​រដ្ឋមន្ដ្រី​ ហ៊ុន សែន ដែល​បាន​ណែនាំ​ឱ្យមាន​ការពន្យារពេល​សម្រាប់​ការដំណើរ​ការរៀន និង​បង្រៀន​នៅ​កម្រិត​មត្តេយ្យ​សិក្សា និង​សេវា​អប់រំ​កុមារ​តូច ក្នុងពេល​លោក​ធ្វើជា​អធិបតី​ពិធីសម្ពោធ​អគារ​ទីស្តីការ​ក្រសួង​រៀបចំ​ដែនដី នគរូបនីយកម្ម និង​សំណង់​ថ្មី​នា​ថ្ងៃទី​ ៨ វិច្ឆិកា​។

លោក​រដ្ឋមន្ត្រី​បញ្ជាក់ថា​៖ «​ខ្ញុំ​សូម ជម្រាប​លោក លោកស្រី​ប្រធាន ជ្រាបថា អនុវត្តតាម​អនុសាសន៍​ដ៏ខ្ពង់ខ្ពស់​របស់​សម្តេច​អគ្គមហាសេនាបតី​តេជោ​ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ក្រសួង​ស្នើ​សូម​លោក លោកស្រី​ប្រធាន ណែនាំ​ដល់​គ្រឹះស្ថាន​មត្តេយ្យ​សិក្សា​គ្រប់​ប្រភេទ​ [​មត្តេយ្យសិក្សា​សាធារណៈ មត្តេយ្យ​សិក្សា​ឯកជន និង​មត្តេយ្យ​សហគមន៍​] ​និង​សេវា​អប់រំ​កុមារ​តូច​ត្រូវ​ពន្យារពេល​សម្រាប់​ដំណើរ​ការរៀន និង​បង្រៀន​ដោយផ្ទាល់​នៅតាម​គ្រឹះស្ថាន​សិក្សា​»​។

លោក​ ហង់ជួន ណារ៉ុន បន្តថា​៖ «​បន្ទាប់ពី​កុមារ​អាយុ​​ ៥ ​ឆ្នាំ​បាន​ចាក់​វ៉ាក់សាំង​ការពារ​កូវីដ​ ១៩ ​រួច ក្រសួង​នឹង​ចេញ​លិខិត​អនុញ្ញាត​ឱ្យ​គ្រឹះស្ថានសិក្សា​បើក​បង្រៀន​សម្រាប់​កុមារ​អាយុ​ ៥ ​ឆ្នាំ​»​។

ក្នុងពេល​ធ្វើជា​អធិបតី​ពិធី​នោះ​លោក​ ហ៊ុន សែន ថ្លែងថា​បច្ចុប្បន្ន​កម្ពុជា​កំពុងបើក​ប្រទេស​ឡើងវិញ ក្នុងនោះ​ធ្វើ​យ៉ាងម៉េច​ឱ្យ​សាលា​បើក​ទៅមុន​សិន ហើយ​ក្រោយ​បើក​អត្រា​ឆ្លង​កូវីដ​ ១៩ ​ក៏មាន​ការធ្លាក់ចុះ​ដែរ​។ ក្នុងពេល​បើក​សាលា​ឡើងវិញ​មាន​មនុស្ស​ជាង​ ៣ ​លាននាក់​ចូលរៀន តែ​ឆ្លង​មាន​កម្រិត​តូចតាច​។ នេះ​មកពី​ប្រជាពលរដ្ឋ​ព្រម​ទទួលយក​វ៉ាក់សាំង​បង្ការ​ជំងឺ​កូវីដ​ ១៩ ខណៈ​អ្នកដទៃ​ប្រឆាំង​ការចាក់​វ៉ាក់សាំង​។

លោក​ ហ៊ុន សែន ​ថ្លែងថា​៖ «​អ៊ីចឹង បានជា​ខ្ញុំ​សូម​ផ្ដាំផ្ញើ មត្តេយ្យ​កុំអាល​លឿន​ពេក​។ ខ្ញុំ​ចង់ឱ្យ​បើក [​ថ្នាក់​] ​បឋម​។ បើក​មត្តេយ្យ​អត់​ទាន់ បាន​ចាក់​ថ្នាំ​ [​វ៉ាក់សាំង​] វា​មាន​រឿង​របស់​វា ប្រយ័ត្នប្រយែង​។ អ៊ីចឹង​បាន​ឥឡូវ​បាន​ឱ្យ​ចាក់​អា​ ៥ ​ឆ្នាំ​ [​កុមារ​] ព្រោះ​វ័យ​ហ្នឹង​ជួនកាល​វា​ចូល​បឋម​។ អា​ ៣ ​ឆ្នាំ ៤ ​ឆ្នាំ​ [​កុមារ​តូច​] យើង​អត់​ទាន់​ឱ្យ​ចាក់​ទេ​។ អ៊ីចឹង​យើង​កុំអាល​លឿន​ពេក [​បើក​សាលាមត្តេយ្យ​]»​។

