កំពង់ស្ពឺៈ លោក ជា ហ៊ាន ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ ACNCIPO នៅថ្ងៃទី ៨ ខែវិច្ឆិកា បានដាក់ពាក្យប្តឹង ឈ្មោះ សៀង សាម៉ន និង ឈ្មោះ អ៊ូរ សំរ៉េចចេស្តារ ពីបទឈូសឆាយទន្ទ្រានដីព្រៃដោយខុសច្បាប់ចំនួន ៧១ ហិកតា ក្នុងតំបន់ការពារដោយព្រះរាជក្រឹត្យ។ មន្ត្រីបរិស្ថាន កំពុងចុះពិនិត្យទីតាំងនោះ។
ពាក្យប្តឹងរបស់លោក ជា ហ៊ាន បានដាក់ជូនទៅអយ្យការ អមសាលាដំបូងខេត្តកំពង់ស្ពឺនៅថ្ងៃទី ៨ វិច្ឆិកា បានប្តឹង ឈ្មោះ សៀង សាម៉នភេទស្រី និង ឈ្មោះ អ៊ូរ សំរ៉េចចេស្តារ ភេទប្រុស រស់នៅភូមិថ្នល់បំបែក ឃុំប្រាំបីមុំ ស្រុកថ្ពង ខេត្តកំពង់ស្ពឺ។
ក្នុងពាក្យប្តឹងលើកឡើងថា នៅថ្ងៃទី ១០ ខែ តុលា ឆ្នាំ ២០១៨ អង្គការ ACNCIPO បានទទួលព័ត៌មានថា មានអាប៊ុលតូច ១ គ្រឿងបានឈូសឆាយព្រៃឈើនៅចំណុចច្រាំងអ៊ុង ភូមិស្រែកិន ឃុំត្រពាំងជោរ ស្រុកឱរ៉ាល់។
ក្រោយទទួលដំណឹងលោកបានរាយការណ៍ទៅលោក ខន សុខុន នាយកដែនជម្រកសត្វព្រៃភ្នំឱរ៉ាល់ ដើម្បីឱ្យកម្លាំងមន្ត្រីឧទ្យានុរក្សនៅគោលដៅស្រែកិនចូលរួមចាប់អាប៊ុលនោះ ប៉ុន្តែចាប់មិនបានដោយសារឈ្មោះ អ៊ូ សំរ៉េចចេស្តារ រារាំងមន្ត្រីឧទ្យានុរក្សដោយសំអាងថា ធ្វើតាមមាត្រា ៣៦ នៃច្បាប់ស្តីពីតំបន់ការពារធម្មជាតិ។ ពាក្យប្តឹងនោះលើកឡើងទៀតថា ក្រោយមកទើបលោកនាយកដែនជម្រកសត្វព្រៃភ្នំឱរ៉ាល់សម្រេចស្នើសុំទៅមន្ទីរបរិស្ថាន ដើម្បីមានមូលដ្ឋានសុំទៅលោកអភិបាលខេត្តកំពង់ស្ពឺចេញដីកាដកហូតដីទាំងនោះចំនួន ៧១ ហិកតាទុកជាសម្បត្តិរដ្ឋវិញ។
ក្នុងពាក្យប្តឹងលោក ជា ហ៊ាន សរសេរថា៖ «ក្រោយពីមានដីកាដកហូតផ្ទៃដី ៧១ ហិកតា ហើយឈ្មោះ សៀង សាម៉េត និង អ៊ូរ សំរ៉េចចេស្តារ នៅតែធ្វើសកម្មភាពឈូសឆាយទន្ទ្រានលើដីការដកហូតដោយដាំចេក ដាំស្វាយ ដូង ដោយមិនអនុវត្ត តាមដីកាដកហូត បំពានដីកាដកហូត»។
លោក ជា ហ៊ាន ថ្លែងនៅថ្ងៃទី ៩ វិច្ឆិកា ថា មន្ត្រីឧទ្យានុរក្សនៅគោលដៅនីមួយៗ ដែលបានឈរជើងនៅតំបន់នោះ ហាក់មានការរារែកក្នុងការអនុវត្តច្បាប់ ខណៈដែលមានការអន្តរាគមន៍ពីថ្នាក់លើដែលនាំឱ្យពួកគាត់មានការពិបាកក្នុងការអនុវត្តច្បាប់។
