កំពតៈ លោក ម៉ៅ ធនិន អភិបាលខេត្តកំពតប្រកាសផ្តល់ស្បៀងដល់ក្រុមអ្នករត់ម៉ូតូឌុប តាក់ស៊ី និងប្រជានេសាទទូទាំងខេត្ត ដើម្បីគាំទ្រដល់ជីវភាពរបស់ពួកគាត់ដែលកំពុងខ្វះខាត ដោយរដ្ឋបាលខេត្តនឹងរៀបចំការជួបជុំ សម្រាប់ក្រុមទាំង ២ នេះនៅពាក់កណ្តាលខែវិច្ឆិកា។
លោក ម៉ៅ ធនិន បានប្រកាសយ៉ាងដូច្នេះពីថ្ងៃទី ៧ វិច្ឆិកា ក្នុងអំឡុងពេលលោកទទួលអំណាយពីសប្បុរសជននៅសាលាខេត្តកំពត ដើម្បីបន្តយកអំណាយទាំងនោះទៅចែកជូនដល់ប្រជាពលរដ្ឋដែលខ្វះខាត។
លោក ម៉ៅ ធនិន បានថ្លែងថា៖ «គ្រួសារម៉ូតូឌុប និងតាក់ស៊ីទូទាំងខេត្តនេះ ខ្ញុំគិតថា ប្រហែលជា ៥ ពាន់នាក់លើ ៧០ ម៉ឺននាក់ (ប្រជាជនខេត្តកំពតសរុប)។ ចន្លោះពីថ្ងៃទី ១៥ ទៅ ថ្ងៃទី ១៧ ខ្ញុំគិតថានឹងជួបគ្រួសារម៉ូតូឌុប គ្រួសារតាក់ស៊ី ក្នុងក្រុងកំពត។ ប្រជានេសាទរបស់យើងនៅក្នុងខេត្តនេះ យើងធ្វើបច្ចុប្បន្នភាព មានចន្លោះពី ៣ ៥០០ ទៅ ៣ ៨០០ គ្រួសារ។ អ៊ីចឹងគ្រួសារទាំងអស់នេះ ក៏យើងត្រូវគ្រប់គ្រងដែរ»។ ការដែលត្រូវគ្រប់គ្រងប្រជានេសាទឱ្យមានជីវភាពល្អប្រសើរ គឺដោយសារតែពួកគេទាំងអស់ គឺប្រកបរបរជាមួយនឹងធនធានធម្មជាតិ ដែលប្រឈមនឹងហានិភ័យខ្ពស់ពីគ្រោះធម្មជាតិ ខណៈដែលបច្ចុប្បន្នជីវភាពរបស់ប្រជានេសាទស្ថិតក្នុងភាពយ៉ាប់យ៉ឺន។
លោកសង្កត់ធ្ងន់ថា៖ «ពាក់ព័ន្ធនឹងព្យុះ ពាក់ព័ន្ធនឹងអាកាសធាតុមិនអំណោយផល គាត់មិនអាចចេញទូកបានទេ។ អ៊ីចឹងកាលណាលោកមិនអាចចេញទូកបាន ព្រោះជាពិសេសប្រជានេសាទ លោករកទទួលទានប្រចាំថ្ងៃ រកពីយប់ លក់ថ្ងៃទិញអង្ករហើយចេញទៅទៀត។ អ៊ីចឹងបើមិនអាចចេញទូកបានចន្លោះពេលពី ៣ ទៅ ៥ ថ្ងៃ ឬ ១០ ថ្ងៃនឹងមានបញ្ហាប្រឈម»។
លោកបន្ថែមថា៖ «បញ្ហាប្រឈមទាំងអស់នេះ បើសិនជាយើងមិនបានចូលរួមសុខទុក្ខជាមួយគាត់ គាត់នឹងទៅខ្ចីលុយមេកញ្ច្រែងយកទៅទិញអង្ករទទួលទាន គឺការជំពាក់ ការទៅជាដើម ដើមទៅជាការមិនដឹងសងប៉ុន្មានតំណចប់នោះទេ»។
បើតាមលោក ម៉ៅ ធនិន ការរៀបចំគ្រប់គ្រងលើក្រុមអ្នករត់ម៉ូតូឌុប តាក់ស៊ី និងប្រជានេសាទនេះ រដ្ឋបាលខេត្តនឹងផ្តល់ជាអង្ករ និងស្បៀងមួយចំនួន ដើម្បីជាការឧបត្ថម្ភដល់ជីវភាពពួកគេ ឱ្យគេចចេញពីភាពអត់ឃ្លាន។
លោក យឹម ផល្លី មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តកំពតលើកឡើងថា នេះគឺជាការគិតគូរមួយដ៏ល្អរបស់លោកអភិបាលខេត្តថ្មី ដែលមានបំណងចង់ជួយសម្រាលទុក្ខលំបាករបស់ប្រជានេសាទ និងអ្នកប្រកបរបររត់ម៉ូតូឌុប តាក់ស៊ី ដែលអភិបាលខេត្តមុនៗមិនដែលបានចាប់អារម្មណ៍។ ជាមួយគ្នានេះលោកយល់ថា បើទោះជាការជួយនេះបន្តិចបន្តួចក្តីក៏បានចូលរួមសម្រាលបន្ទុកលំបាក និងលើកស្ទួយជីវភាពរបស់ពួកគេឱ្យបានមួយគ្រា ក្នុងអំឡុងពេលជួបវិបត្តិកូវីដ ១៩ ហើយស្ថានភាពអាកាសធាតុមិនអំណោយផលសម្រាប់អ្នកនេសាទសមុទ្រ។
លោកបញ្ជាក់ថា៖ «មួយរយៈពេលខ្លីនេះ យើងឃើញអាជ្ញាធរដែនដី លោកហាក់ដូចជាសកម្មណាស់ក្នុងការចុះស្រាវជ្រាវពាក់ព័ន្ធតាំងពីម៉ូតូឌុប កង់បី ប្រជានេសាទយើង។ នេះ គឺជាស្ថានភាពមួយជាក់ស្តែង ហើយអាជ្ញាធរមិនអាចធ្វើការកុហក ឬឆកល្វែងបានទេក្នុងកិច្ចការងារនេះ ដើម្បីផ្តល់ការជួយឧបត្ថម្ភដល់អ្នកខ្វះខាតពិតប្រាកដ»។
អ្នកស្រី សេន រ៉ូហ្វាយាស ប្រជាសហគមន៍នេសាទដូនតោក ខេត្តកំពតបានសាទរចំពោះវិធានការ និងការគិតគូររបស់អភិបាលខេត្តថ្មី ដែលមើលឃើញពីទុក្ខលំបាករបស់អ្នកនេសាទ ខណៈប្រជានេសាទភាគច្រើន ស្ទើរតែមិនអាចចេញទូកនេសាទបាន ព្រោះបញ្ហាគ្រោះធម្មជាតិ។
អ្នកស្រីរំពឹងថា៖ «បើសិនជាបានអង្ករបានស្បៀងខ្លះមក ក្នុងពេលនេះ គឺជួយសម្រាលបន្ទុកខ្លះដែរ ព្រោះឥឡូវ យើងរកមិនសូវបានទេ គេរកច្រើន ហើយខ្យល់ រលកធំៗ ម្យ៉ាងសាំងក៏ឡើងថ្លៃទៀត យើងចំណាយច្រើនណាស់»៕
វីដេអូ៖