លោកនាយក​រដ្ឋមន្ដ្រី​ថ្លែងថា វ៉ាក់សាំង​បាន​សង្គ្រោះ​ជីវិត​មនុស្ស បើ​ប្រជាពលរដ្ឋ​មិន​ទទួល​បាន​វ៉ាក់សាំង​ទេ ច្បាស់​ជា​មកដល់​ពេល​នេះ កម្ពុជា​បើក​ប្រទេស​មិន​រួច​ទេ​។ លោក​បន្តថា​៖ «​ពេលមុន​បងប្អូន​ទ្រាំទ្រ​ការលំបាក តែ​ពេលនេះ​បងប្អូន​បាន​ធូរស្រាល​ហើយ​។ ខ្ញុំ​ ១ ​អាទិត្យ​នេះ​ខ្ញុំ​តាមដាន គឺ​បងប្អូន​សប្បាយ​ចិត្ដ​នៅពេល​ដែល​យើង​បើក​ប្រទេស​»​។

លោកស្រី​ ធឿន ចាន់ណាលែន អាណាព្យាបាល​កុមារ​ម្នាក់​លើកឡើង​ថា ការបើក​ឱ្យ​ដំណើរការ​មត្តេយ្យ​សិក្សា​ឡើងវិញ បាន​ជួយ​សម្រួល​ដល់​ឪពុកម្តាយ ដែល​ត្រូវ​ទៅ​បំពេញ​ការងារ​វិញ ស្របពេល​ប្រទេស​កំពុង​បើក​ដំណើរការ​ឡើងវិញ​ស្ទើរ​គ្រប់​វិស័យ​។

លោកស្រី​ប្រាប់ថា​៖ «​វា​ពិតជា​ប៉ះពាល់​ខ្លាំង​ដល់​ការអភិវឌ្ឍ​របស់​ពួកគាត់​ [​កុមារ​តូច​] ជាពិសេស​ប្រាជ្ញា​ស្មារតី ហើយ​រឹតតែ​ប៉ះពាល់ ខ្លាំង​សម្រាប់​វ័យ​មូលដ្ឋាន ក្រោម​អាយុ​ ៦ ​ឆ្នាំ​។ ក្មេង​ក្រោម​អាយុ ៦ ​ឆ្នាំ​ត្រូវការ​បញ្ចេញ​សកម្មភាព ការរៀន​ពី​បំណិន​ជីវិត​នានា​តាមរយៈ​ការលេង​ និង​ចៀស​ពី​ការប្រើប្រាស់​ពេល​នៅលើ​អេក្រង់​ស្មាតហ្វូន​ (screen time)»​។

លោកស្រី​បន្តថា ការរៀន​តាម​អនឡាញ​មិនបាន​ជួយ​កុមារ​តូច ដូច​វ័យ​ធំ​នោះឡើយ ព្រោះ​ពួកគេ​មិនទាន់​ចេះ​បែងចែក​ការរៀន​បាន​ដូច​ក្មេង​ដែល​មាន​វ័យ​ធំ​។ លោកស្រី​បន្តថា​៖ «​ខ្ញុំ​សង្ឃឹមថា ក្រសួង​នឹង​សិក្សា​ថ្លឹងថ្លែង​ឡើងវិញ​នូវ​ហានិភ័យ​ជុំវិញ​បញ្ហា​នេះ​»​។

លោក​ គៀន សាងកុសល អាណាព្យាបាល​កុមារ​ដែល​ត្រូវ​ចូលរៀន​ថ្នាក់​មត្តេយ្យ​ដែរនោះ​ថ្លែងថា សាលា​ឯកជន​ថ្នាក់​មត្តេយ្យ​រៀន​តាម​អនឡាញ​ជួប​ការលំបាក​ច្រើន ក្នុង​ការទទួល​បាន​ចំណេះដឹង​។

លោក​ថា​៖ «​សូម​ក្រសួង​ជួយ​បញ្ជា​ដោយ​អនុគ្រោះ​ទៅ​ក្មេង​គ្រប់ អាយុ​រៀន​ថ្នាក់​ទី​ ១ សូម​អនុញ្ញាតឱ្យ​បើក​សាលារៀន​ថ្នាក់​ទី​ ១ ​ហ្មង​ទៅ​។ ​សូមកុំ​ឱ្យ​សាលា​ឯកជន​តឹង​ពេក ខាត​អាយុ​ក្មេង​អស់​ហើយ​»៕

វីដេអូ៖

អត្ថបទគួរចាប់អារម្មណ៍