លោក ឱម ម៉ាក់ធារី ប្រធានមន្ទីរបរិស្ថានខេត្តកំពង់ស្ពឺ ថ្លែងនៅថ្ងៃទី ៩ វិច្ឆិកាថា មន្ត្រីបរិស្ថានកំពុងចុះទៅពិនិត្យមើលនៅទីតាំងនោះ ដើម្បីសិក្សានៅលើទីតាំងដីនោះឱ្យដឹងថា មានប្រភេទដំណាំអ្វីខ្លះ? បើសិនជាមានការកាប់រានហើយបែរជាថាជាទីតាំងអាស្រ័យផលនោះ អ្នកប្រព្រឹត្តត្រូវទទួលខុសត្រូវចំពោះមុខច្បាប់។
លោកថ្លែងថា៖ «ព្រោះទីតាំងដីនេះមានចេញដីកាដកហូតរួចហើយ វាអត់មានត្រូវធ្វើអីទេ ព្រោះដីកាលណាចេញដីកាដកហូត គឺត្រូវទុកជាសម្បត្តិរដ្ឋ។ ប៉ុន្តែដោយសារគាត់រស់នៅយូរហើយដល់ក្រោយមកសម្តេចនាយកឱ្យរស់នៅអាស្រ័យផល អ៊ីចឹងយើងពិនិត្យមើលគាត់នៅប៉ុន្មានឆ្នាំ។ អាហ្នឹងយើងសុំគោលកាណ៍ទៅថ្នាក់ក្រសួង ដើម្បីសុំធ្វើការកាត់ឆ្វៀលឱ្យគាត់ តែបើកាប់រានដីព្រៃហើយ ថាអាហ្នឹងអាស្រ័យផលដែរ ក៏យើងមិនអនុញ្ញាតឱ្យដែរ។
មន្ទីរបរិស្ថានក៏នឹងរាយការណ៍ទៅអភិបាលខេត្តនៅក្រោយពេលទទួលបានរបាយការណ៍ពីមន្ត្រីបរិស្ថានដែលចុះទៅពិនិត្យជាក់ស្តែង។ លោកថា អ្នកខ្លះក្នុងនាមអង្គការប្រឆាំងអំពើពុករលួយ បែរជាប្រព្រឹត្តអំពើពុករលួយដោយខ្លួនឯង ដោយដើរយកលុយគេ នៅពេលយកលុយមិនបានបែរជាទៅប្តឹងក៏មាន។
លោកបញ្ជាក់ថា៖ «ខ្ញុំនឹងរាយការណ៍ទៅអភិបាលខេត្ត តើលោកនឹងមានវិធានការយ៉ាងម៉េច ដែលគេសុំគ្រាន់តែជ្រួយដីគល់ចេក ខ្នុរ ដូង អីហ្នឹងគាត់ ទៅរករឿងគេដែរ ធ្វើយ៉ាងម៉េចអាហ្នឹងខ្ញុំមិនដឹងទេ។ ប៉ុន្តែចាំមើលឯកឧត្តមអភិបាលលោកសម្រេច ព្រោះអាហ្នឹងនៅក្នុងដីកាដកហូត»។
លោក ជា ហ៊ាន ឆ្លើយតបថា លោកមិនមែនជាមន្ត្រីយុត្តិធម៌ ប៉ុន្តែក្នុងនាមអង្គការក៏មានឯកសារលក្ខន្តិកៈតម្កល់នៅក្រសួងមហាផ្ទៃដែលអាចនៅតែដាក់ពាក្យប្តឹងបានចំពោះជនប្រព្រឹត្តបទល្មើសនោះដែរ។ លោកបញ្ជាក់ទៀតថា លោកនឹងនៅតែបន្តធ្វើការប្តឹង ហើយមិនមែនប្តឹងតែបុគ្គលម្នាក់នោះទេ គឺនៅបន្តប្តឹងថែមទៀតនៅគ្រប់តំបន់ការពារធម្មជាតិទាំងអស់ដែលមានការរំលោភបំពានយកដីរដ្ឋ។
លោកថ្លែងថា៖ «យើងនឹងបន្តឃ្លាំមើលនឹងរាយការណ៍ និងប្តឹងជនប្រព្រឹត្តបទល្មើសទៅតុលាការ ការចាត់ការមិនចាត់ការ ជាសមត្ថកិច្ចរបស់តុលាការ និងមន្ត្រីនគរបាលយុត្តិធម៌»៕
វីដេអូ៖